രാജ്യത്തെ അസ്ഥിരപ്പെടുത്താനാണ് പ്രതിപക്ഷത്തിന്റെ ശ്രമം : നിതിന്‍ നബിന്‍, വിമര്‍ശനവുമായി ബിജെപി ദേശീയ അധ്യക്ഷന്‍ നിതിന്‍ നബിന്‍

2026-10-10

രാജ്യത്തെ അസ്ഥിരപ്പെടുത്താനാണ് പ്രതിപക്ഷത്തിന്റെ ശ്രമമെന്ന് ബിജെപി ദേശീയ അധ്യക്ഷന്‍ നിതിന്‍ നബിന്‍. രാഹുല്‍ ഗാന്ധിയും അരവിന്ദ് കെജ്രിവാളുമായി ബന്ധപ്പെട്ടവരും അര്‍ബന്‍ നക്‌സല്‍ ചിന്താഗതിയുള്ളവരാണെന്നും അദ്ദേഹം വിമര്‍ശിക്കുകയും ചെയ്തു .

തീവ്ര വോട്ടര്‍പട്ടിക പരിഷ്‌കരണത്തിനെതിരായ പ്രതിഷേധവും മുഖ്യ തിരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി ആവശ്യവും ശക്തമാകുന്നതിനിടെയാണ് നിതിന്‍ നബിന്റെ പ്രതികരണം.

രാഹുല്‍ ഗാന്ധിയുടെ നേതൃത്വത്തിലുള്ള ഇന്ത്യാ സഖ്യവും അരവിന്ദ് കെജ്രിവാളും സി.ജെ.പി.യും ഉള്‍പ്പടെ  രാജ്യത്ത് അസ്ഥിരത സൃഷ്ടിക്കാന്‍ ശ്രമിക്കുകയാണെന്നാണ് ബിജെപി ദേശീയ അധ്യക്ഷന്റെ ആരോപണം  .ജനങ്ങള്‍ സമാധാനത്തോടെ ജീവിക്കുകയും രാജ്യത്തിന്റെ വികസനത്തിനായി പ്രവര്‍ത്തിക്കുകയും ചെയ്യുന്ന സാഹചര്യത്തെ തകര്‍ക്കാനാണ്  ശ്രമമെന്നും അദ്ദേഹം പറഞ്ഞു.  അര്‍ബന്‍ നക്‌സല്‍ ചിന്താഗതിയുള്ള ചിലര്‍ രാജ്യത്തെ അസ്ഥിരപ്പെടുത്താന്‍ ശ്രമിക്കുകയാണെന്നും അദ്ദേഹം ആരോപിച്ചു. ഇന്ത്യയുടെ സംസ്‌കാരത്തിലും ജനാധിപത്യത്തിലും ഭരണഘടനയിലും വിശ്വാസമുള്ള യുവാക്കള്‍ പ്രതിപക്ഷ നേതാക്കളുടെ ഇത്തരം പരാമര്‍ശങ്ങള്‍ അംഗീകരിക്കില്ലെന്നും നിതിന്‍ നബിന്‍ പറഞ്ഞു. രാജ്യത്തെ ഭരണഘടനാ സ്ഥാപനങ്ങളെ ചോദ്യം ചെയ്യുന്നതും ഉന്നത പദവികളിലുള്ളവരെ അപമാനിക്കുന്നതും ജനങ്ങള്‍ അംഗീകരിക്കില്ലെന്നും അദ്ദേഹം വ്യക്തമാക്കി . വിദേശശക്തികളുടെ പിന്തുണയോടെ രാജ്യത്തെ അസ്ഥിരപ്പെടുത്താനുള്ള ശ്രമങ്ങള്‍ അനുവദിക്കില്ലെന്നും ഇത്തരം നീക്കങ്ങളെ സര്‍ക്കാര്‍ ശക്തമായി നേരിടുമെന്നും നിതിന്‍ നബിന്‍ മുന്നറിയിപ്പ് നല്‍കി. നരേന്ദ്ര മോദിയുടെ നേതൃത്വത്തില്‍ വികസിത ഇന്ത്യ എന്ന ലക്ഷ്യവുമായി മുന്നോട്ടുപോകുമെന്നും അദ്ദേഹം വ്യക്തമാക്കി.