അമേരിക്കയിലെ കാലിഫോര്‍ണിയയില്‍ അതിവേഗം പടര്‍ന്ന് കാട്ടുതീ

2024-07-28

അമേരിക്കയില്‍ ഉണ്ടായിട്ടുള്ളതില്‍ വെച്ച് ഏറ്റവും വലിയ കാട്ടുതീയായി പടര്‍ന്നു കാലിഫോര്‍ണിയയിലെ കാട്ടുതീ. തീയണക്കുന്നതിനായി ആയിരക്കണക്കിന് അഗ്‌നിശമന സേനാംഗങ്ങളെയാണ് വിന്യസിച്ചിരിക്കുന്നത്. ഇതുവരെ 144 കിലോമീറ്റര്‍ ദൂരത്തോളമുള്ള കാടാണ് കത്തി നശിച്ചിരിക്കുന്നത്. 

കഴിഞ്ഞ ദിവസം കാലിഫോര്‍ണിയയില്‍ ഉണ്ടായ കാട്ടുതീ വളരെ വേഗമാണ് പടര്‍ന്നു പിടിച്ചത്. ആയിരക്കണക്കിന് അഗ്‌നിശമന സൈന്യങ്ങള്‍ തീയണക്കാന്‍ ശ്രമിക്കുന്നുണ്ടെങ്കിലും തീ അനിയന്ത്രിതമായി തുടരുകയാണെന്നാണ് റിപ്പോര്‍ട്ടുകള്‍. ഇതുവരെ 3,50,000 ഏക്കര്‍ സ്ഥലം കത്തിപ്പോയതായാണ് കണക്കാക്കുന്നത്. മനുഷ്യ നിര്‍മിത കാട്ടുതീയാണ് ഇതെന്നും തീയിട്ടെന്ന് സംശയിക്കുന്ന 42കാരന്‍ പിടിയിലായെന്നും അധികൃതര്‍ അറിയിച്ചു.

ഈ വര്‍ഷം അമേരിക്കയിലുണ്ടായ ഏറ്റവും വലിയ കാട്ടുതീയാണിത്. നിരവധി കൗണ്ടികളിലുള്ളവരോട് മാറിത്താമസിക്കാന്‍ നിര്‍ദേശം നല്‍കി. തീപിടിത്തത്തില്‍ 134 കെട്ടിടങ്ങള്‍ നശിച്ചതായി അധികൃതര്‍ അറിയിച്ചു. പ്രദേശത്തെ തണുത്ത താപനിലയും ഈര്‍പ്പമുള്ള വായുവും തീ പടരുന്നത് മന്ദഗതിയിലാക്കുമെന്നാണ് പ്രതീക്ഷയെന്ന് കാലിഫോര്‍ണിയ ഡിപ്പാര്‍ട്ട്മെന്റ് ഓഫ് ഫോറസ്ട്രി ആന്‍ഡ് ഫയര്‍ പ്രൊട്ടക്ഷന്‍ വിഭാഗം അറിയിച്ചു. സാധ്യമായതെല്ലാം ചെയ്യാന്‍ പ്രസിഡന്റ് ജോ ബൈഡന്‍ നിര്‍ദേശം നല്‍കിയതായി വൈറ്റ് ഹൗസ് വൃത്തങ്ങള്‍ അറിയിച്ചു. 

തീപിടിച്ച കാര്‍ ഒരാള്‍ മലയിടുക്കിലേക്ക് തള്ളിയിട്ടതോടെയാണ് ബുധനാഴ്ച ഉച്ചയ്ക്ക് കാട്ടുതീ പടരാന്‍ തുടങ്ങിയതെന്ന് അധികൃതര്‍ അറിയിച്ചു. തീയണയ്ക്കുന്നതിനിടെ ഒരു അഗ്‌നിശമന സേനാംഗം മരിച്ചുവെന്ന് യുഎസ് ഫോറസ്റ്റ് സര്‍വീസ് വ്യക്തമാക്കി.