ചരിത്രപ്രസിദ്ധമായ കന്നി 20 പെരുന്നാള്‍, വിശ്വാസനിറവില്‍ കോതമംഗലത്ത് തീര്‍ഥാടക പ്രവാഹം, പരിശുദ്ധ യെല്‍ദോ ബാവായുടെ കബറിങ്കല്‍ ജനസഹസ്രങ്ങള്‍

2026-10-03

 കോതമംഗലം മാര്‍ തോമാ ചെറിയപള്ളിയില്‍ ചരിത്രപ്രസിദ്ധമായ കന്നി 20 പെരുന്നാളിനു പരിശുദ്ധ യല്‍ദോ മോര്‍ ബസേലിയോസ് ബാവായുടെ കബറിങ്കലേക്കു തീര്‍ഥാടകരുടെ ഒഴുക്ക്. സന്ധ്യാ നമസ്‌കാരത്തിന് ശേഷ്ഠ കാതോലിക്ക മാര്‍ ബസേലിയോസ് ജോസഫ് ബാവയും സഭയിലെ മെത്രാപ്പോലീത്തമാരും വൈദികരും സന്നിഹിതരായി. നഗരം ചുറ്റിയുള്ള പ്രദക്ഷിണത്തില്‍ ആയിരക്കണക്കിന് വിശ്വാസികളാണ് പങ്കെടുത്തത്.

കോതമംഗലം മാര്‍ത്തോമ്മ ചെറിയ പള്ളിയില്‍ കന്നി 20 പെരുന്നാളിന്റെ പ്രധാന ദിവസമായ ഇന്നലെ നഗരവും പള്ളിയും തീര്‍ഥാടകരാല്‍ തിങ്ങിനിറഞ്ഞു. പരിശുദ്ധ യെല്‍ദോ മാര്‍ ബസേലിയോസ് ബാവയുടെ ഓര്‍മപ്പെരുന്നാളിന് കബറിങ്കലെത്തി പ്രാര്‍ഥിച്ച് വണങ്ങി അനുഗ്രഹം പ്രാപിക്കുവാന്‍ ഇന്നലെ രാവിലെ മുതല്‍ പള്ളിയിലേക്ക് കാല്‍നട തീര്‍ഥാടകരെത്തി. വിവിധ മേഖലകളില്‍ നിന്ന് എത്തിച്ചേര്‍ന്ന കാല്‍നട തീര്‍ഥാടക സംഘത്തിന് ചെറിയ പള്ളി ഭരണസമിതിയുടെ ആഭിമുഖ്യത്തില്‍ ഡീന്‍ കുര്യാക്കോസ് എംപി, ഷിബു തെക്കുംപുറം എംഎല്‍എ, വൈദികര്‍, മറ്റ് ജനപ്രതിനിധികള്‍, കോതമംഗലത്തെ പൗരാവലി എന്നിവര്‍ ചേര്‍ന്ന് സ്വീകരണം നല്‍കി. രാവിലെ മുതല്‍ എത്തിയ മുഴുവന്‍ തീര്‍ഥാടകര്‍ക്കും പ്രത്യേകം തയാറാക്കിയ പന്തലില്‍ നേര്‍ച്ചക്കഞ്ഞി വിതരണവും നടത്തി. സന്ധ്യാ നമസ്‌കാരത്തിന് ശേഷ്ഠ കാതോലിക്ക ബസേലിയോസ് ജോസഫ് ബാവയും സഭയിലെ മെത്രാപ്പോലീത്തമാരും വൈദികരും സന്നിഹിതരായി. നഗരം ചുറ്റിയുള്ള പ്രദക്ഷിണത്തില്‍ ആയിരക്കണക്കിന് വിശ്വാസികളാണ് പങ്കെടുത്തത്. ഇന്ന് രാവിലെ 5.30നും 7നും 8.30നും കുര്‍ബാനയര്‍പ്പണം നടന്നു. ഡോ. ഏബ്രഹാം മാര്‍ സേവേറിയോസ് മെത്രാപോലീത്ത, ഡോ. തോമസ് മാര്‍ തീമോത്തിയോസ് മെത്രാപോലീത്ത, ശ്രേഷ്ഠ കാതോലിക്ക മാര്‍ ബസേലി യോസ് ജോസഫ് ബാവാ എന്നിവര്‍ യഥാക്രമം മുഖ്യകാര്‍മികത്വം വഹിക്കും. തുടര്‍ന്ന് ഉച്ചയ്ക്ക് രണ്ടിന് ചക്കാലക്കുടി ചാപ്പലിലേക്ക് പ്രദക്ഷിണവും നടന്നു.