ക്നാനായ സമുദായം സീറോമലബാര്‍ സഭയ്ക്ക് പാഠപുസ്തകമെന്ന് മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍

2024-03-08

ക്നാനായ സമുദായം സീറോമലബാര്‍ സഭയ്ക്ക് പാഠപുസ്തകമെന്ന് മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍. കോട്ടയം അതിരൂപത കൊടുങ്ങല്ലൂരില്‍ സംഘടിപ്പിച്ച ക്നാനായ കുടിയേറ്റ അനുസ്മരണവും ക്നായി തോമാ ദിനാചരണവും ഉദ്ഘാടനം ചെയ്തു പ്രസംഗിക്കുകയായിരുന്നു അഭിവന്ദ്യ പിതാവ്. കോട്ടപ്പുറം കോട്ടയ്ക്ക് സമീപം നിര്‍മിക്കുന്ന ഓര്‍മക്കൂടാരത്തിന്‍റെ അടിസ്ഥാനശില മാര്‍ മാത്യു മൂലക്കാട്ട് ആശീര്‍വദിച്ചു.

ക്നാനായ സമുദായം സീറോമലബാര്‍ സഭയ്ക്ക് പാഠപുസ്തകമാണെന്ന് മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ പ്രസ്താവിച്ചു. ക്നാനായ സമുദായത്തെക്കൂടാതെ സീറോമലബാര്‍ സഭ അപൂര്‍ണമാണെന്നും ഇതിന്‍റെ കെട്ടുറപ്പും തനിമയും സഭയ്ക്കു മാത്രമല്ല, പൊതുസമൂഹത്തിനു തന്നെ മാതൃകയാണെന്നും മാര്‍ തട്ടില്‍ കൂട്ടിച്ചേര്‍ത്തു. കോട്ടയം അതിരൂപത കൊടുങ്ങല്ലൂരില്‍ സംഘടിപ്പിച്ച ക്നാനായ കുടിയേറ്റ അനുസ്മരണവും ക്നായി തോമാ ദിനാചരണവും ഉദ്ഘാടനം ചെയ്തു പ്രസംഗിക്കുകയായിരുന്നു അഭിവന്ദ്യ പിതാവ്. 

ആര്‍ച്ച്ബിഷപ് മാര്‍ മാത്യു മൂലക്കാട്ടിന്‍റെ അദ്ധ്യക്ഷതയില്‍ മാര്‍ പോളി കണ്ണൂക്കാടന്‍, മാര്‍ ജോസഫ് പണ്ടാരശേരില്‍, ഗീവര്‍ഗീസ് മാര്‍ അപ്രേം എന്നിവര്‍ സന്ദേശങ്ങള്‍ നല്‍കി. വികാരി ജനറാള്‍ ഫാ. മൈക്കിള്‍ വെട്ടിക്കാട്ട്, കെസിസി പ്രസിഡന്‍റ് ബാബു പറമ്പടത്തുമലയില്‍, പ്രിസ്ബിറ്ററല്‍ കൗണ്‍സില്‍ സെക്രട്ടറി ഫാ. ഏബ്രാഹം പറമ്പേട്ട്, വിസിറ്റേഷന്‍ കോണ്‍ഗ്രിഗേഷന്‍ മദര്‍ ജനറല്‍ സിസ്റ്റര്‍ കരുണ എസിഎം, പാസ്റ്ററല്‍ കൗണ്‍സില്‍ അല്‍മായ സെക്രട്ടറി ബിനോയി ഇടയാടിയില്‍, കെസിഡബ്ല്യുഎ പ്രസിഡന്‍റ്റ് ഷൈനി ചൊള്ളമ്പേല്‍, കെസിവൈഎല്‍ പ്രസിഡന്‍റ് ജോണിസ് പി. സ്റ്റീഫന്‍ തുടങ്ങിയവര്‍ പ്രസംഗിച്ചു. അതിരൂപതാ സംഘടനകളുടെ വര്‍ക്കിംഗ് കമ്മിറ്റി അംഗങ്ങള്‍ രാവിലെ കോട്ടപ്പുറം കോട്ടയിലെത്തി പൂര്‍വിക അനുസ്മരണ പ്രാര്‍ഥന നടത്തി. ക്നായി തോമാഭവനില്‍ കെസിസി പ്രസിഡന്‍റ് പതാക ഉയര്‍ത്തി. കോട്ടപ്പുറം ഹോളി ഫാമിലി ദൈവാലയത്തില്‍ മാര്‍ മാത്യു മൂലക്കാട്ടിന്‍റെ മുഖ്യകാര്‍മികത്വത്തില്‍ കൃതജ്ഞതാബലി അര്‍പ്പിച്ചു. കോട്ടപ്പുറം കോട്ടയ്ക്ക് സമീപം നിര്‍മിക്കുന്ന ഓര്‍മക്കൂടാരത്തിന്‍റെ അടിസ്ഥാനശില മാര്‍ മാത്യു മൂലക്കാട്ട് ആശീര്‍വദിച്ചു.