ലഹരിക്കെതിരായ പോരാട്ടത്തിന് നിരന്തര ഇടപെടല്‍ അനിവാര്യം

2024-11-20

ലഹരിക്കെതിരായ പോരാട്ടത്തിന് നിരന്തര ഇടപെടല്‍ അനിവാര്യമാണെന്ന് എറണാകുളം ജില്ലാ കളക്ടര്‍ എന്‍. എസ്.കെ. ഉമേഷ്. കേന്ദ്ര സര്‍ക്കാര്‍ പദ്ധതിയായ നശാ മുക്ത് ഭാരത് അഭിയാന്റെ ജില്ലാതല പ്രവര്‍ത്തനം സംബന്ധിച്ച് പ്രധാന സന്നദ്ധ പ്രവര്‍ത്തകര്‍ക്കായി സംഘടിപ്പിച്ച ഏകദിന പരിശീലന പരിപാടി ഉദ്ഘാടനം ചെയ്യുകയായിരുന്നു അദ്ദേഹം.

സാമൂഹ്യനീതി വകുപ്പിന്റെ നേതൃത്വത്തില്‍ ലഹരിക്കെതിരെ പൊതുജനങ്ങള്‍ക്കിടയില്‍ ബോധവല്‍ക്കരണ പരിപാടികള്‍ സംഘടിപ്പിക്കുക എന്ന ലക്ഷ്യത്തോടെയാണ് കേന്ദ്ര സര്‍ക്കാര്‍ പദ്ധതിയായ നശാ മുക്ത് ഭാരത് അഭിയാന്‍ നടപ്പിലാക്കുന്നത്. സാങ്കേതിക വിദ്യയുടെ വളര്‍ച്ചയ്‌ക്കൊപ്പം സാമൂഹ്യ തിന്മകളും വളരുന്ന കാലഘട്ടത്തില്‍ ലഹരിക്കെതിരായ പോരാട്ടത്തിന് നിരന്തര ഇടപെടല്‍ അനിവാര്യമാണെന്ന് ജില്ലാ കളക്ടര്‍ എന്‍. എസ്.കെ. ഉമേഷ് പറഞ്ഞു. മദ്യത്തിന്റെയും ലഹരി മരുന്നുകളുടെയും ഉപയോഗവുമായി ബന്ധപ്പെട്ട് ജില്ലയില്‍ നിരവധി ഹോട്ട് സ്‌പോട്ടുകളുണ്ട്. ലഹരി വ്യാപനവും അഡിക്ഷനും നിയന്ത്രിക്കുന്നതില്‍ സന്നദ്ധ പ്രവര്‍ത്തകരുടെ പങ്ക് വലുതാണ്. തുടര്‍ച്ചയായതും ആഴത്തിലുമുള്ള ബോധവത്കരണം നടത്തണം. വിദ്യാര്‍ഥികളെ ബഹുമുഖ വ്യക്തിത്വങ്ങളായി വളര്‍ത്തണം. വായന, സംഗീതം, കല, സാഹിത്യം, കായികം തുടങ്ങിയ മേഖലകളില്‍ സജീവമാക്കണം. ലഹരിക്കടിപ്പെട്ടവരുടെ സാഹചര്യങ്ങള്‍ മനസിലാക്കി സഹിഷ്ണുതയോടെയും അനുതാപത്തോടെയും ഇടപെടണമെന്നും നിരവധി ജീവിതങ്ങളെ മാറ്റിമറിക്കാന്‍ കഴിയുന്ന സേനയാണ് സന്നദ്ധ പ്രവര്‍ത്തകരെന്നും അദ്ദേഹം പറഞ്ഞു. 

സിവില്‍ സ്റ്റേഷന്‍ ആസൂത്രണ സമിതി ഹാളില്‍ സംഘടിപ്പിച്ച പരിപാടിയില്‍ ജില്ലാ സാമൂഹ്യ നീതി ഓഫീസര്‍ വി.ജെ. ബിനോയ് അധ്യക്ഷത വഹിച്ചു. സ്റ്റേറ്റ് ലെവല്‍ കോ -ഓഡിനേറ്റിംഗ് ഏജന്‍സി കോ-ഓഡിനേറ്റര്‍ ഫാ. ജിന്‍സ് മുഖ്യസന്ദേശം നല്‍കി. എസ് എല്‍ സി എ ട്രെയിനിംഗ് കോ - ഓഡിനേറ്റര്‍ ടി.എം. മാത്യു, നശാ മുക്ത് ഭാരത് അഭിയാന്‍ കോ- ഓഡിനേറ്റര്‍ ഫ്രാന്‍സിസ് മൂത്തേടന്‍ എന്നിവര്‍ സെഷനുകള്‍ നയിച്ചു. രാജഗിരി കോളേജ് സോഷ്യല്‍ വര്‍ക്ക് വിഭാഗം അസിസ്റ്റന്റ് പ്രൊഫസര്‍ ഡോ. കെ. ആര്‍. അനീഷ്, കേരള അസോസിയേഷന്‍ ഓഫ് പ്രൊഫഷണല്‍ സോഷ്യല്‍ വര്‍ക്കേഴ്‌സ് പ്രസിഡന്റ് ഫാ. സോജന്‍ പി. ജോസഫ്, സീനിയര്‍ സൂപ്രണ്ട് സിനോ സേവി തുടങ്ങിയവര്‍ പങ്കെടുത്തു