അശുതോഷിന്റെയും സൗരവിന്റെയും ജാമ്യഹര്‍ജി ഇന്ന് പരിഗണിച്ചേക്കും, സിജെപി നേതാക്കളെ മജിസ്ട്രേറ്റിന് മുമ്പാകെ ഹാജരാക്കും

2026-10-21

ദില്ലിയിലെ ജന്തര്‍മന്തറില്‍ മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ട് നടത്തിയ പ്രതിഷേധത്തിനിടെ അറസ്റ്റിലായ സിജെപി നേതാക്കളുടെ ജാമ്യ ഹര്‍ജി ഡല്‍ഹി ഹൈക്കോടതി ഇന്ന് പരിഗണിച്ചേക്കും. ആശുതോഷ് റാംഗ, സൗരവ് ദാസ് എന്നിവരുടെ ജാമ്യ ഹര്‍ജിയാണ് കോടതിയുടെ പരിഗണനയിലുള്ളത്.കസ്റ്റഡി കാലാവധി അവസാനിക്കുന്നതിനാല്‍ ഇരുവരെയും ഇന്ന് ഡല്‍ഹി സ്പെഷല്‍ എക്സിക്യൂട്ടീവ് മജിസ്ട്രേറ്റിന് മുമ്പാകെ ഹാജരാക്കും.

മുഖ്യതെരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ട് ജന്തര്‍മന്തറില്‍ പ്രതിഷേധിച്ച സിജെപി നേതാക്കളുടെ ജാമ്യ ഹര്‍ജി ഡല്‍ഹി ഹൈക്കോടതി ഇന്ന് പരിഗണിച്ചേക്കും. അടിയന്തരമായി ഹര്‍ജി പരിഗണിക്കണമെന്ന ആവശ്യം ഹൈക്കോടതി ഇന്നലെ തള്ളിയിരുന്നു. കസ്റ്റഡി കാലാവധി തീരുന്നതിനാല്‍ ആശുതോഷ് രങ്ക, സൗരവ് ദാസ് എന്നീ സിജെപി നേതാക്കളെ ഇന്ന് ഡല്‍ഹി സ്പെഷ്യല്‍ എക്സിക്യൂട്ടീവ് മജിസ്ട്രേറ്റിന് മുമ്പാകെ ഹാജരാക്കും.രണ്ട് ദിവസത്തേക്ക് കൂടി കസ്റ്റഡി നീട്ടിയ സ്പെഷ്യല്‍ എക്സിക്യൂട്ടീവ് മജിസ്ട്രേറ്റിന്റെ നടപടിക്കെതിരെയാണ് സിജെപി ഹൈക്കോടതിയെ സമീപിച്ചത്. അഞ്ച് ദിവസത്തെ കസ്റ്റഡി കാലാവധിക്ക് ശേഷമാണ് ഇരുവരെയും മന്ദിര്‍ മാര്‍ഗിലെ സ്പെഷ്യല്‍ എക്സിക്യൂട്ടീവ് മജിസ്ട്രേറ്റിന് മുന്നില്‍ ഹാജരാക്കിയത്. മൂന്നര മണിക്കൂറോളം നീണ്ട നടപടികള്‍ക്കൊടുവിലാണ് കസ്റ്റഡി രണ്ട് ദിവസം കൂടി നീട്ടിനല്‍കിയത്. മജിസ്ട്രേറ്റിന്റെ ഈ നടപടി നിയമവ്യവസ്ഥയുടെ ദുരുപയോഗമാണെന്ന് സിജെപി നിയമവിഭാഗം മേധാവി രത്ന സിംഗ് ആരോപിച്ചു.അതിനിടെ, ജന്തര്‍ മന്തര്‍ പ്രതിഷേധത്തില്‍ നേതാക്കള്‍ക്ക് ജാമ്യം നിഷേധിച്ചതിനൊപ്പം ക്രൈംബ്രാഞ്ച് അന്വേഷണം കൂടി പ്രഖ്യാപിച്ചതോടെ, പ്രതിഷേധത്തില്‍ നിന്ന് താല്‍ക്കാലികമായി പിന്‍വാങ്ങുന്നതായി സിജെപി സ്ഥാപകന്‍ അഭിജീത് ദീപ്കെ വ്യക്തമാക്കി. ഉത്സവകാലത്ത് പ്രതിഷേധ രംഗത്തുള്ളവര്‍ കുടുംബത്തോടൊപ്പം ചെലവഴിക്കണമെന്നാണ് അദ്ദേഹം സമൂഹമാധ്യമത്തിലൂടെ ആവശ്യപ്പെട്ടത്. ഒരു വര്‍ഷത്തേക്ക് പൊതു സമാധാനത്തെ ബാധിക്കുന്ന ഒരു പ്രവര്‍ത്തിയിലും ഇടപെടാന്‍ പാടില്ലെന്ന പീസ് ബോണ്ടിന്റെ അടിസ്ഥാനത്തിലാണ് ദീപ്കെയെ നേരത്തെ ജാമ്യത്തില്‍ വിട്ടയച്ചിരുന്നത്.