അര്‍ണബ് ചുഴലിക്കാറ്റ് ശക്തിപ്രാപിച്ചു, ആന്ധ്രപ്രദേശിലും ഒഡീഷയിലും ജാഗ്രതാ നിര്‍ദേശം

2026-10-27

ബംഗാള്‍ ഉള്‍ക്കടലില്‍ രൂപംകൊണ്ട അര്‍ണബ് ചുഴലിക്കാറ്റ് ശക്തിപ്രാപിച്ച് അതിതീവ്ര ചുഴലിക്കാറ്റായി മാറിയതോടെ ആന്ധ്രപ്രദേശിലും ഒഡീഷയിലും ജാഗ്രതാ നിര്‍ദേശം. മണിക്കൂറില്‍ 115 മുതല്‍ 125 കിലോമീറ്റര്‍ വരെ വേഗത്തില്‍ കാറ്റ് വീശാന്‍ സാധ്യതയുണ്ടെന്നാണ് കാലാവസ്ഥാ വകുപ്പിന്റെ മുന്നറിയിപ്പ്. കാറ്റിന്റെ വേഗം മണിക്കൂറില്‍ 140 കിലോമീറ്റര്‍ വരെയും ഉയര്‍ന്നേക്കാം.

അര്‍ണബ് ചുഴലിക്കാറ്റ് ഒക്ടോബര്‍ 28-ന് രാവിലെ ബാപട്ലക്കും വിശാഖപട്ടണത്തിനും ഇടയില്‍ യാനം തീരത്തിന് സമീപം കര തൊടുമെന്നാണ് പ്രവചനം. തീരദേശ മേഖലകളില്‍ അതിശക്തമായ മഴയ്ക്കും കാറ്റിനും സാധ്യതയുള്ളതിനാല്‍ അധികൃതര്‍ മുന്‍കരുതല്‍ നടപടികള്‍ ശക്തമാക്കിയിട്ടുണ്ട്. ചുഴലിക്കാറ്റിന്റെ പശ്ചാത്തലത്തില്‍ ആന്ധ്രപ്രദേശിലെ 20 ജില്ലകളിലായി ദുരിതാശ്വാസ പ്രവര്‍ത്തനങ്ങള്‍ക്കായി 27 കോടി രൂപ സര്‍ക്കാര്‍ അനുവദിച്ചിട്ടുണ്ട്. വെള്ളപ്പൊക്ക സാധ്യതയുള്ള പ്രദേശങ്ങളില്‍നിന്ന് ജനങ്ങളെ മാറ്റിപ്പാര്‍പ്പിക്കാനും നിര്‍ദേശം നല്‍കിയിട്ടുണ്ട്.  ഒഡീഷയിലും മുന്‍കരുതല്‍ നടപടികള്‍ ശക്തമാണ്. അപകടസാധ്യതയുള്ള പ്രദേശങ്ങളിലെ വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചു. മത്സ്യത്തൊഴിലാളികള്‍ കടലില്‍ പോകരുതെന്നും നിര്‍ദേശം നല്‍കിയിട്ടുണ്ട്. ചുഴലിക്കാറ്റിനെ തുടര്‍ന്ന് ഒക്ടോബര്‍ 27, 28 തീയതികളില്‍ സര്‍വീസ് നടത്തേണ്ടിയിരുന്ന 53 ട്രെയിനുകള്‍ റദ്ദാക്കി.