സൗമ്യ വിശ്വനാഥന്‍ കൊലക്കേസ് അമ്മ സുപ്രീം കോടതിയെ സമീപിച്ചു

2024-04-20

മാധ്യമ പ്രവര്‍ത്തക സൗമ്യ വിശ്വനാഥന്റ കൊലപാതകത്തില്‍ പ്രതികളുടെ ശിക്ഷ സ്റ്റേ ചെയ്ത് ജാമ്യം നല്‍കിയതിനെതിരെ സൗമ്യയുടെ അമ്മ സുപ്രീം കോടതിയെ സമീപിച്ചു. കേസിലെ നാല് പ്രതികള്‍ നല്‍കിയ അപ്പീല്‍ പരിഗണിച്ചാണ് ദില്ലി ഹൈക്കോടതി ശിക്ഷാ വിധി സ്റ്റേ ചെയ്തത്. 

വിചാരണക്കോടതി പ്രതികള്‍ക്ക് ജീവപര്യന്തം ശിക്ഷ വിധിച്ചിരുന്നു. ഇതിനെതിരെയായിരുന്നു പ്രതികള്‍  അപ്പീല്‍ നല്‍കിയത്. സൗമ്യയുടെ അമ്മ നല്‍കിയ അപ്പീല്‍ തിങ്കളാഴ്ച്ച സുപ്രീംകോടതി പരിഗണിക്കും. അഭിഭാഷക മാലിനി പൊതുവാളാണ് സൗമ്യയുടെ അമ്മയ്ക്കായി അപ്പീല്‍ സമര്‍പ്പിച്ചത്. 2008 സെപ്റ്റംബര്‍ 30 നാണ് ഹെഡ് ലെയിന്‍സ് ടുഡേയിലെ രാത്രി ഷിഫ്റ്റ് ജോലി കഴിഞ്ഞ് പതിവു പോലെ കാറില്‍ വസന്ത് കുഞ്ചിലെ വീട്ടിലേക്ക് മടങ്ങുകയായിരുന്ന  മാധ്യമ പ്രവര്‍ത്തക സൗമ്യ വിശ്വനാഥ് കൊല്ലപ്പെട്ടത്. നെല്‍സണ്‍ മണ്‍ഡേല റോഡില്‍ വെച്ച് മോഷ്ടാക്കള്‍ സൗമ്യയെ തടഞ്ഞു. രക്ഷപ്പെടാന്‍ ശ്രമിക്കുന്നതിനിടെ സൗമ്യക്ക് വെടിയേല്‍ക്കുകയായിരുന്നു. 2009ല്‍  രവി കപൂര്‍, ബല്‍ജീത് സിംഗ്, അമിത് ശുക്ല, അജയ് കുമാര്‍, അജയ് സേത്തി എന്നിങ്ങനെ 5 പ്രതികള്‍ അറസ്റ്റിലായി. അതേസമയം ഒന്നാം പ്രതി രവി കപൂര്‍, രണ്ടാം പ്രതി അമിത് ശുക്ല, മൂന്നാം പ്രതി ബല്‍ജീത് മാലിക്ക്, നാലാം പ്രതി അജയ് കുമാര്‍ എന്നിവര്‍ക്ക് വിചാരണക്കോടതി ജീവപര്യന്തം തടവ് ശിക്ഷയും പിഴയും വിധിച്ചിരുന്നു.