മുന്‍ കായിക മന്ത്രിക്കെതിരെ വിജിലന്‍സ് അന്വേഷണം വേണം സര്‍ക്കാര്‍ ഗവര്‍ണറുടെ അനുമതി തേടി കത്തു നല്‍കി

2026-10-16

 അര്‍ജന്റീന ഫുട്‌ബോള്‍ താരം ലയണല്‍ മെസ്സിയെയും സംഘത്തെയും കേരളത്തിലെത്തിക്കുമെന്ന പേരില്‍ നടന്ന സാമ്പത്തിക ക്രമക്കേടില്‍  മുന്‍ കായിക മന്ത്രി വി. അബ്ദുറഹിമാനെതിരെ വിജിലന്‍സ് അന്വേഷണം നടത്തുന്നതിനായി സര്‍ക്കാര്‍ ഗവര്‍ണറുടെ അനുമതി തേടി . മുഖ്യമന്ത്രി  വി  ഡി സതീശനാണ് ഗവര്‍ണറുടെ ഓഫീസിന്  കത്തു നല്‍കിയത് .   

കേസ് അന്വേഷിക്കുന്ന പ്രത്യേക അന്വേഷണ സംഘം ,  മുന്‍ മന്ത്രി വി. അബ്ദുറഹിമാന്‍, സ്‌പോര്‍ട്‌സ് കൗണ്‍സില്‍ മുന്‍ പ്രസിഡന്റ് യു. ഷറഫലി, മന്ത്രിയുടെ മുന്‍ പ്രൈവറ്റ് സെക്രട്ടറി സത്യപാലന്‍ എന്നിവര്‍ക്കെതിരെ അഴിമതി നിരോധന നിയമപ്രകാരം  കേസെടുക്കാന്‍ പ്രോസിക്യൂഷന്‍ അനുമതി തേടി സര്‍ക്കാരിന് റിപ്പോര്‍ട്ട് സമര്‍പ്പിച്ചിരുന്നു. ഈ ശുപാര്‍ശ സംസ്ഥാന പൊലീസ് മേധാവിയും അംഗീകരിച്ച് സര്‍ക്കാരിലേക്ക് ഫയല്‍ കൈമാറുകയായിരുന്നു . മുന്‍ മന്ത്രിയായതിനാല്‍ അഴിമതി നിരോധന നിയമപ്രകാരം അന്വേഷണം നടത്തുന്നതിനും കേസ് രജിസ്റ്റര്‍ ചെയ്യുന്നതിനും ഗവര്‍ണറുടെ മുന്‍കൂര്‍ അനുമതി അത്യാവശ്യമാണ്. ലഭിച്ച നിയമോപദേശത്തിന്റെ അടിസ്ഥാനത്തിലാണ് ഫയല്‍ ഗവര്‍ണറുടെ അനുമതിക്കായി മുഖ്യമന്ത്രി ലോക് ഭവനിലേക്ക് അയച്ചത് . ലയണല്‍ മെസ്സിയെ കേരളത്തില്‍ എത്തിക്കുന്നതിനുള്ള സ്‌പോണ്‍സര്‍ഷിപ്പ് കരാറുകളിലും സ്‌പോണ്‍സറെ തെരഞ്ഞെടുത്തതിലും അര്‍ജന്റീന ഫുട്‌ബോള്‍ അസോസിയേഷനുമായുള്ള ഇടപാടുകളിലും വി. അബ്ദുറഹിമാന്‍ ചട്ടവിരുദ്ധമായി ഇടപെട്ടെന്നാണ് അന്വേഷണ സംഘത്തിന്റെ കണ്ടെത്തല്‍. ടെന്‍ഡര്‍ വിളിക്കാതെ സ്‌പോണ്‍സറെ നിശ്ചയിച്ചതില്‍ ക്രമക്കേടുണ്ടെന്ന് അന്നത്തെ പ്രൈവറ്റ് സെക്രട്ടറി മുന്നറിയിപ്പ് നല്‍കിയിട്ടും മന്ത്രി അത് അവഗണിച്ചതായും മൊഴികളിലുണ്ട് .ഗവര്‍ണറുടെ അനുമതി ലഭിക്കുന്നതോടെ കേസ് ഔദ്യോഗികമായി വിജിലന്‍സ് ആന്‍ഡ് ആന്റി കറപ്ഷന്‍ ബ്യൂറോയ്ക്ക്  കൈമാറുകയും തുടര്‍നടപടികളിലേക്ക് കടക്കുകയും ചെയ്യും .