കാനഡ - മിന്നെസോട്ട കാട്ടുതീ; കനത്ത വായുമലിനീകരണം, ചിക്കാഗോ, ഡെട്രോയിറ്റ്, മിനിയാപൊളിസ് നഗരങ്ങളില്‍ വായുനിലവാരം ഗുരുതരം, ജനങ്ങളോട് വീടുകളില്‍ തന്നെ തുടരാന്‍ കര്‍ശന നിര്‍ദ്ദേശം

2026-07-17

അമേരിക്കയിലെ മിഡ്വെസ്റ്റ്, നോര്‍ത്ത് ഈസ്റ്റ് മേഖലകളില്‍ പടര്‍ന്നുപിടിച്ച കാനഡയിലെയും മിനസോട്ടയിലെയും കാട്ടുതീയില്‍ നിന്നുള്ള കനത്ത പുക വന്‍ വായുമലിനീകരണത്തിന് കാരണമായി. ചിക്കാഗോ, ഡെട്രോയിറ്റ്, മിനിയാപൊളിസ് തുടങ്ങിയ പ്രധാന നഗരങ്ങളിലെ വായുനിലവാരം അതീവ അപകടകരമായ തോതിലേക്ക് താഴ്ന്നതോടെ ജനങ്ങളോട് വീടുകളില്‍ തന്നെ തുടരാന്‍ അധികൃതര്‍ കര്‍ശന നിര്‍ദ്ദേശം നല്‍കിയിട്ടുണ്ട്.

കാനഡയിലെ ഒന്റാറിയോയിലും വടക്കന്‍ മിനസോട്ടയിലുമായി ആഞ്ഞടിക്കുന്ന നൂറിലധികം കാട്ടുതീകളില്‍ നിന്നുള്ള കനത്ത പുകപടലങ്ങളാണ് ശക്തമായ കാറ്റിലൂടെ അമേരിക്കയിലെ വിവിധ സംസ്ഥാനങ്ങളിലേക്ക് പടരുന്നത്. ഈ പ്രദേശങ്ങളില്‍ ചരിത്രത്തിലെ തന്നെ ഏറ്റവും ഉയര്‍ന്ന വായുമലിനീകരണ സൂചികയാണ് കഴിഞ്ഞ ദിവസങ്ങളില്‍ രേഖപ്പെടുത്തിയത്. പല നഗരങ്ങളിലും അന്തരീക്ഷ വായുവില്‍ ശ്വാസകോശത്തെ ദോഷകരമായി ബാധിക്കുന്ന സൂക്ഷ്മകണങ്ങളുടെ അളവ് റെക്കോര്‍ഡ് നിരക്കിലെത്തിയതോടെ കടുത്ത ആരോഗ്യ പ്രതിസന്ധിയാണ് ജനങ്ങള്‍ അഭിമുഖീകരിക്കുന്നത്.

വടക്കേ അമേരിക്കന്‍ വനങ്ങളില്‍ ആവര്‍ത്തിക്കുന്ന കടുത്ത ഉഷ്ണതരംഗവും വരണ്ട കാലാവസ്ഥയുമാണ് നിലവില്‍ കാട്ടുതീ അതിവേഗം പടരുവാന്‍ കാരണമാകുന്നത്. സ്ഥിതിഗതികള്‍ ഗുരുതരമായ പശ്ചാത്തലത്തില്‍ ജനങ്ങള്‍ അത്യാവശ്യ ഘട്ടങ്ങളില്‍ പുറത്തിറങ്ങുമ്പോള്‍ എന്‍-95 മാസ്‌കുകള്‍ ധരിക്കണമെന്നും ഔട്ട്‌ഡോര്‍ പ്രവര്‍ത്തനങ്ങള്‍ പൂര്‍ണ്ണമായും ഒഴിവാക്കണമെന്നും ആരോഗ്യ വിദഗ്ധര്‍ മുന്നറിയിപ്പ് നല്‍കുന്നു. വരും ദിവസങ്ങളിലും ഈ പുകപടലങ്ങള്‍ അന്തരീക്ഷത്തില്‍ തുടരുമെന്നാണ് കാലാവസ്ഥാ നിരീക്ഷണ കേന്ദ്രങ്ങളുടെ വിലയിരുത്തല്‍. ഇന്റര്‍നാഷണല്‍ ഡെസ്‌ക് ഷേക്കിന ന്യൂസ്.