മരക്കഷ്ണം കളയാതെ മുറിവ് തുന്നിക്കെട്ടി, ശസ്ത്രക്രിയയിലൂടെ പുറത്തെടുത്തത് 5 സെന്റീമീറ്റര്‍ നീളമുള്ള കഷ്ണങ്ങള്‍

2026-03-10

കോഴിക്കോട് ഗവ. മെഡിക്കല്‍ കോളജ് ആശുപത്രിക്ക് നേരെ  ചികിത്സപ്പിഴവ്  ആരോപണം .ബൈക്ക് അപകടത്തില്‍ കോട്ടൂര്‍ ചാത്തോത്ത് സതീശന്റെ  കയ്യില്‍ കുത്തി കയറിയ മരക്കഷ്ണം കളയാതെ മുറിവ് തുന്നിക്കെട്ടിയെന്ന പരാതിയാണ് ഉന്നയിച്ചിരിക്കുന്നത് .

 കോട്ടൂര്‍ - നടുവണ്ണൂര്‍ റോഡില്‍ ബൈക്ക് അപകടത്തില്‍ പെട്ട സതീശന്റെ കയ്യില്‍ റോഡരികില്‍ നിന്ന മരക്കുറ്റി തുളച്ചുകയറിയിരുന്നു . സതീശന്‍ സ്വയം  കയ്യില്‍ നിന്നു മരക്കുറ്റി ഊരിമാറ്റുകയും  മെഡിക്കല്‍ കോളജ് ആശുപത്രിയില്‍ നിന്ന് മുറിവു തുന്നിക്കെട്ടി മരുന്നു നല്‍കി വിടുകയും ചെയ്തു . ഒരാഴ്ച്ച കഴിഞ്ഞ് വീണ്ടും കാണിച്ചപ്പോള്‍ വീടിനടുത്ത ക്ലിനിക്കില്‍നിന്ന് മുറിവ് ഡ്രസു ചെയ്യാന്‍ നിര്‍ദേശിക്കുകയായിരുന്നു.

മുറിവ് ഉണങ്ങാതെ വേദന കൂടിയതോടെ മൊടക്കല്ലൂര്‍ മെഡിക്കല്‍ കോളജ് ആശുപത്രിയില്‍ സ്‌കാന്‍ ചെയ്തപ്പോഴാണ്  മുറിവിനുള്ളില്‍ മരക്കഷ്ണങ്ങള്‍ കണ്ടെത്തിയത് . ഇതിന് ശേഷം  നടത്തിയ ശസ്ത്രക്രിയയില്‍ അഞ്ചു സെന്റീമീറ്ററില്‍ അധികം നീളത്തിലുള്ള മരക്കുറ്റിയുടെ മൂന്നു കഷ്ണങ്ങള്‍ പുറത്തെടുത്തു. കെഎസ്ആര്‍ടിസി ബസില്‍ താല്‍ക്കാലിക ഡ്രൈവറായ സതീശന്‍ മലബാര്‍ മെഡിക്കല്‍ കോളജ് ആശുപത്രിയില്‍ ചികിത്സയിലാണ്.