ഗോവിന്ദസ്വാമിക്ക് ജയില്‍ ചാടാന്‍ ആരുടെയും സഹായം ലഭിച്ചില്ല ഡിഐജി റിപ്പോര്‍ട്ട്, ജയില്‍ ഡിജിപിക്ക് കൈമാറി

2025-07-29

ഗോവിന്ദസ്വാമിക്ക് ജയില്‍ ചാടാന്‍ ആരുടെയും സഹായം ലഭിച്ചില്ലെന്ന് ജയില്‍ ഡിഐജിയുടെ അന്വേഷണ റിപ്പോര്‍ട്ട്. ഡിഐജി റിപ്പോര്‍ട്ട്്, ജയില്‍ ഡിജിപിക്ക് കൈമാറി. ജയിലിലെ സ്ഥിരം പ്രശ്‌നക്കാരനായ ഗോവിന്ദസ്വാമിയെ ആരും സഹായിക്കാന്‍ ഇടയില്ലെന്നാണ് റിപ്പോര്‍ട്ടില്‍ പറയുന്നത്. 

ഗോവിന്ദസ്വാമിക്ക് സഹതടവുകാരുമായി കാര്യമായ ബന്ധം ഉണ്ടായിരുന്നില്ല. അതിനാല്‍ തന്നെ ജീവനക്കാരോ തടവുകാരോ സഹായിച്ചതിന് തെളിവില്ലെന്നാണ് ജയില്‍ ഡിഐജിയുടെ അന്വേഷണ റിപ്പോര്‍ട്ടില്‍ പറയുന്നത്. ഗോവിന്ദസ്വാമിയുടെ ഇടതു കൈക്ക് സാധാരണ ഒരു കൈയുടെ കരുത്തുണ്ട്. ഒരാളെ ഇടിക്കാന്‍ പോലും ഈ കൈ കൊണ്ട് കഴിയും. ജയിലിന്റെ ആദ്യത്തെ ചെറുമതില്‍ ചാടിക്കടക്കാന്‍ രണ്ട് വീപ്പകളാണ് ഗോവിന്ദസ്വാമി ഉപയോഗിച്ചത്. ഒരു വീപ്പ നേരത്തേ മതിലിനു സമീപത്തുണ്ടായിരുന്നു. പൊക്കം കൂട്ടാന്‍ മറ്റൊരെണ്ണം കൂടെ ജയില്‍ വളപ്പില്‍ നിന്ന് ശേഖരിക്കുകയായിരുന്നു. അതേസമയം ജയിലില്‍ ഗുരുതര സുരക്ഷാ വീഴ്ചയുണ്ടായതായും റിപ്പോര്‍ട്ടില്‍ പറയുന്നുണ്ട്. രാത്രി ഡ്യൂട്ടിയിലുണ്ടായിരുന്ന അസിസ്റ്റന്റ് ജയില്‍ സൂപ്രണ്ടിനടക്കം വീഴ്ച സംഭവിച്ചു. സെല്ലില്‍ എലി കടിക്കുന്നത് തടയാന്‍ ഗോവിന്ദസ്വാമി തുണി ചോദിച്ചെങ്കിലും ജയില്‍ അധികൃതര്‍ നല്‍കിയിരുന്നില്ല. റിമാന്‍ഡ് തടവുകാര്‍ അലക്കി ഉണക്കാനിട്ടപ്പോഴാകാം പ്രതി തുണി സംഘടിപ്പിച്ചത് എന്നാണ് റിപ്പോര്‍ട്ടിലെ നിഗമനം. സിസിടിവി നിരീക്ഷണത്തിന് ആളില്ലാതിരുന്നത് ഉദ്യോഗസ്ഥ ക്ഷാമം മൂലമെന്നും അന്വേഷണ റിപ്പോര്‍ട്ടിലുണ്ട്. അതേസമയം സെല്ലിന്റെ അഴികള്‍ മുറിച്ചത് എങ്ങനെയെന്ന കാര്യത്തില്‍ വിശദമായ അന്വേഷണം വേണമെന്ന് റിപ്പോര്‍ട്ടില്‍ ശുപാര്‍ശ ചെയ്യുന്നുണ്ട്.