ഇറാനെതിരായ ആക്രമണത്തില്‍ പങ്കാളിയാകില്ല നിലപാട് വ്യക്തമാക്കി ബൈഡന്‍

2024-04-14

പശ്ചിമേഷ്യ സംഘര്‍ഷത്തില്‍ ഇറാനെതിരെയുള്ള ആക്രമണത്തില്‍ അമേരിക്ക പങ്കാളിയാകില്ലെന്ന് പ്രസിഡന്റ് ജോ ബൈഡന്‍. ഇസ്രായേല്‍ പ്രധാനമന്ത്രി ബെന്യമിന്‍ നെതന്യാഹുവിനെ അമേരിക്കന്‍ പ്രസിഡന്റ് ജോ ബൈഡന്‍ ഇക്കാര്യം നേരിട്ട് അറിയിച്ചു. നെതന്യാഹുമായുള്ള ഫോണ്‍ സംഭാഷണത്തിലാണ് ഇറാനുമായി ഏറ്റുമുട്ടാനില്ലെന്ന നിലപാട് ബൈഡന്‍ സ്വീകരിച്ചത്. കഴിഞ്ഞ ദിവസം ഇറാനെതിരെയുള്ള പോരാട്ടത്തില്‍ ഇസ്രായേലിന് പൂര്‍ണപിന്തുണ അമേരിക്ക വാഗ്ദാനം ചെയ്തിരുന്നു. 

ഇറാന്റെ മിസൈല്‍-ഡ്രോണ്‍ ആക്രമണത്തിനു പിന്നാലെ നെതന്യാഹു ബൈഡനുമായി ഫോണില്‍ ബന്ധപ്പെട്ടിരുന്നു. ഫോണ്‍ സംഭാഷണത്തിലാണ് ഇറാനുമായി ഏറ്റുമുട്ടാനില്ലെന്ന് ബൈഡന്‍ നിലപാട് വ്യക്തമാക്കിയത്. ഇസ്രായേല്‍ ഇറാനെ വീണ്ടും ആക്രമിച്ചല്‍ അമേരിക്ക അതിനെ പിന്തുണക്കില്ല. കഴിഞ്ഞ ദിവസം ഇറാന്‍ നടത്തിയ ആക്രമണങ്ങളെ പ്രതിരോധിച്ചത് ഇസ്രായേലിന്റെ വിജയമായി കണക്കാക്കണം. നൂറിലധികം ബാലിസ്റ്റിക് മിസൈല്‍ ഉള്‍പ്പെടെ ഇറാന്‍ തൊടുത്ത മിക്ക ഡ്രോണുകളും മിസൈലുകളും വ്യോമാതിര്‍ത്തിക്കു പുറത്തുവെച്ചു തന്നെ ഇസ്രായേലിനു തകര്‍ക്കാനായെന്നും ബൈഡന്‍ പറഞ്ഞു. ഇറാനുമായി ഏറ്റുമുട്ടാനില്ലെന്ന് യു. എസ് പ്രതിരോധ സെക്രട്ടറി ലോയ്ഡ് ഓസ്റ്റിനും വ്യക്തമാക്കി. തങ്ങള്‍ ഇറാനുമായി സംഘര്‍ഷം ആഗ്രഹിക്കുന്നില്ല. പക്ഷേ, അമേരിക്കന്‍ സൈന്യത്തെ സംരക്ഷിക്കാനും ഇസ്രായേലിന്റെ പ്രതിരോധത്തെ പിന്തുണക്കാനും തങ്ങള്‍ മടിക്കില്ലെന്നും അദ്ദേഹം പറഞ്ഞു. ഇറാന്റെ മിസൈല്‍ ആക്രമണം അഞ്ചു മണിക്കൂര്‍ ആണ് നീണ്ടുനിന്നത്. ഇറാന്റെ 70ലധികം ഡ്രോണുകളും മൂന്ന് ബാലിസ്റ്റിക് മിസൈലുകളും യു. എസ് സേന തടഞ്ഞതായാണ് റിപ്പോര്‍ട്ട്. ബാലിസ്റ്റിക് മിസൈലുകള്‍ കിഴക്കന്‍ മെഡിറ്ററേനിയന്‍ കടലില്‍ വിന്യസിച്ച യുദ്ധക്കപ്പലുകളാണ് ചെറുത്തത്. ഏപ്രില്‍ ഒന്നിന് സിറിയയിലെ കോണ്‍സുലേറ്റ് ബോംബിട്ട് തകര്‍ക്കുകയും മുതിര്‍ന്ന സൈനിക ഉദ്യോഗസ്ഥരെ കൊലപ്പെടുത്തുകയും ചെയ്തതിന് തിരിച്ചടിയായാണ് ഇറാന്റെ മിസൈല്‍ ആക്രമണം.