കരയിലേക്ക് കയറിവരുന്ന കടല്‍. ഭീഷണിയിലാകുന്ന തീരദേശ ജീവിതങ്ങള്‍.

2026-11-13

ലോകത്തെ തീരദേശങ്ങള്‍ക്ക് ആശങ്കയായി സമുദ്രനിരപ്പ് റെക്കോര്‍ഡ് ഉയരത്തില്‍. ആഗോള ശരാശരി സമുദ്രനിരപ്പ് ചരിത്രത്തിലെ ഏറ്റവും ഉയര്‍ന്ന നിലയിലെത്തിയതായി ലോക കാലാവസ്ഥാ സംഘടനയുടെ പുതിയ റിപ്പോര്‍ട്ട്. തുര്‍ക്കിയില്‍ നടക്കുന്ന ഐക്യരാഷ്ട്രസഭയുടെ കാലാവസ്ഥാ ഉച്ചകോടിയിലാണ് മുന്നറിയിപ്പ് പുറത്തുവന്നത്. കേരളമുള്‍പ്പെടെയുള്ള തീരദേശങ്ങള്‍ക്ക് ഈ മാറ്റം ഉയര്‍ത്തുന്ന വെല്ലുവിളികള്‍ ചെറുതല്ല.

ലോകത്തിന്റെ സമുദ്രനിരപ്പ് വീണ്ടും റെക്കോര്‍ഡ് ഉയരത്തില്‍. തുര്‍ക്കിയിലെ അന്റാലിയയില്‍ നടക്കുന്ന മുപ്പത്തിയൊന്നാമത് ആഗോള കാലാവസ്ഥാ ഉച്ചകോടിയില്‍ ലോക കാലാവസ്ഥാ സംഘടന പുറത്തുവിട്ട റിപ്പോര്‍ട്ടിലാണ് ആശങ്കപ്പെടുത്തുന്ന വിവരങ്ങള്‍. 1993-ല്‍ ഉപഗ്രഹങ്ങളിലൂടെ സമുദ്രനിരപ്പ് നിരീക്ഷിക്കാന്‍ തുടങ്ങിയതിനുശേഷമുള്ള ഏറ്റവും ഉയര്‍ന്ന നിലയാണ് 2026-ല്‍ രേഖപ്പെടുത്തിയിരിക്കുന്നത്. ജൂണ്‍, ജൂലൈ, ഓഗസ്റ്റ് മാസങ്ങളില്‍ ആഗോള ശരാശരി സമുദ്രനിരപ്പ് പുതിയ ഉയരങ്ങളിലെത്തി.

 സമുദ്രനിരപ്പ് ഉയരുന്നതിന് പിന്നില്‍  പ്രധാനമായും രണ്ട് കാരണങ്ങളാണ് ഉള്ളത്. ആഗോളതാപനം മൂലം ഹിമാനികളും കരയിലെ മഞ്ഞുപാളികളും ഉരുകി സമുദ്രത്തിലേക്ക് കൂടുതല്‍ വെള്ളമെത്തുന്നു. അതോടൊപ്പം കടല്‍വെള്ളം ചൂടാകുമ്പോള്‍ അതിന്റെ വ്യാപ്തി വര്‍ധിക്കുകയും ചെയ്യുന്നു. ഇവ രണ്ടും ചേര്‍ന്നാണ് സമുദ്രനിരപ്പ് ഉയര്‍ത്തുന്നത്. നാസയുടെ ഉപഗ്രഹ നിരീക്ഷണങ്ങള്‍ പ്രകാരം 1993-നുശേഷം ആഗോള ശരാശരി സമുദ്രനിരപ്പ് ഏകദേശം പത്ത് സെന്റിമീറ്ററിലധികം ഉയര്‍ന്നിട്ടുണ്ട്.

കേള്‍ക്കുമ്പോള്‍ ചെറിയ വര്‍ധനവെന്ന് തോന്നാം. എന്നാല്‍ ഉയര്‍ന്ന സമുദ്രനിരപ്പിനൊപ്പം വേലിയേറ്റവും ശക്തമായ തിരമാലകളും എത്തുമ്പോള്‍ തീരപ്രദേശങ്ങളില്‍ വെള്ളപ്പൊക്കസാധ്യത വര്‍ധിക്കും. ഉപ്പുവെള്ളം തീരദേശത്തെ കിണറുകളിലേക്കും ഭൂഗര്‍ഭജലത്തിലേക്കും കടന്നുകയറുന്നതും മറ്റൊരു വെല്ലുവിളിയാണ്. ലോകമെമ്പാടുമുള്ള താഴ്ന്ന തീരപ്രദേശങ്ങളില്‍ താമസിക്കുന്ന ഏകദേശം തൊണ്ണൂറുകോടി ജനങ്ങള്‍ക്ക് സമുദ്രനിരപ്പിലെ ഉയര്‍ച്ച വലിയ ഭീഷണിയാണെന്ന് ലോക കാലാവസ്ഥാ സംഘടന മുന്നറിയിപ്പ് നല്‍കുന്നു.

കേരളത്തിനും ഈ മുന്നറിയിപ്പ് പ്രസക്തമാണ്. ചെല്ലാനം ഉള്‍പ്പെടെയുള്ള തീരപ്രദേശങ്ങളില്‍ കടലാക്രമണവും വെള്ളക്കെട്ടും ജനജീവിതത്തെ നേരത്തേ ബാധിച്ചിട്ടുണ്ട്. സമുദ്രനിരപ്പിലെ ദീര്‍ഘകാല ഉയര്‍ച്ച ഇത്തരം പ്രദേശങ്ങളിലെ അപകടസാധ്യത കൂടുതല്‍ സങ്കീര്‍ണമാക്കാം. കടല്‍ ഒരുദിവസംകൊണ്ട് കരയെ വിഴുങ്ങുകയല്ല. പക്ഷേ വര്‍ഷങ്ങളിലൂടെ ഉയരുന്ന ഓരോ സെന്റിമീറ്ററും തീരദേശത്തിന്റെ ഭാവിയെ മാറ്റിമറിക്കാം. കാലാവസ്ഥാ വ്യതിയാനത്തിനെതിരായ നടപടികള്‍ക്കൊപ്പം തീരദേശ സംരക്ഷണവും ദുരന്തമുന്നറിയിപ്പ് സംവിധാനങ്ങളും ശക്തിപ്പെടുത്തേണ്ടതിന്റെ ആവശ്യകതയാണ് പുതിയ റിപ്പോര്‍ട്ട് ഓര്‍മിപ്പിക്കുന്നത്.