ഇന്ത്യക്ക് ഏഷ്യാ കപ്പില്‍ തുടര്‍ച്ചയായ മൂന്നാം ജയം

2025-09-20

ഏഷ്യാ കപ്പ് 2025-ല്‍ ഒമാനെ 21 റണ്‍സിന് പരാജയപ്പെടുത്തി ഇന്ത്യയുടെ കുതിപ്പ്. ടൂര്‍ണമെന്റില്‍ ഇന്ത്യയുടെ തുടര്‍ച്ചയായ മൂന്നാം ജയമാണിത്. ഈ മത്സരത്തിലൂടെ ഇന്ത്യയുടെ പേസ് ബൗളര്‍ അര്‍ഷ്ദീപ് സിങ് ടി20 ക്രിക്കറ്റില്‍ 100 വിക്കറ്റുകള്‍ തികയ്ക്കുന്ന ആദ്യ ഇന്ത്യന്‍ താരമായി ചരിത്രം കുറിച്ചു. അബുദാബിയിലെ ഷെയ്ഖ് സായിദ് സ്റ്റേഡിയത്തില്‍ നടന്ന മത്സരത്തില്‍ സഞ്ജു സാംസന്റെ അര്‍ദ്ധ സെഞ്ചുറിയും അഭിഷേക് ശര്‍മയുടെ തകര്‍പ്പന്‍ ബാറ്റിങ്ങുമാണ് ഇന്ത്യക്ക് മികച്ച സ്‌കോര്‍ സമ്മാനിച്ചത്.

ടോസ് നേടിയ ഇന്ത്യ ബാറ്റിങ് തിരഞ്ഞെടുക്കുകയായിരുന്നു. നിശ്ചിത 20 ഓവറില്‍ എട്ട് വിക്കറ്റ് നഷ്ടത്തില്‍ 188 റണ്‍സാണ് ഇന്ത്യ നേടിയത്. മലയാളി താരം സഞ്ജു സാംസണ്‍ 45 പന്തില്‍ 56 റണ്‍സ് നേടി ടോപ് സ്‌കോററായി. അഭിഷേക് ശര്‍മ 15 പന്തില്‍ 38 റണ്‍സെടുത്ത് വെടിക്കെട്ട് തുടക്കമാണ് നല്‍കിയത്. ഒമാനുവേണ്ടി ഷാ ഫൈസല്‍, ജിതേന്‍ രാമാനന്ദി, ആമിര്‍ കലീം എന്നിവര്‍ രണ്ട് വിക്കറ്റ് വീതം വീഴ്ത്തി. 

189 റണ്‍സ് വിജയലക്ഷ്യം പിന്തുടര്‍ന്ന് ഒമാന്‍ പൊരുതി നോക്കിയെങ്കിലും 20 ഓവറില്‍ നാല് വിക്കറ്റ് നഷ്ടത്തില്‍ 167 റണ്‍സ് നേടാനേ സാധിച്ചുള്ളൂ. 43 വയസ്സുകാരനായ ആമിര്‍ കലീം 64 റണ്‍സും ഹമ്മദ് മിര്‍സ 51 റണ്‍സുമെടുത്ത് മികച്ച പ്രകടനം കാഴ്ചവെച്ചു. ഒമാന്റെ രണ്ടാം വിക്കറ്റില്‍ ഈ കൂട്ടുകെട്ട് 93 റണ്‍സ് നേടി ഇന്ത്യക്ക് ഭീഷണി ഉയര്‍ത്തിയിരുന്നു. എന്നാല്‍, കൃത്യമായ ഇടവേളകളില്‍ വിക്കറ്റുകള്‍ വീഴ്ത്തി ഇന്ത്യന്‍ ബൗളര്‍മാര്‍ ഒമാനെ പിടിച്ചുകെട്ടി. മത്സരത്തിലെ നിര്‍ണായക നിമിഷം ഒമാന്‍ ബാറ്റര്‍ വിനായക് ശുക്ലയെ പുറത്താക്കി അര്‍ഷ്ദീപ് സിങ് 100-ാമത്തെ ടി20 വിക്കറ്റ് നേടുന്നതായിരുന്നു. ഈ നേട്ടം സ്വന്തമാക്കുന്ന ആദ്യ ഇന്ത്യന്‍ പേസ് ബൗളര്‍ എന്ന റെക്കോര്‍ഡ് അര്‍ഷ്ദീപിന് സ്വന്തമായി. ഈ ജയത്തോടെ ഇന്ത്യ സൂപ്പര്‍ ഫോറില്‍ പ്രവേശിച്ചു. അടുത്ത മത്സരത്തില്‍ ഇന്ത്യ ചിരവൈരികളായ പാകിസ്താനെ നേരിടും.