ഡോ. എം.കെ. റാമിനെ ഉടന്‍ പിടികൂടാനാകുമെന്ന് അന്വേഷണ സംഘം, ജാമ്യം നിഷേധിച്ചിട്ടും അറസ്റ്റ് വൈകുന്നതെന്തെന്ന് കോടതി

2026-07-17

കണ്ണൂര്‍ അഞ്ചരക്കണ്ടി ദന്തല്‍ കോളേജ് വിദ്യാര്‍ത്ഥി നിതിന്‍ രാജിന്റെ ആത്മഹത്യയുമായി ബന്ധപ്പെട്ട കേസില്‍ ഒളിവില്‍ കഴിയുന്ന ഒന്നാം പ്രതി ഡോ. എം.കെ. റാമിനെ ഉടന്‍ പിടികൂടാനാകുമെന്ന് അന്വേഷണ സംഘം . പ്രതി ആന്ധ്രാപ്രദേശിലെ ചിറ്റൂരില്‍ ഒളിവില്‍ കഴിയുന്നുണ്ടെന്ന ശക്തമായ വിവരത്തിന്റെ അടിസ്ഥാനത്തില്‍ ക്രൈംബ്രാഞ്ച് സംഘം അവിടെയെത്തി തിരച്ചില്‍ ഊര്‍ജിതമാക്കിയിരിക്കുകയാണ് . 

ഡോ. റാമിന്റെ മുന്‍കൂര്‍ ജാമ്യാപേക്ഷ സുപ്രീം കോടതി പൂര്‍ണ്ണമായും തള്ളിയതോടെയാണ് ഇയാളെ അറസ്റ്റ് ചെയ്യാനുള്ള നീക്കങ്ങള്‍ പോലീസ് ശക്തമാക്കിയത്. ജഡ്ജിമാരായ വിക്രം നാഥ്, സന്ദീപ് മേത്ത എന്നിവരടങ്ങിയ ബെഞ്ചാണ് ജാമ്യാപേക്ഷ നിരസിച്ചത് .സഹപാഠികളുടെ മുന്നില്‍ വെച്ച് വിദ്യാര്‍ത്ഥികളെ മാനസികമായി അധിക്ഷേപിക്കുന്ന അധ്യാപകരുടെ പെരുമാറ്റം ക്രൂരമാണെന്നും അതിന്റെ പ്രത്യാഘാതം അവര്‍ അനുഭവിക്കണമെന്നും സുപ്രീം കോടതി നിരീക്ഷിച്ചിരുന്നു .  പ്രതിയുടെ സഹോദരന്‍ ആന്ധ്രാപ്രദേശിലെ ഒരു പ്രാദേശിക തെലുഗുദേശം പാര്‍ട്ടി  നേതാവാണ്. ഇയാളുടെ രാഷ്ട്രീയ സ്വാധീനവും പ്രാദേശിക നെറ്റ്വര്‍ക്കും  കേരള പോലീസിന് അവിടെ അന്വേഷണം നടത്തുന്നതിന് വലിയ പ്രതിസന്ധികള്‍ നേരിടേണ്ടി വന്നിരുന്നു. കഴിഞ്ഞ മൂന്ന് മാസത്തോളമായി ഡോ. റാം മൊബൈല്‍ ഫോണോ മറ്റ് ആശയവിനിമയ ഉപാധികളോ ഉപയോഗിക്കാതെ ഒളിവില്‍ കഴിയുകയാണ്. എന്നാല്‍ പ്രതി രാജ്യം വിടാതിരിക്കാന്‍ ലുക്കൗട്ട് നോട്ടീസ് അടക്കമുള്ള മുന്‍കരുതലുകള്‍ പോലീസ് സ്വീകരിച്ചിട്ടുണ്ട് . കണ്ണൂര്‍ അഞ്ചരക്കണ്ടി ദന്തല്‍ കോളേജിലെ അനാട്ടമി വിഭാഗം മേധാവിയായിരുന്ന ഡോ. റാം തനിക്കെതിരെ നടത്തിയ തുടര്‍ച്ചയായ മാനസിക പീഡനങ്ങളിലും ജാത്യാധിക്ഷേപത്തിലും മനംനൊന്താണ് നിതിന്‍ രാജ് കഴിഞ്ഞ ഏപ്രില്‍ 10-ന് കോളേജ് കെട്ടിടത്തില്‍ നിന്നും ചാടി ജീവനൊടുക്കിയത് . ഡോ റാമിനെ ഉടന്‍ പിടികൂടാനാകുമെന്നാണ് പോലീസ് പറയുന്നത് . അതെ സമയം പോലീസിനെതിരെ ഹൈക്കോടതി രൂക്ഷ വിമര്‍ശനങ്ങള്‍ ഉയര്‍ത്തി .  സുപ്രീംകോടതി ജാമ്യം നിഷേധിച്ചിട്ടും അറസ്റ്റ് വൈകുന്നതെന്തെന്ന് കോടതി ചോദിക്കുകയും   അതൃപ്തി അറിയിക്കാനും കോടതി നിര്‍ദേശം നല്‍കി .