സെന്‍സര്‍ ബോര്‍ഡ് തീരുമാനം 'വൈകി വന്ന വിവേകം': പ്രതികരിച്ച് ഓര്‍ത്തഡോക്സ് സഭ പരമാദ്ധ്യക്ഷന്‍ രംഗത്ത്

2025-03-06

കോട്ടയം: മാര്‍ക്കോ സിനിമയുടെ പ്രദര്‍ശന അനുമതിക്കെതിരെ സെന്‍സര്‍ ബോര്‍ഡ് സ്വീകരിച്ച നടപടി വൈകി ഉദിച്ച വിവേകമെന്ന് പരിശുദ്ധ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാബാവാ. തക്ക സമയത്ത് ഇടപെടല്‍ നടത്താതെ ഇപ്പോള്‍ നിലപാടെടുക്കുന്നതില്‍ എന്ത് പ്രസക്തിയെന്നും പരിശുദ്ധ കാതോലിക്കാബാവാ ചോദിച്ചു. വിപണിയില്‍ വിഷം വില്‍ക്കാന്‍ അനുമതി നല്‍കിയ ശേഷം വില്‍പ്പനക്കാരനെതിരെ കേസെടുക്കുന്നതു പോലെ മാത്രമേ സെന്‍സര്‍ ബോര്‍ഡ് തീരുമാനത്തെ കാണാനാകൂ എന്നും കാതോലിക്കാബാവാ പ്രതികരിച്ചു.

മാര്‍ക്കോ സിനിമയുടെ സാറ്റലൈറ്റ് പ്രദര്‍ശനത്തിന് അനുമതി നിഷേധിച്ച സെന്‍സര്‍ ബോര്‍ഡ് തീരുമാനം വൈകി ഉദിച്ച വിവേകമെന്ന് പരിശുദ്ധ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാബാവാ ആരോപിച്ചു. തീയറ്റര്‍ റിലീസിന് ശേഷം ചിത്രം ഒ.ടി.ടി പ്ലാറ്റ്ഫോമിലുമെത്തി. മൊബൈല്‍ സ്‌ക്രീനിലൂടെ ബഹു ഭൂരിപക്ഷവും സിനിമ കണ്ടു കഴിഞ്ഞു. സിനിമയുടെ റിലീസിന് മുന്‍പ് കര്‍ശന നിലപാട് സ്വീകരിച്ചിരുന്നെങ്കില്‍ വയലന്‍സ് രംഗങ്ങള്‍ ചിലതെങ്കിലും ഒഴിവാക്കാന്‍ സാധിക്കുമായിരുന്നു. തക്ക സമയത്ത് ഇടപെടല്‍ നടത്താതെ ഇപ്പോള്‍ നിലപാടെടുക്കുന്നതില്‍ എന്ത് പ്രസക്തിയെന്നും പരിശുദ്ധ കാതോലിക്കാബാവാ ചോദിച്ചു. വിപണിയില്‍ വിഷം വില്‍ക്കാന്‍ അനുമതി നല്‍കിയ ശേഷം വില്‍പ്പനക്കാരനെതിരെ കേസെടുക്കുന്നതു പോലെ മാത്രമേ സെന്‍സര്‍ ബോര്‍ഡ് തീരുമാനത്തെ കാണാനാകൂ എന്നും കാതോലിക്കാബാവാ പ്രതികരിച്ചു.

കേരളത്തില്‍ അടുത്തിടെയായി വര്‍ധിച്ചു വരുന്ന ക്രൂരമായ കൊലപാതകങ്ങള്‍ക്ക് കാരണമായി ചിലരെങ്കിലും ചൂണ്ടിക്കാണിക്കുന്നത് 'മാര്‍ക്കോ', 'അനിമല്‍', 'കില്‍' എന്നീ സിനിമകളാണ്. യുവതലമുറയെ ഹരം കൊള്ളിക്കുംവിധം വയലന്‍സ് രംഗങ്ങള്‍ കുത്തിനിറച്ച് സാമ്പത്തിക ലാഭംകൊയ്ത ഈ സിനികളുടെ സ്വാധീനം സമൂഹത്തില്‍ പ്രതിഫലിക്കാന്‍ തുടങ്ങിയതോടെ പല കോണുകളില്‍ നിന്നും രൂക്ഷവിമര്‍ശനങ്ങള്‍ ഉയര്‍ന്നിരുന്നു. ഇതോടനുബന്ധിച്ചാണ് മലയാള സിനിമയായ മാര്‍ക്കോയുടെ പ്രദര്‍ശനാനുമതി നിഷേധിച്ചുകൊണ്ടുള്ള സെന്‍സര്‍ ബോര്‍ഡ് നടപടി ഒടുവില്‍ വന്നിരിക്കുന്നത്.