'വിക്ടിം', 'ഫ്രീഡം' എന്‍ഡോസള്‍ഫാന്‍ സ്മാരക ശില്‍പങ്ങളുടെ അനാച്ഛാദനം നടന്നു

2026-11-13

കാസര്‍കോട് ജില്ലാ പഞ്ചായത്ത് വളപ്പില്‍ ശില്‍പി കാനായി കുഞ്ഞിരാമന്‍ ഒരുക്കിയ എന്‍ഡോസള്‍ഫാന്‍ സ്മാരക ശില്‍പങ്ങളുടെ അനാച്ഛാദനച്ചടങ്ങില്‍ സ്പീക്കര്‍ തിരുവഞ്ചൂര്‍ രാധാകൃഷ്ണന്‍ പങ്കെടുക്കാത്തതില്‍ അതൃപ്തി അറിയിച്ച് ശില്‍പി കാനായി കുഞ്ഞിരാമന്‍. നേരത്തെ സ്പീക്കറായിരുന്നു ശില്‍പങ്ങള്‍ അനാച്ഛാദനം ചെയ്യുമെന്ന് അറിയിച്ചിരുന്നത്. എന്നാല്‍ ചടങ്ങ് നടന്ന ഇന്ന് രാവിലെയാണ് സ്പീക്കര്‍ എത്തില്ലെന്ന വിവരം സംഘാടകര്‍ അറിയിച്ചത്.

എന്‍ഡോസള്‍ഫാന്‍ ദുരിതബാധിതരുടെ വേദനയും നിസ്സഹായാവസ്ഥയും ചിത്രീകരിക്കുന്നതാണ് കാനായി കുഞ്ഞിരാമന്‍ ഒരുക്കിയ ശില്‍പം. വലിയ തലകളും കൈകളുമുള്ള രണ്ട് കുട്ടികളെ ചേര്‍ത്തുപിടിച്ച് നില്‍ക്കുന്ന അമ്മയുടെ രൂപമാണ് പ്രധാന ശില്‍പത്തിലുള്ളത്. 'വിക്ടിം', 'ഫ്രീഡം' എന്നിങ്ങനെ പേരിട്ടിരിക്കുന്ന രണ്ട് ശില്‍പങ്ങളാണ് കാസര്‍കോട് ജില്ലാ പഞ്ചായത്ത് വളപ്പില്‍ സ്ഥാപിച്ചിരിക്കുന്നത്. ശില്‍പങ്ങളുടെ അനാച്ഛാദനം രാജ്‌മോഹന്‍ ഉണ്ണിത്താന്‍ എം.പി നിര്‍വഹിച്ചു

നിര്‍മാണം ആരംഭിച്ച് വര്‍ഷങ്ങള്‍ നീണ്ട കാത്തിരിപ്പിനും പ്രതിസന്ധികള്‍ക്കും ശേഷമാണ് ശില്‍പങ്ങള്‍ പൂര്‍ത്തിയായത്. ഏകദേശം 40 അടി ഉയരമുള്ള 'വിക്ടിം' കാനായി കുഞ്ഞിരാമന്‍ നിര്‍മ്മിച്ച ഏറ്റവും ഉയരം കൂടിയ ശില്‍പമാണ്. ചടങ്ങില്‍ ആര് അനാച്ഛാദനം ചെയ്താലും ഇല്ലെങ്കിലും ശില്‍പം ജനങ്ങള്‍ക്കുള്ളതാണെന്നും കാനായി കുഞ്ഞിരാമന്‍ പ്രതികരിച്ചു.