ഇന്ത്യക്കെതിരെ ചൈനയുടെ ചാരവൃത്തി, തുറന്നു പറഞ്ഞു പാക് പ്രതിരോധ മന്ത്രി

2025-06-28

ഇന്ത്യയുടെ സുരക്ഷയ്ക്ക് വെല്ലിവിളിയുയര്‍ത്തുന്ന നീക്കങ്ങളുടെ വെളിപ്പെടുത്തലുമായി പാകിസ്ഥാന്‍. ഓപ്പറേഷന്‍ സിന്ദൂറിനും തുടര്‍ന്നുണ്ടായ സംഘര്‍ഷങ്ങള്‍ക്കും ശേഷം ഇന്ത്യയെക്കുറിച്ചുള്ള രഹസ്യാന്വേഷണ വിവരങ്ങള്‍ ചൈന പാകിസ്ഥാനുമായി പങ്കുവെക്കുന്നുണ്ടെന്ന് പാകിസ്ഥാന്‍ പ്രതിരോധ മന്ത്രി ഖ്വാജ ആസിഫ് വെളിപ്പെടുത്തി. ഇന്ത്യ പാകിസ്ഥാന്‍ ബന്ധം സങ്കീര്‍ണമായി തുടരുന്നതിനിടയിലാണ് പാകിസ്ഥാന്‍ പ്രതിരോധ മന്ത്രിയുടെ ഈ പരാമര്‍ശം പുറത്ത് വന്നിരിക്കുന്നത്

പഹല്‍ഗാം ഭീകരാക്രമണത്തിന്റെ പശ്ചാത്തലത്തില്‍ സംഘര്‍ഷഭരിതമായി ആടിയുലഞ്ഞു മുന്നോട്ടു പോകുന്ന ഇന്ത്യ പാകിസ്ഥാന്‍ ബന്ധം വഷളാക്കുന്നതില്‍ ചൈനയുടെ പങ്ക് നിഷേധിക്കാനാവാത്തതാണ്. ഇന്ത്യക്കെതിരെ പ്രവര്‍ത്തിക്കാന്‍ സാധിക്കുന്ന ഏതവസരവും പാഴാക്കാതെ പാകിസ്താനൊപ്പം നിലകൊളളുന്ന സമീപനമാണ് ചൈന എക്കാലവും സ്വീകരിച്ചുപോരുന്നത്. ഇപ്പോള്‍ പാക് പ്രതിരോധ മന്ത്രിയുടെ വെളിപ്പെടുത്തലും അത് അരക്കെട്ടുറപ്പിക്കുന്നതാണ്. ഇന്ത്യയെ സംബന്ധിക്കുന്ന രഹസ്യാന്വേഷണ വിവരങ്ങള്‍ പാകിസ്ഥാന് ചൈന കൈമാറിയിരിക്കുന്നു. സൗഹൃദ രാജ്യങ്ങള്‍ തമ്മില്‍ ഉപഗ്രഹങ്ങള്‍ വഴിയോ മറ്റ് മാര്‍ഗങ്ങള്‍ വഴിയോ ശേഖരിക്കുന്ന രഹസ്യാന്വേഷണ വിവരങ്ങള്‍ പങ്കിടുന്നത് സാധാരണമാണെന്നും ചൈനയ്ക്കും ഇന്ത്യയുമായി തര്‍ക്കങ്ങളുണ്ടെന്നും പാകിസ്ഥാന്‍ പ്രതിരോധ മന്ത്രി ഖ്വാജ ആസിഫ് പറഞ്ഞു. പാകിസ്താന്റെ പക്കലുള്ള രഹസ്യ വിവരങ്ങള്‍ പങ്കിടുന്നത് വളരെ സാധാരണമാണെന്നും ആസിഫ് കൂട്ടിച്ചേര്‍ത്തു. ഇന്ത്യയുമായുള്ള സമീപകാല സംഘര്‍ഷത്തിന് ശേഷം പാകിസ്ഥാന്‍ അതീവ ജാഗ്രതയിലാണെന്നും പാക് പ്രതിരോധ മന്ത്രി വ്യക്തമാക്കി. പാക് പ്രതിരോധമന്ത്രിയുടെ പ്രസ്താവനയ്ക്കെതിരെ ചൈനയോ ഇന്ത്യയോ ഇതുവരെ പ്രതികരിച്ചിട്ടില്ല.