രൂക്ഷവിമര്‍ശനവുമായി ഹൈക്കോടതി, കിഫ്ബിയുടെ കണക്കുകളില്‍ സിഎജി ഓഡിറ്റിംഗ് ഒഴിവാക്കാനുള്ള മുന്‍സര്‍ക്കാരിന്റെ തീരുമാനം ആശങ്കാജനകം

2026-11-13

കിഫ്ബിയുടെ സാമ്പത്തിക ഇടപാടുകളില്‍ സിഎജി ഓഡിറ്റിംഗ് വേണ്ടെന്ന മുന്‍സര്‍ക്കാരിന്റെ നിലപാടിനെതിരെ രൂക്ഷ വിമര്‍ശനവുമായി ഹൈക്കോടതി. കിഫ്ബിയുടെ കണക്കുകളില്‍ സിഎജി ഓഡിറ്റിംഗ് ഒഴിവാക്കാനുള്ള മുന്‍സര്‍ക്കാരിന്റെ തീരുമാനം ആശങ്കാജനകമാണെന്ന് ചീഫ് ജസ്റ്റിസ് സൗമെന്‍ സെന്‍ അധ്യക്ഷനായ ബെഞ്ച് നിരീക്ഷിച്ചു. ഓഡിറ്റില്‍ പൊരുത്തക്കേടുകള്‍ കണ്ടെത്തിയിട്ടും സിഎജിയെ ഒഴിവാക്കാന്‍ ശ്രമിച്ചത് ഗൗരവകരമാണെന്നും കണക്കില്‍ സുതാര്യത വേണമെന്നും കോടതി ചൂണ്ടിക്കാട്ടി.

കിഫ്ബിയുടെ വരവ് ചെലവ് കണക്കുകള്‍ സിഎജിയുടെ ഓഡിറ്റിന് വിധേയമാക്കണമെന്നും ഇതിനെതിരായ മുന്‍സര്‍ക്കാരിന്റെ നിലപാട് ഭരണഘടനാ വിരുദ്ധമാണെന്നും ചൂണ്ടിക്കാട്ടി സമര്‍പ്പിച്ച പൊതുതാല്‍പര്യ ഹര്‍ജികള്‍ പരിഗണിക്കുകയായിരുന്നു കോടതി. സര്‍ക്കാര്‍ ഫണ്ട് ഉപയോഗിച്ചാണ് കിഫ്ബി പ്രവര്‍ത്തിക്കുന്നത്. കിഫ്ബി എടുക്കുന്ന വായ്പകള്‍ക്ക് ഗ്യാരണ്ടി നില്‍ക്കുന്നതും സംസ്ഥാന സര്‍ക്കാരാണ്. ഈ സാഹചര്യത്തില്‍ കിഫ്ബിയുടെ സാമ്പത്തിക ഇടപാടുകളും പ്രവര്‍ത്തനങ്ങളും പൂര്‍ണമായും സുതാര്യമായിരിക്കണമെന്ന് കോടതി വ്യക്തമാക്കി. സിഎജി ഓഡിറ്റിംഗിനെതിരായ കിഫ്ബിയുടെ മുന്‍കാല നിലപാടുകളെയും കോടതി വിമര്‍ശിച്ചു. പ്രാഥമിക ഓഡിറ്റ് റിപ്പോര്‍ട്ടില്‍ വലിയ പൊരുത്തക്കേടുകള്‍ കണ്ടെത്തിയിട്ടും തുടര്‍ പരിശോധനയ്ക്കായി സിഎജിക്ക് കൈമാറേണ്ടതില്ലെന്ന മുന്‍സര്‍ക്കാരിന്റെ തീരുമാനം ആശങ്കയുണ്ടാക്കുന്നതാണെന്നും കോടതി നിരീക്ഷിച്ചു.

അതേസമയം, കിഫ്ബിയുടെ പ്രവര്‍ത്തനം വിലയിരുത്തിയ വിദഗ്ധ സമിതിയുടെ ശുപാര്‍ശ സര്‍ക്കാര്‍ അംഗീകരിച്ച സാഹചര്യത്തില്‍ സിഎജി ഓഡിറ്റ് നിഷേധിച്ച മുന്‍സര്‍ക്കാരിന്റെ തീരുമാനം അസാധുവായെന്ന് കോടതി വിലയിരുത്തി. കിഫ്ബിയുടെ കണക്കുകള്‍ സിഎജി ഓഡിറ്റിംഗിന് വിധേയമാക്കുമെന്ന് സര്‍ക്കാരിന് വേണ്ടി ഹാജരായ അഡ്വക്കറ്റ് ജനറല്‍ ജാജു ബാബു കോടതിയെ അറിയിച്ചു. സര്‍ക്കാരിന്റെ നിലപാട് രേഖപ്പെടുത്തിയ കോടതി പൊതുതാല്‍പര്യ ഹര്‍ജികള്‍ തീര്‍പ്പാക്കി. കിഫ്ബിയുടെ സാമ്പത്തിക ഇടപാടുകളുമായി ബന്ധപ്പെട്ട് ഏറെക്കാലമായി നിലനില്‍ക്കുന്ന തര്‍ക്കത്തില്‍ നിര്‍ണായകമാണ് ഹൈക്കോടതിയുടെ ഈ നിരീക്ഷണം.