സംസ്ഥാനത്ത് ടോള്‍ പ്ലാസകളില്‍ നിരക്കുകള്‍ വര്‍ധിപ്പിച്ചു

2025-03-29

തിരുവനന്തപുരം: സംസ്ഥാനത്തെ വിവിധ ടോള്‍ പ്ലാസകളില്‍ നിരക്കുകള്‍ വര്‍ധിപ്പിച്ചു. നിരക്കുവര്‍ധന ഏപ്രില്‍ ഒന്നുമുതല്‍ പ്രാബല്യത്തില്‍ വരുന്നതാണ്. കഴിഞ്ഞ വര്‍ഷത്തെ വന്‍ വര്‍ദ്ധനവിന് പിന്നാലെയാണ് വീണ്ടും നിരക്ക് വര്‍ധിപ്പിച്ചിരിക്കുന്നത് തിരുവന്തപുരം, കുമ്പളം, പന്നിയങ്കര, വാളയാര്‍ എന്നിവിടങ്ങളിലെ ടോള്‍ പ്ലാസകളില്‍ പുതുക്കിയ നിരക്കുകളാണ് ഉത്തരവില്‍ നല്‍കിയിരിക്കുന്നത്.

തിരുവല്ലത്ത് ഒരു യാത്രയ്ക്കുള്ള നിരക്കില്‍ ലൈറ്റ് മോട്ടോര്‍ വാഹനങ്ങള്‍ക്ക് 5 രൂപയും ലൈറ്റ് വാണിജ്യ വാഹനങ്ങള്‍ക്ക് 15 രൂപയും അടക്കമാണ് ടോള്‍ വര്‍ധിച്ചത്. കഴിഞ്ഞ വര്‍ഷം വന്‍ വര്‍ധനവ് വരുത്തിയതിന് പിന്നാലെയാണ് വീണ്ടും നിരക്ക് വര്‍ധിപ്പിച്ചത്. കാറുകള്‍ക്ക് ഒരു വശത്തേക്ക് സഞ്ചരിക്കാന്‍ 155 രൂപയും ഇരുവശത്തേക്കും സഞ്ചരിക്കാന്‍ 230 രൂപയുമാണ് നിലവിലെ നിരക്ക്. പുതുക്കിയ നിരക്ക് പ്രകാരം 160 രൂപയും 240 രൂപയുമായി മാറും. തിരുവല്ലത്ത് ടോള്‍ പിരിവ് തുടങ്ങി ഒന്നരവര്‍ഷത്തിനുള്ളില്‍ അഞ്ചാം തവണയാണ് നിരക്ക് വര്‍ധിപ്പിക്കുന്നത്. 

നിലവില്‍ കാറിനുള്ള മാസം പിരിക്കുന്ന ടോള്‍ പിരിവ് 5100 രൂപയാണ്. പുതുക്കിയ ടോള്‍ കാറിന്റെ മന്തിലി പാസിന് 5375 രൂപ നല്‍കണം എറണാകുളം കുമ്പളം ടോള്‍പ്ലാസയില്‍ ലൈറ്റ് മോട്ടോര്‍ വാഹനങ്ങള്‍ക്ക് ഒരു ഭാഗത്തേക്ക് അഞ്ചുരൂപ വര്‍ധിപ്പിച്ചു. പുതുക്കിയ നിരക്ക് പ്രകാരം അന്‍പത് രൂപ നല്‍കേണ്ടി വരും. പാലക്കാട് ജില്ലയിലെ വാളയാറിലും പന്നിയങ്കരയിലും രണ്ട് മുതല്‍ മൂന്ന് ശതമാനം വരെയാണ് ടോള്‍ നിരക്ക് വര്‍ധിപ്പിച്ചത്. വര്‍ഷം തോറുമുള്ള ആനുപാതിക വര്‍ധനയെന്നാണ് ടോള്‍ പിരിവെന്ന് കമ്പനി വിശദീകരണം നല്‍കിയത്. വാളയാര്‍ ടോളില്‍ ജീപ്പിനും കാറിനും കഴിഞ്ഞവര്‍ഷം നിശ്ചയിച്ചിരുന്ന ടോള്‍ നിരക്കാണ്. വാളയാര്‍ ടോള്‍ പ്ലാസ ഉള്‍പ്പെടുന്ന പുതുശ്ശേരി പഞ്ചായത്തിലെ വാഹന യാത്രികരുടെ പ്രതിമാസ നിരക്ക് 340 ല്‍ നിന്നും 350 രൂപയായി  ടോള്‍ നിരക്ക് ഉയര്‍ത്തിയിട്ടുമുണ്ട്.