കെജ്രിവാളിനെ വധിക്കാന്‍ ഗൂഢാലോചന നടക്കുന്നു

2024-04-21

മദ്യനയ കേസില്‍ അറസ്റ്റിലായ ദില്ലി മുഖ്യമന്ത്രി അരവിന്ദ് കെജ്രിവാളിനെ ജയിലില്‍ വച്ച് കൊല്ലാന്‍ കേന്ദ്രസര്‍ക്കാര്‍ ഗൂഢാലോചന നടത്തുന്നുവെന്ന ആരോപണം ആവര്‍ത്തിച്ച് ആം ആദ്മി പാര്‍ട്ടി. ദില്ലി മന്ത്രിയും ആം ആദ്മി പാര്‍ട്ടി നേതാവുമായ സൗരഭ് ഭരദ്വാജ് ആണ് ആരോപണം ഉന്നയിച്ചത്. ജയിലില്‍ കെജ്രിവാളിന് ഇന്‍സുലിന്‍ നല്‍കുന്നില്ലെന്നും, വധിക്കാന്‍ ശ്രമിക്കുകയാണെന്നും ഭാര്യ സുനിതയും ആരോപണം ഉന്നയിച്ചു. 

രണ്ട് ദിവസം മുമ്പ് ഇതേ വിഷയം ആം ആദ്മി പാര്‍ട്ടി നേതാവും മന്ത്രിയുമായ അതിഷി മര്‍ലേനയും പത്രസമ്മേളനത്തില്‍ പറഞ്ഞിരുന്നു. ഗുരുതരമായി പ്രമേഹം ബാധിച്ചിട്ടുള്ള കെജ്രിവാളിന് ജയിലില്‍ ഇന്‍സുലിന്‍ നല്‍കുന്നില്ലെന്നും കൊല്ലാനുള്ള ഗൂഢാലോചനയാണിതെന്നുമായിരുന്നു അതിഷി മര്‍ലേനയുടെ ആരോപണം. 

ഇതേ ആരോപണവുമായാണ് ഇപ്പോള്‍ സൗരഭ് ഭരദ്വാജും രംഗത്ത് എത്തിയിരിക്കുന്നത്. കെജ്രിവാളിന് കുഴപ്പമൊന്നുമില്ല, ഇന്‍സുലിന്റെ ആവശ്യമില്ല എന്ന് തിഹാര്‍ ജയില്‍ അധികൃതര്‍ പറയുന്നു, ഇങ്ങനെ ചികിത്സ നിഷേധിച്ച് കെജ്രിവാളിനെ ഇല്ലാതാക്കാനാണ് ശ്രമം, ഇന്നലെ വരെ എല്ലാ സൗകര്യങ്ങളും ജയിലിലുണ്ടെന്ന് പറഞ്ഞ അധികൃതര്‍ ഇന്നലെ പ്രമേഹരോഗ വിദഗ്ധന്റെ സഹായം തേടി എയിംസ് ആശുപത്രിയിലേക്ക് കത്തയച്ചിട്ടുണ്ടെന്നും സൗരഭ് ഭരദ്വാജ് ആരോപിച്ചു. അതേസമയം ഇന്‍സുലിന്‍ എടുക്കുന്നത് ജയിലില്‍ എത്തുന്നതിനു മുന്‍പ് തന്നെ കെജ്രിവാള്‍ അവസാനിപ്പിച്ചിരുന്നെന്നും, പ്രമേഘം ചൂണ്ടിക്കാട്ടി ജാമ്യം നേടാനാണ് കെജ്രിവാള്‍ ശ്രമിക്കുന്നതെന്നും ഇ ഡി ആരോപിച്ചു.