സാധാരണ ഉഷ്ണതരംഗങ്ങളല്ല, ഭൂഖണ്ഡങ്ങളിലാകെ വ്യാപിക്കുന്ന ഭീമന്‍ ഹീറ്റ് സ്റ്റോമുകള്‍, ആഗോളതാപനത്തിന്റെ പുതിയ ഭീഷണി വെളിപ്പെടുത്തി പഠനം

2026-10-21

ലോകത്തിന്റെ വിവിധ ഭാഗങ്ങളില്‍ അതിശക്തമായ ഉഷ്ണതരംഗങ്ങള്‍ വ്യാപകമാകുന്നതായി പുതിയ പഠനം. ഒരേസമയം വിശാലമായ ഭൂപ്രദേശങ്ങളെ ബാധിക്കുന്ന അസാധാരണ താപപ്രതിഭാസങ്ങള്‍ മനുഷ്യജീവിതത്തിനും ഭക്ഷ്യസുരക്ഷയ്ക്കും ഗുരുതര ഭീഷണിയുയര്‍ത്തുകയാണ്. പതിറ്റാണ്ടുകളിലെ കാലാവസ്ഥാ വിവരങ്ങള്‍ വിശകലനം ചെയ്ത് റോയിട്ടേഴ്‌സ് പുറത്തുവിട്ട പ്രത്യേക റിപ്പോര്‍ട്ടിലാണ് ഹീറ്റ് സ്റ്റോമുകള്‍ എന്നറിയപ്പെടുന്ന ഭീമന്‍ ഉഷ്ണതരംഗങ്ങളുടെ അപകടസാധ്യത വിശദീകരിക്കുന്നത്.

ഭൂമിയെ വിഴുങ്ങുന്ന ഭീമന്‍ ഉഷ്ണതരംഗങ്ങള്‍. ദിവസങ്ങളോ ആഴ്ചകളോ മാത്രമല്ല, മാസങ്ങളോളം നീണ്ടുനില്‍ക്കുന്ന അത്യുഷ്ണ പ്രതിഭാസങ്ങള്‍. ആഗോളതാപനത്തിന്റെ ഭീതിജനകമായ പുതിയ ചിത്രം വെളിപ്പെടുത്തുകയാണ് റോയിട്ടേഴ്‌സിന്റെ പ്രത്യേക അന്വേഷണ റിപ്പോര്‍ട്ട്.

1960 മുതല്‍ ലോകത്തിന്റെ വിവിധ ഭാഗങ്ങളില്‍ രേഖപ്പെടുത്തിയ ഓരോ മണിക്കൂറിലെയും താപനില വിവരങ്ങള്‍ വിശകലനം ചെയ്താണ് റിപ്പോര്‍ട്ട് തയ്യാറാക്കിയത്. ഇരുപതിലധികം കാലാവസ്ഥാ വിദഗ്ധരുടെ സഹായത്തോടെ നടത്തിയ പഠനത്തില്‍ അസാധാരണമായ വലുപ്പത്തില്‍ വ്യാപിക്കുന്ന ഉഷ്ണതരംഗങ്ങളെ ഹീറ്റ് സ്റ്റോമുകള്‍ എന്നാണ് വിശേഷിപ്പിക്കുന്നത്.

ഭൂമിയുടെ ഉപരിതലത്തിന്റെ കുറഞ്ഞത് ഒരു ശതമാനമെങ്കിലും ഒരേസമയം ബാധിക്കുന്ന അതിവിശാലമായ ഉഷ്ണതരംഗങ്ങളെയാണ് ഈ വിഭാഗത്തില്‍ ഉള്‍പ്പെടുത്തിയിരിക്കുന്നത് 

1960-കളില്‍ പ്രതിവര്‍ഷം ശരാശരി അഞ്ച് ഹീറ്റ് സ്റ്റോമുകളാണ് ഉണ്ടായിരുന്നതെങ്കില്‍ ഈ ദശകത്തില്‍ അത് 102 ആയി ഉയര്‍ന്നു. ഏകദേശം ഇരുപത് മടങ്ങ് വര്‍ധന.

വെറ എന്ന പേരില്‍ റോയിട്ടേഴ്‌സ് തിരിച്ചറിഞ്ഞ ഭീമന്‍ ഉഷ്ണതരംഗം 367 ദിവസം നീണ്ടുനിന്നു. അതിന്റെ സഞ്ചാരത്തിനിടയില്‍ ഭൂമിയുടെ ഏകദേശം 85 ശതമാനം പ്രദേശങ്ങളെയും അത് ബാധിച്ചു.

യൂറോപ്പില്‍ അതിശക്തമായ ചൂടില്‍ ആയിരക്കണക്കിന് അധിക മരണങ്ങള്‍ റിപ്പോര്‍ട്ട് ചെയ്യപ്പെട്ടു. ഫിലിപ്പീന്‍സില്‍ കടുത്ത ചൂട് വിദ്യാര്‍ഥികളുടെ ആരോഗ്യത്തെ ബാധിച്ചു. ഐവറി കോസ്റ്റില്‍ കാര്‍ഷികവിളകള്‍ നശിച്ചു. ബ്രസീലില്‍ അസാധാരണമായ ചൂടിനൊപ്പം ഡോള്‍ഫിനുകളുടെ കൂട്ടമരണവും സംഭവിച്ചു.

ആഗോളതാപനവും അന്തരീക്ഷത്തിലെ ഹരിതഗൃഹ വാതകങ്ങളുടെ വര്‍ധനയും ഇത്തരം ഉഷ്ണതരംഗങ്ങളുടെ വ്യാപനത്തിന് പ്രധാന കാരണങ്ങളാണ്. എല്‍നിനോ പ്രതിഭാസവും ചില ഘട്ടങ്ങളില്‍ ചൂടിന്റെ തീവ്രത വര്‍ധിപ്പിക്കുന്നു.

കഴിഞ്ഞ പതിനെട്ട് വര്‍ഷത്തിലേറെയായി ഭൂമിയില്‍ എവിടെയെങ്കിലും ഒരു ഹീറ്റ് സ്റ്റോമെങ്കിലും തുടര്‍ച്ചയായി സജീവമായിരുന്നുവെന്ന കണ്ടെത്തലും റിപ്പോര്‍ട്ടിലുണ്ട്.

അതിശക്തമായ ചൂട് മനുഷ്യാരോഗ്യത്തെ മാത്രമല്ല, ഭക്ഷ്യോല്‍പ്പാദനം, ജലലഭ്യത, സമ്പദ്വ്യവസ്ഥ, ജൈവവൈവിധ്യം എന്നിവയെയും ഗുരുതരമായി ബാധിക്കുകയാണ്.

കാലാവസ്ഥാ വ്യതിയാനം ഭാവിയില്‍ സംഭവിക്കാനിരിക്കുന്ന ഒരു ദുരന്തം മാത്രമല്ല, ഭൂമിയുടെ വിവിധ ഭാഗങ്ങളില്‍ ഇതിനകം അനുഭവപ്പെടുന്ന യാഥാര്‍ഥ്യമാണെന്ന മുന്നറിയിപ്പാണ് റോയിട്ടേഴ്‌സിന്റെ അന്വേഷണം നല്‍കുന്നത്.