മത്സ്യ മാംസാഹാരങ്ങള്‍ പൂര്‍ണ്ണമായി ഒഴിവാക്കേണ്ട വിശദീകരണവുമായി ലോക്ഭവന്‍

2026-10-24

ഗവര്‍ണറുടെ ഭക്ഷണരീതിയുമായി ബന്ധപ്പെട്ട വിവാദത്തില്‍ വിശദീകരണവുമായി ലോക്ഭവന്‍. ഗവര്‍ണര്‍ ഓം പ്രകാശ് മാഥൂറിനുള്ള ഭക്ഷണം തയ്യാറാക്കുന്ന അടുക്കളയില്‍ മാത്രമാണ് സസ്യാഹാരം നിര്‍ബന്ധമാക്കിയിട്ടുള്ളത്. ലോക്ഭവനിലെ ജീവനക്കാര്‍ക്ക് മാംസാഹാരം കഴിക്കുന്നതിനോ പുറത്തുനിന്ന് ഭക്ഷണം കൊണ്ടുവരുന്നതിനോ വിലക്കില്ലെന്ന് അധികൃതര്‍ വ്യക്തമാക്കി.

ഗവര്‍ണറുടെ അടുക്കളയില്‍ മാത്രമാണ് സസ്യാഹാരം പാകം ചെയ്യുന്നതെന്നും ജീവനക്കാര്‍ക്ക് മാംസാഹാരം കഴിക്കുന്നതിന് യാതൊരു വിലക്കുമില്ലെന്നും ലോക്ഭവന്‍ വ്യക്തമാക്കി. ഗവര്‍ണര്‍ ഓം പ്രകാശ് മാഥൂര്‍ പൂര്‍ണ സസ്യാഹാരിയായതിനാല്‍ അദ്ദേഹത്തിനും കുടുംബാംഗങ്ങള്‍ക്കും അതിഥികള്‍ക്കുമായി ഭക്ഷണം തയ്യാറാക്കുന്ന അടുക്കളയില്‍ സസ്യാഹാരം മാത്രം പാകം ചെയ്യാനാണ് നിര്‍ദേശിച്ചിട്ടുള്ളത്. ഗവര്‍ണറുടെ വ്യക്തിപരമായ ഭക്ഷണരീതിയെ ജീവനക്കാരുടെ ഭക്ഷണശീലങ്ങളുമായി കൂട്ടിക്കുഴയ്‌ക്കേണ്ടതില്ലെന്നും ലോക്ഭവന്‍ വിശദീകരിച്ചു.

ജീവനക്കാര്‍ക്ക് പുറത്തുനിന്ന് മാംസാഹാരം കൊണ്ടുവരുന്നതിനോ വീട്ടില്‍നിന്ന് ഭക്ഷണം കൊണ്ടുവന്ന് കഴിക്കുന്നതിനോ വിലക്കില്ല. ലോക്ഭവനില്‍ മാംസാഹാരം പൂര്‍ണമായി നിരോധിച്ചെന്ന തരത്തില്‍ പ്രചരിക്കുന്ന വാര്‍ത്തകള്‍ ശരിയല്ലെന്നും ഗവര്‍ണറുടെ അഡീഷണല്‍ പ്രൈവറ്റ് സെക്രട്ടറി ശ്രീകുമാര്‍ വ്യക്തമാക്കി.

അതേസമയം, ലോക്ഭവനിലെ ഭക്ഷണരീതിയുമായി ബന്ധപ്പെട്ട നിര്‍ദേശം നേരത്തേ രാഷ്ട്രീയ വിവാദത്തിന് വഴിവെച്ചിരുന്നു. ഭക്ഷണം തിരഞ്ഞെടുക്കുന്നത് വ്യക്തിസ്വാതന്ത്ര്യത്തിന്റെ ഭാഗമാണെന്ന നിലപാടുമായി കോണ്‍ഗ്രസ്, സി.പി.എം നേതാക്കള്‍ വിമര്‍ശനം ഉന്നയിച്ചിരുന്നു. ഇതിന് പിന്നാലെയാണ് ലോക്ഭവന്റെ വിശദീകരണം പുറത്തുവന്നത്.