വിട നല്‍കാന്‍ ഒരുങ്ങി കേരള കത്തോലിക്കാ സഭ

2025-09-20

ഇടയ ശുശ്രൂഷയിലൂടെ ഏവരുടെയും മനസ്സില്‍ ഇടം കണ്ടെത്തിയ കാലം ചെയ്ത ആര്‍ച്ച്ബിഷപ് എമരിറ്റസ് മാര്‍ ജേക്കബ് തൂങ്കുഴി പിതാവിന് വിട നല്‍കാന്‍ ഒരുങ്ങി ത്യശ്ശൂര്‍. സംസ്‌കാരശുശ്രൂഷയുടെ ഒന്നാം ഘട്ടം സെപ്റ്റംബര്‍ 20 ന് കാലത്ത് തൃശൂര്‍ അതിരൂപതാ മന്ദിരത്തില്‍ ആരംഭിക്കും.

ശുശ്രൂഷ കാലയളവില്‍ ഹൃദ്യമായ പെരുമാറ്റം കൊണ്ട് ഏവരെയും ആകര്‍ഷിച്ചിരുന്ന കാലം ചെയ്ത ജേക്കബ് തൂങ്കുഴി പിതാവിന് വിട നല്‍കാന്‍ ഒരുങ്ങി സാംസ്‌കാരിക നഗരി. സംസ്‌കാരശുശ്രൂഷയുടെ ഒന്നാം ഘട്ടം സെപ്റ്റംബര്‍ 20 ന് രാവിലെ 11.30നു തൃശൂര്‍ അതിരൂപതാ മന്ദിരത്തില്‍ ആര്‍ച്ച്ബിഷപ് മാര്‍ ആന്‍ഡ്രൂസ് താഴത്തിന്റെ കാര്‍മികത്വത്തില്‍ ആരംഭിക്കും. ഉച്ചയ്ക്കു 12.15ന് ഭൗതികദേഹം തൃശൂര്‍ ഡോളേഴ്സ് ബസിലിക്കയിലേക്കു കൊണ്ടുപോകും. പൊതുദര്‍ശനത്തിനുശേഷം ഉച്ചകഴിഞ്ഞു 3.30നു തൃശൂര്‍ സ്വരാജ് റൗണ്ട് ചുറ്റി വിലാപയാത്രയായി ലൂര്‍ദ് കത്തീഡ്രലിലേക്കു കൊണ്ടുപോകും. വൈകുന്നേരം അഞ്ചിനു കത്തീഡ്രലില്‍ മാര്‍ ആന്‍ഡ്രൂസ് താഴത്തിന്റെ മുഖ്യ കാര്‍മികത്വത്തില്‍ വിശുദ്ധ കുര്‍ബാന. ഇരിങ്ങാലക്കുട രൂപതാധ്യക്ഷന്‍ മാര്‍ പോളി കണ്ണുക്കാടന്‍ സന്ദേശം നല്‍കും. അതിരൂപതാ സഹായമെത്രാന്‍ മാര്‍ ടോണി നീലങ്കാവില്‍, ഷംഷാബാദ് അതിരൂപത മെത്രാപ്പോലീത്ത മാര്‍ പ്രിന്‍സ് പാണേങ്ങാടന്‍ എന്നിവര്‍ സഹകാര്‍മികരാകും. 

സെപ്റ്റംബര്‍ 22ന് രാവിലെ 9.30 വരെ ലൂര്‍ദ് കത്തീഡ്രല്‍ ദേവാലയത്തില്‍ പൊതുദര്‍ശനത്തിനായി അവസരമൊരുക്കും. 9.30ന് സംസ്‌കാരശുശ്രൂഷയുടെ രണ്ടാംഘട്ടം സീറോ മലബാര്‍ സഭ മുന്‍ മേജര്‍ ആര്‍ച്ച്ബിഷപ് മാര്‍ ജോര്‍ജ് ആലഞ്ചേരിയുടെ കാര്‍മികത്വത്തില്‍ ആരംഭിക്കും. 10നു മാര്‍ ആന്‍ഡ്രൂസ് താഴത്ത് മാര്‍ ജേക്കബ് തൂങ്കുഴിയെ അനുസ്മരിക്കും. തുടര്‍ന്ന് സീറോ മലബാര്‍സഭാ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടിലിന്റെ മുഖ്യ കാര്‍മികത്വത്തില്‍ ദിവ്യബലിയോടുകൂടി സംസ്‌കാരശുശ്രൂഷയുടെ മൂന്നാംഘട്ടം നടക്കും. ദിവ്യബലി മദ്ധ്യേ മാനന്തവാടി രൂപത മെത്രാന്‍ മാര്‍ ജോസഫ് പൊരുന്നേടം അനുസ്മരണസന്ദേശം നല്‍കും. മുപ്പതിലേറെ ആര്‍ച്ച്ബിഷപ്പുമാരും ബിഷപ്പുമാരും തിരുക്കര്‍മങ്ങളില്‍ പങ്കെടുക്കും. ഉച്ചയ്ക്ക് ഒന്നിനു ഭൗതികശരീരം കോഴിക്കോട് ദേവഗിരി സെന്റ് ജോസഫ്‌സ് പള്ളിയിലേക്കു കൊണ്ടുപോകും. താമരശേരി രൂപതാധ്യക്ഷന്‍ മാര്‍ റെമിജിയോസ് ഇഞ്ചനാനിയിലിന്റെ കാര്‍മികത്വത്തിലുള്ള പ്രാര്‍ഥനയ്ക്കുശേഷം പൊതുദര്‍ശനം നടക്കും. തുടര്‍ന്നു കോഴിക്കോട് കോട്ടുളിയില്‍ ക്രിസ്തുദാസി സന്യാസിനീ സമൂഹത്തിന്റെ ഹോം ഓഫ് ലൗ ജനറലേറ്റില്‍ കബറടക്കും.