രാഷ്ട്രീയ വെല്ലുവിളികളില്‍ ഭയപ്പെടില്ലെന്ന് സിദ്ധരാമയ്യ

2024-09-30

രാഷ്ട്രീയ വെല്ലുവിളികളില്‍ താന്‍ ഭയപ്പെടുകയോ ഭയക്കുകയോ ചെയ്യില്ലെന്ന് കര്‍ണാടക മുഖ്യമന്ത്രി സിദ്ധരാമയ്യ. മുഡ അഴിമതിയില്‍ സിദ്ധരാമയ്യക്കെതിരെ കേസെടുത്തതിനെത്തുടര്‍ന്ന് രാജിവയ്ക്കണമെന്ന് പ്രതിപക്ഷം ആവശ്യപ്പെട്ടതോടെയാണ് പ്രതികരണം.

ജനങ്ങളുടെ പിന്തുണ ഉള്ളിടത്തോളം കാലം താന്‍ രാജിവെക്കുകയോ ആര്‍ക്കുവേണ്ടിയും വളയുകയോ ചെയ്യില്ലെന്ന് സിദ്ധരാമയ്യയുടെ പറഞ്ഞു.  മനസ്സാക്ഷിയാണ് സുപ്രീം കോടതിയെന്ന് മഹാത്മാഗാന്ധി പറഞ്ഞിരുന്നു. എന്‍റെ മനസ്സാക്ഷി വ്യക്തമാണ്. എതിരാളികള്‍ പ്രശ്നമുണ്ടാക്കാന്‍ ശ്രമിച്ചാലും നിയമപരമായും രാഷ്ട്രീയപരമായും ഏത് പ്രതിബന്ധങ്ങളെയും നേരിടാനും മറികടക്കാനുമുള്ള കഴിവില്‍ തനിക്ക് ആത്മവിശ്വാസമുണ്ടെന്നും സിദ്ധരാമയ്യ പറഞ്ഞു. മുഡ കേസില്‍ സിദ്ധരാമയ്യക്കെതിരെ ലോകായുക്ത പൊലീസ് വെള്ളിയാഴ്ചയാണ് കേസ് രജിസ്റ്റര്‍ ചെയ്തത്. ജനപ്രതിനിധികളുമായി ബന്ധപ്പെട്ട കേസുകള്‍ പരിഗണിക്കുന്ന ബംഗളൂരുവിലെ പ്രത്യേക കോടതി യുടെ നിര്‍ദേശപ്രകാരമാണ് കേസെടുത്തത്. കേസില്‍ സിദ്ധരാമയ്യ ഒന്നും ഭാര്യ ബി എം പാര്‍വതി രണ്ടും പ്രതികളാണ്. ഭാര്യാ സഹോദരന്‍ ബി മല്ലികാര്‍ജുന സ്വാമിയാണ് മൂന്നാം പ്രതി. വിവാദ ഭൂമിയുടെ പഴയ ഉടമ എ ദേവരാജ് നാലാം പ്രതിയാണ്. 1988ലെ അഴിമതി തടയല്‍ നിയമം, ഇന്ത്യന്‍ ശിക്ഷാനിയമം, ബിനാമി ആക്ട്, 2011ലെ കര്‍ണാടക ഭൂമി പിടിച്ചെടുക്കല്‍ നിരോധന നിയമം തുടങ്ങിയവയിലെ വിവിധ വകുപ്പുകള്‍ ചുമത്തിയാണ് കേസ്. ലോകായുക്ത പൊലീസിന്‍റെ നാല് സ്പെഷ്യല്‍ ടീമുകളാണ് അന്വേഷണം നടത്തുക.