മോറാന്‍ ഹൈവേയില്‍ ചരിത്രം , എമര്‍ജന്‍സി റണ്‍വേയില്‍ യുദ്ധവിമാനങ്ങള്‍ പറന്നിറങ്ങി, ചരിത്ര നിമിഷത്തിന് സാക്ഷ്യം വഹിച്ച് മോറാന്‍, പ്രധാനമന്ത്രി നരേന്ദ്ര മോദി റണ്‍വേ ഔദ്യോഗികമായി ഉദ്ഘാടനം ചെയ്തു

2026-02-14

അസമിലെ മോറാന്‍ ദേശീയ പാതയില്‍ ചരിത്രം കുറിച്ച് ഇന്ത്യന്‍ വ്യോമസേന. . അടിയന്തര സാഹചര്യങ്ങളില്‍ യുദ്ധവിമാനങ്ങള്‍ ലാന്‍ഡ് ചെയ്യിക്കുന്നതിനായുള്ള 'എമര്‍ജന്‍സി ലാന്‍ഡിംഗ് സ്ട്രിപ്പ് രാജ്യത്തിന് സമര്‍പ്പിച്ച് പ്രധാനമന്ത്രി നരേന്ദ്ര മോദി.രാജ്യത്തിന്റെ പ്രതിരോധ മേഖലയ്ക്കും സാധാരണക്കാര്‍ക്കും ഒരുപോലെ ഗുണകരമാകുന്ന ഈ പദ്ധതി, അതിര്‍ത്തി മേഖലയിലെ അടിസ്ഥാന സൗകര്യ വികസനത്തില്‍ വലിയ മാറ്റം കൊണ്ടുവരുമെന്ന് മോദി വ്യക്തമാക്കി. 

ഇന്ത്യയുടെ പ്രതിരോധ മേഖലയ്ക്ക് കരുത്തേകി മോറാന്‍ ഹൈവേയില്‍ വിമാനങ്ങള്‍ പറന്നിറങ്ങി. മൊറാനില്‍ ദേശീയപാത 127ലായിരുന്നു പ്രധാനമന്ത്രിയെയും വഹിച്ച സി-130ജെ വിമാനം ഇറങ്ങിയത്.യുദ്ധകാലത്തോ മറ്റ് അടിയന്തര സാഹചര്യങ്ങളിലോ വിമാനത്താവളങ്ങള്‍ ഉപയോഗിക്കാന്‍ കഴിയാതെ വന്നാല്‍, ഹൈവേകളെ റണ്‍വേകളായി ഉപയോഗിക്കുക എന്ന ലക്ഷ്യത്തോടെയാണ് ഈ പദ്ധതി തയ്യാറാക്കിയിരിക്കുന്നത്.ദേശീയപാത അതോറിറ്റിയും വ്യോമസേനയും സംയുക്തമായാണ് പദ്ധതി പൂര്‍ത്തിയാക്കിയത്. വടക്കുകിഴക്കന്‍ മേഖലയിലെ സൈനിക നീക്കങ്ങള്‍ക്കും ദുരന്തനിവാരണ പ്രവര്‍ത്തനങ്ങള്‍ക്കും ഈ പുതിയ സംവിധാനം വലിയ രീതിയില്‍ ഗുണകരമാകും.യുദ്ധസാഹചര്യങ്ങളില്‍ യുദ്ധവിമാനങ്ങള്‍ക്കും, പ്രകൃതിക്ഷോഭങ്ങള്‍ ഉണ്ടാകുമ്പോള്‍ വലിയ ചരക്ക് വിമാനങ്ങള്‍ക്കും അതിവേഗം ലാന്‍ഡ് ചെയ്യാന്‍ ഈ സൗകര്യം വഴിയൊരുക്കും. വടക്കുകിഴക്കന്‍ മേഖലയിലെ ദുര്‍ഘടമായ ഭൂപ്രകൃതിയില്‍ ദുരിതാശ്വാസ പ്രവര്‍ത്തനങ്ങള്‍ വേഗത്തിലാക്കാന്‍ ഇത് സഹായിക്കും. 'അഷ്ടലക്ഷ്മി' എന്ന് പ്രധാനമന്ത്രി വിശേഷിപ്പിക്കുന്ന എട്ട് വടക്കുകിഴക്കന്‍ സംസ്ഥാനങ്ങളുടെ വികസനത്തിന് ഈ പദ്ധതിയോടെ പുതിയ വേഗത കൈവരും.ദേശീയപാതകളെ റണ്‍വേകളാക്കി മാറ്റുന്ന സാങ്കേതിക വിദ്യ ഉപയോഗിച്ചാണ് ഇത് നിര്‍മ്മിച്ചിരിക്കുന്നത്. പ്രതിരോധ മന്ത്രാലയവും റോഡ് ഗതാഗത മന്ത്രാലയവും സംയുക്തമായാണ് ഈ പദ്ധതി നടപ്പിലാക്കിയത്.