ഹമാസിന് അന്ത്യശാസനവുമായി ഡൊണാള്‍ഡ് ട്രംപ്

2025-01-01

ഹമാസിന് മുന്നറിയിപ്പുമായി നിയുക്ത അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. താന്‍ അധികാരമേറ്റെടുക്കുമ്പോഴേക്കും ഗാസയില്‍ ബന്ദികളാക്കിയവരെ മോചിപ്പിക്കണമെന്നാണ് അന്ത്യശാസനം. 

ഫ്‌ലോറിഡയിലെ മാര്‍-എ-ലാഗോയില്‍ നടന്ന പുതുവത്സരാഘോഷത്തില്‍ പങ്കെടുക്കവെയാണ് ട്രംപ് തന്റെ നിലപാട് വ്യക്തമാക്കിയത്. ഇസ്രയേലിനുള്ള പിന്തുണ തെരഞ്ഞെടുപ്പിന് മുമ്പ് തന്നെ ട്രംപ് വ്യക്തമാക്കിയിരുന്നു. ഗാസയില്‍ തടവില്‍ കഴിയുന്ന ഇസ്രയേല്‍ ബന്ദികളെ ഉടന്‍ മോചിപ്പിക്കണമെന്നും ഇല്ലെങ്കില്‍ കനത്ത വിലനല്‍കേണ്ടിവരുമെന്നും ട്രംപ് പറഞ്ഞിരുന്നു. 2023 ഒക്ടോബര്‍ 7-ന് ഹമാസ് തെക്കന്‍ ഇസ്രായേലിലേക്ക് ഇരച്ചുകയറി 1,200-ഓളം പേരെ കൊല്ലുകയും 250-ഓളം പേരെ ബന്ദികളാക്കുകയും ചെയ്തതോടെയാണ് ഇസ്രായേല്‍ ഹമാസ് യുദ്ധം ആരംഭിച്ചത്. 100-ഓളം പേര്‍ ഇപ്പോഴും ഗാസയ്ക്കുള്ളില്‍ തടവിലാണെന്നാണ് റിപ്പോര്‍ട്ടുകള്‍. വരാനിരിക്കുന്ന വര്‍ഷത്തില്‍ എല്ലാവരും സന്തോഷത്തോടെയും, ആരോഗ്യത്തോടെയും, നല്ലവരായിരിക്കട്ടെ എന്നും നിയുക്ത പ്രസിഡന്റ് ആശംസിച്ചു.