ഇസ്രായേല്‍ - ഹമാസ് യുദ്ധത്തില്‍ ബന്ദികളെ തിരിച്ചയയ്ക്കണമെന്നും വെടിനിര്‍ത്തല്‍ വേണമെന്നും ആവര്‍ത്തിച്ച് വത്തിക്കാന്‍.

2024-03-01

ഇസ്രായേല്‍ - ഹമാസ് യുദ്ധത്തില്‍ ബന്ദികളെ തിരിച്ചയയ്ക്കണമെന്നും വെടിനിര്‍ത്തല്‍ വേണമെന്നും ആവര്‍ത്തിച്ച് വത്തിക്കാന്‍. വിഷയത്തിന്‍റെ ഗൗരവം കണക്കിലെടുത്ത് വത്തിക്കാനിലെ പാലസ്തീന്‍ സ്ഥാനപതിയും ഇതേ ആവശ്യമുന്നയിച്ച് രംഗത്തെത്തി. ഈസ്റ്റര്‍, റമദാന്‍ അവധി ദിനങ്ങള്‍ക്ക് മുന്നോടിയായി വെടിനിര്‍ത്തലിന് അദ്ദേഹം ആഹ്വാനവും ചെയ്തു.

ഭീകരസംഘടനയായ ഹമാസ് ബന്ദികളാക്കിയവരെ സുരക്ഷിതമായി തിരിച്ചെത്തിക്കണമെന്നും ഇസ്രയേലും ഹമാസും തമ്മില്‍ നടക്കുന്ന യുദ്ധത്തില്‍ വെടിനിര്‍ത്തല്‍ വേണമെന്നും ആവര്‍ത്തിച്ച് വത്തിക്കാന്‍ രംഗത്തെത്തി. ബന്ദികളെ ഇസ്രായേലിലേക്കു തിരിച്ചയയ്ക്കാനുള്ള ഏകമാര്‍ഗം വെടിനിര്‍ത്തല്‍ മാത്രമാണെന്ന് വത്തിക്കാന്‍ സ്റ്റേറ്റ് സെക്രട്ടറി കര്‍ദ്ദിനാള്‍ പീയെത്രൊ പരോളിന്‍ വെളിപ്പെടുത്തി. "ഞങ്ങളുടെ ആദ്യത്തെ ഉത്കണ്ഠ, ബന്ദികളെ മോചിപ്പിക്കുന്നതിനും മാനുഷിക സഹായത്തിനുമുള്ള ഒരു മാര്‍ഗം കണ്ടെത്തുക എന്ന തുമാണ്. എന്നാലത്, വളരെ ബുദ്ധിമുട്ടായി തുടരുന്നു. അതിനാല്‍ ഒരേയൊരു വഴി വെടിനിര്‍ത്തല്‍ മാത്രമാണ് - സെന്‍റസിമസ് ആന്നസ് പ്രോ പോണ്ടിഫിസ് ഫൗണ്ടേഷന്‍റെ അവാര്‍ഡ് ദാന ചടങ്ങില്‍ സംസാരിക്കുമ്പോഴായിരുന്നു കര്‍ദ്ദിനാള്‍ പീയെത്രൊ പരോളിന്‍റെ പരാമര്‍ശം ഉണ്ടായത്. ഇസ്രായേലുമായുള്ള നയതന്ത്രബന്ധങ്ങളില്‍ പ്രതീക്ഷാവഹമായ യാതൊന്നും ഉണ്ടായിട്ടില്ലെന്നും കര്‍ദ്ദിനാള്‍ പരോളിന്‍ സ്ഥിരീകരിച്ചു. അതേസമയം, വത്തിക്കാനിലെ പാലസ്തീന്‍ സ്ഥാനപതി ഇസ കാസിസി വത്തിക്കാനിലെ ഉന്നത ഉദ്യോഗസ്ഥനുമായി കൂടിക്കാഴ്ച നടത്തി. കൂടിക്കാഴ്ചയില്‍ വരാനിരിക്കുന്ന ഈസ്റ്റര്‍, റമദാന്‍ അവധി ദിനങ്ങള്‍ക്ക് മുന്നോടിയായി വെടിനിര്‍ത്തലിന് കാസിസി ആഹ്വാനം ചെയ്തു.