ഏറ്റവുമധികം തീരുവ ചുമത്തുന്ന രാജ്യമാണ് ഇന്ത്യ; ഇരുരാജ്യങ്ങളുടെ തീരുവ നയങ്ങള്‍ നല്ല രീതിയില്‍ അവസാനിക്കുമെന്ന് ഡോണാള്‍ഡ് ട്രംപ്.

2025-03-29

ഇന്ത്യ ഏറ്റവുമധികം തീരുവ ചുമത്തുന്ന രാജ്യമാണെന്ന് അമേരിക്കന്‍ പ്രസിഡന്റ് ഡോണാള്‍ഡ് ട്രംപ്. പ്രധാനമന്ത്രി നരേന്ദ്ര മോദി അടുത്ത സുഹൃത്താണെന്നും ഇന്ത്യ യുഎസ് തീരുവ നയങ്ങള്‍ നല്ല രീതിയില്‍ അവസാനിക്കുമെന്നും ഡോണാള്‍ഡ് ട്രംപ് പറഞ്ഞു

നരേന്ദ്ര മോദി മികച്ച പ്രധാനമന്ത്രിയാണെന്ന് ട്രംപ് പറഞ്ഞു. നേരത്തെയും ഇന്ത്യയില്‍ ഇറക്കുമതി ചെയ്യുന്ന സാധനങ്ങള്‍ക്ക് ഉയര്‍ന്ന തീരുവ ചുമത്തുന്നതില്‍ ട്രംപ് നിലപാട് കടുപ്പിച്ചിരുന്നു. ഇന്ത്യന്‍ ഉല്‍പ്പന്നങ്ങള്‍ക്ക് പരസ്പര തീരുവ ഏര്‍പ്പെടുത്തണമെന്ന് തന്റെ ഭരണകൂടം സമ്മര്‍ദ്ദം ചെലുത്തുന്നുണ്ടെങ്കിലും, ഇരു രാജ്യങ്ങളും തമ്മിലുള്ള വ്യാപാര ചര്‍ച്ചകള്‍ നല്ല ഫലങ്ങള്‍ നല്‍കുമെന്ന് വൈറ്റ് ഹൗസില്‍ വെച്ച് ട്രംപ്, പറഞ്ഞു. എന്നാല്‍ അമേരിക്കയുടെ തീരുവ നടപടികളില്‍ യുഎസ് ഓഹരി വിപണിയില്‍ ആശങ്ക ഉയരുന്നുണ്ട്. ഓഹരി വിപണിയില്‍ വന്‍ ഇടിവുണ്ടായിട്ടുമുണ്ട്. ഇന്ത്യക്കെതിരെ ഉയര്‍ന്ന തീരുവ ചുമത്താനുള്ള നിലപാട് യുഎസ് പ്രസിഡന്റ് ഡൊണാള്‍ഡ് ട്രംപ് സ്വീകരിച്ചിട്ടുണ്ട്.

ലോകത്തിലെ ഏറ്റവും ഉയര്‍ന്ന തീരുവ ചുമത്തുന്ന രാജ്യങ്ങളിലൊന്നാണ് ഇന്ത്യ. ഇരുവരും പരസ്പരം ചര്‍ച്ചകള്‍ നടത്തിയിട്ടുണ്ട്. ഇന്ത്യയ്ക്കും നമ്മുടെ രാജ്യത്തിനുമിടയില്‍ കാര്യങ്ങള്‍ വളരെ നന്നായി നടക്കുമെന്ന് താന്‍ കരുതുന്നുവെന്ന് അദ്ദേഹം പറഞ്ഞു. അതേസമയം ഫെബ്രുവരി മുതല്‍, താരിഫുകളെച്ചൊല്ലിയുള്ള പിരിമുറുക്കങ്ങള്‍ ലഘൂകരിക്കുക എന്ന ലക്ഷ്യത്തോടെ, യുഎസുമായുള്ള വ്യാപാര ബന്ധം ശക്തിപ്പെടുത്തുന്നതിനായി ഇന്ത്യ ഗണ്യമായ നടപടികള്‍ കൈക്കൊണ്ടിട്ടുണ്ട്. യുഎസില്‍ നിന്നുള്ള ഊര്‍ജ്ജ വാങ്ങലുകള്‍ കഴിഞ്ഞ വര്‍ഷം 15 ബില്യണ്‍ ഡോളറില്‍ നിന്ന് 25 ബില്യണ്‍ ഡോളറായി ഉയര്‍ത്താന്‍ ഇന്ത്യ തീരുമാനിച്ചിരുന്നു. ട്രംപിന്റെ വിമര്‍ശനത്തിന് മറുപടിയായി, ഇന്ത്യ പ്രധാന ഇറക്കുമതികളുടെ തീരുവ കുറച്ചിട്ടുമുണ്ട്, ബര്‍ബണ്‍ വിസ്‌കി താരിഫ് 150 ശതമാനത്തില്‍ നിന്ന് 100 ശതമാനമായി കുറച്ചു. സര്‍ക്കാരിന്റെ ഫെബ്രുവരി ബജറ്റ് ആഡംബര കാറുകള്‍, സോളാര്‍ സെല്ലുകള്‍, യന്ത്രങ്ങള്‍, അടിസ്ഥാന കസ്റ്റംസ് എന്നിവയുടെ തീരുവയും ഇന്ത്യ കുറച്ചു. പീക്ക് ഇറക്കുമതി താരിഫ് 70 ശതമാനമായും ശരാശരി താരിഫ് 11 ശതമാനത്തില്‍ താഴെയുമായി കുറച്ചിട്ടുമുണ്ടെന്ന് ഇന്ത്യ അറിയിച്ചു