തന്നെ മാറ്റാന്‍ ബോധപൂര്‍വ്വം ശ്രമം നടക്കുന്നതായി സുധാകരന്‍

2024-05-05

വോട്ടെടുപ്പ് കഴിഞ്ഞിട്ടും കെപിസിസി അധ്യക്ഷസ്ഥാനം തിരിച്ചു നല്‍കാത്തതില്‍ കെ സുധാകരന് അതൃപ്തിയെന്ന് സൂചന. എഐസിസി തീരുമാനം വരുന്നതിനുള്ള സാങ്കേതിക തടസം മാത്രമാണ് ഇതെന്നാണ് നേതാക്കള്‍ വിശദീകരിക്കുന്നത്. അതേ സമയം തന്നെ മാറ്റാന്‍ ബോധപൂര്‍വ്വം ശ്രമം നടക്കുന്നതായുള്ള സംശയമാണ് സുധാകരന്‍ ഉയര്‍ത്തുന്നത്. 

തെരഞ്ഞെടുപ്പ് അവലോകനം ചെയ്യാന്‍ ചേര്‍ന്ന ഇന്നലത്തെ കെപിസിസി യോഗത്തില്‍ കെ. സുധാകരന്‍ വീണ്ടും പ്രസിഡണ്ടാകുമെന്നായിരുന്നു നേരത്തെയുണ്ടായിരുന്ന വിവരം. സുധാകരനെ അനുകൂലിക്കുന്നവര്‍ ഇക്കാര്യം മാധ്യമങ്ങളോടും വ്യക്തമാക്കിയിരുന്നു. പക്ഷെ താല്‍ക്കാലിക പ്രസിഡണ്ട് എംഎം ഹസ്സനോട് തുടരാന്‍ സംസ്ഥാനത്തിന്റെ ചുമതലയുള്ള എഐസിസി ജനറല്‍ സെക്രട്ടരി ദീപാ ദാസ് മുന്‍ഷി നിര്‍ദ്ദേശിച്ചു. ഫലം വരുന്നത് വരെ താല്‍ക്കാലിക ചുമതലെയെന്നാണ് ദീപാദാസിന്റെ വിശദീകരണം. സംഘടനാ ചുമതലയുള്ള കെ സി വേണുഗോപാല്‍ പറഞ്ഞതും ഹൈക്കമാന്‍ഡ് തീരുമാനം വരട്ടെയെന്നാണ്. 

കേരളത്തില്‍ പോളിംഗ് തീര്‍ന്നസാഹചര്യത്തില്‍ സംസ്ഥാന അധ്യക്ഷ സ്ഥാനം തിരികെ നല്‍കാന്‍ ഫലം വരുന്നത് വരെ എന്തിന് കാത്തിരിക്കണമെന്നാണ് സുധാകരന്റെ സംശയം. തീരുമാനം നീളുന്നത് സുധാകരനെ മാറ്റാനുള്ള അവസരമാക്കാനും സംസ്ഥാനത്തെ ഒരു വിഭാഗ നേതാക്കള്‍ ശ്രമിക്കുന്നുണ്ട്. ആരോഗ്യപ്രശ്‌നങ്ങള്‍ മുന്‍നിര്‍ത്തി സുധാകരനെ നീക്കാന്‍ നേരത്തെ ശ്രമമുണ്ടായിരുന്നു. അതിനിടെ താല്‍ക്കാലിക ചുമതലയുള്ള ഹസ്സനെ സ്ഥിരം പ്രസിഡണ്ടാക്കാനും ഒരു വിഭാഗം ശ്രമിക്കുന്നുണ്ട്. പുതിയൊരു അധ്യക്ഷന്‍ വരട്ടെ എന്ന അഭിപ്രായവും ശക്തമാണ്. ഫലം വന്ന ശേഷം സംഘടനയില്‍ വലിയ അഴിച്ചുപണി ഹൈക്കമാന്‍ഡ് ലക്ഷ്യമിടുന്നതായും സൂചനയുണ്ട്. പ്രസിഡണ്ടിന്റെ കാര്യത്തിലെ അനിശ്ചിതത്വം വരും ദിവസങ്ങളില്‍ കൂടുതല്‍ വിവാദമായേക്കുമെന്നാണ് റിപ്പോര്‍ട്ടുകള്‍.