മരണം മാധ്യമക്കാഴ്ചയാവരുത്, ക്രിസ്തീയ സ്‌നേഹത്തിന്റെയും ജീവന്റെ പവിത്രതയുടെയും പുതിയൊരു ഓര്‍മ്മപ്പെടുത്തല്‍

2026-10-10

സാങ്കേതിക വിദ്യയുടെ വളര്‍ച്ച മനുഷ്യകുലത്തെ പുതിയ ഉയരങ്ങളിലേക്ക് നയിക്കുമ്പോഴും, മനുഷ്യജീവന്റെ വിശുദ്ധിയെയും വിലയെയും കുറിച്ചുള്ള ചോദ്യങ്ങള്‍ കൂടുതല്‍ പ്രസക്തമാകുകയാണ്. 2009 ല്‍ അമേരിക്കയിലെ ഫോര്‍ട്ട് ഹൂഡില്‍ നടന്ന കൂട്ടക്കൊലക്കേസിലെ പ്രതിയും മുന്‍ ആര്‍മി മേജറുമായ നിദാല്‍ ഹസ്സന്റെ വധശിക്ഷ ലൈവ് സ്ട്രീമിംഗിലൂടെ തത്സമയം സംപ്രേഷണം ചെയ്യാനുള്ള പെന്റഗണിന്റെ നീക്കത്തിനെതിരെ ശക്തമായ പ്രതിഷേധം രേഖപ്പെടുത്തി കത്തോലിക്കാ സഭ രംഗത്തെത്തി.

 സാങ്കേതിക വിദ്യയുടെ കൊടുമുടിയില്‍ നില്‍ക്കുമ്പോഴും മനുഷ്യ മനസ്സാക്ഷിയെ ഉലയ്ക്കുന്ന വാര്‍ത്തകളാണ് ലോകത്തിന്റെ വിവിധ കോണുകളില്‍ നിന്ന് വരുന്നത്. 2009 ല്‍ അമേരിക്കയിലെ ഫോര്‍ട്ട് ഹൂഡില്‍ നടന്ന ഭീകരമായ കൂട്ടക്കൊല കേസില്‍ ശിക്ഷിക്കപ്പെട്ട മുന്‍ ആര്‍മി മേജര്‍ നിദാല്‍ ഹസ്സന്റെ വധശിക്ഷ ലൈവ് സ്ട്രീമിംഗിലൂടെ തത്സമയം സംപ്രേഷണം ചെയ്യാനുള്ള പെന്റഗണിന്റെ നീക്കത്തിനെതിരെ കത്തോലിക്കാ സഭ തങ്ങളുടെ നിലപാട് വ്യക്തമാക്കിയിരിക്കുകയാണ്. 'ദൈവം നല്‍കിയ ജീവന്റെ അന്ത്യം ഒരിക്കലും ഒരു കാഴ്ചയോ വിനോദമോ ആകരുത്' എന്ന് ഉറക്കെ പ്രഖ്യാപിച്ചുകൊണ്ട് വത്തിക്കാന്‍ സ്റ്റേറ്റ് സെക്രട്ടറി കര്‍ദിനാള്‍ പിയേത്രോ പരോളിനാണ് സഭയുടെ നിലപാട് വ്യക്തമാക്കിയിരിക്കുന്നത്.

റോമില്‍ വെച്ച് നടന്ന ഒരു അനുസ്മരണ ചടങ്ങില്‍ മാധ്യമപ്രവര്‍ത്തകരോട് സംസാരിക്കവേയാണ് കര്‍ദിനാള്‍ സഭയുടെ നിലപാട് പ്രഖ്യാപിച്ചത്. ഒരു വ്യക്തി എത്ര വലിയ കുറ്റവാളിയാണെങ്കിലും, അയാളുടെ അന്ത്യനിമിഷങ്ങളെ ഒരു തത്സമയ പ്രദര്‍ശന വസ്തുവാക്കി മാറ്റുന്നത് ഒട്ടും അംഗീകരിക്കാനാവാത്ത കാര്യമാണെന്ന് അദ്ദേഹം ഓര്‍മ്മിപ്പിച്ചു.

സഭ ഉറപ്പിച്ചു പറയുന്നു, ജീവന്‍ ദൈവത്തിന്റേതാണ്. നമ്മുടെ കത്തോലിക്കാ സഭ എക്കാലത്തും വധശിക്ഷയ്ക്ക് എതിരാണ്. പാപത്തെ വെറുക്കുക, പാപിയെ സ്‌നേഹിക്കുക എന്ന ക്രിസ്തീയ ദര്‍ശനത്തില്‍ ഊന്നിയാണ് സഭ എന്നും ജീവന് വേണ്ടി സംസാരിച്ചിട്ടുള്ളതെന്നും കര്‍ദിനാള്‍ പരോളിന്‍ വ്യക്തമാക്കി.

അന്തസ്സ് തെറ്റുകള്‍ക്ക് അപ്പുറമാണ്. ഒരു മനുഷ്യന്‍ ചെയ്യുന്ന കുറ്റങ്ങള്‍ എത്ര കഠിനമാണെങ്കിലും, ദൈവം നല്‍കിയ അവന്റെ അടിസ്ഥാനപരമായ മാനവിക അന്തസ്സ് ഇല്ലാതാകുന്നില്ല. ശിക്ഷയേക്കാള്‍ വലുതാണ് മാനസാന്തരം. വധശിക്ഷ ഒന്നിനും പരിഹാരമല്ല. അത് കുറ്റകൃത്യങ്ങള്‍ തടയാന്‍ സഹായിക്കില്ലെന്നും കര്‍ദിനാള്‍ ആവര്‍ത്തിച്ചു. ജീവനെടുക്കുന്നതിന് പകരം മറ്റ് ശിക്ഷാ മാര്‍ഗ്ഗങ്ങള്‍ ആധുനിക സമൂഹത്തിലുണ്ട്. ഒരു മനുഷ്യന്റെ മരണം ക്യാമറകള്‍ക്ക് മുന്നില്‍ പ്രദര്‍ശിപ്പിക്കുന്നത് ആധുനിക സമൂഹത്തിന്റെ ധാര്‍മ്മിക അധപതനത്തെയാണ് കാണിക്കുന്നത്.

യുണൈറ്റഡ് സ്റ്റേറ്റ്‌സ് കോണ്‍ഫറന്‍സ് ഓഫ് കാത്തലിക് ബിഷപ്‌സ് പ്രസിഡന്റ് ആര്‍ച്ച് ബിഷപ്പ് പോള്‍ കോക്ലിയും ഈ വിഷയത്തില്‍ സഭയുടെ ആശങ്ക അറിയിച്ച് രംഗത്തെത്തിയിരുന്നു. വിഷയത്തില്‍ പരിശുദ്ധ സിംഹാസനത്തിന്റെ ഔദ്യോഗിക പ്രസ്താവന ഉടന്‍ തന്നെ ഉണ്ടാകുമെന്നും കര്‍ദിനാള്‍ സൂചിപ്പിച്ചു.

മാത്രമല്ല, മനുഷ്യാവകാശങ്ങള്‍ സംരക്ഷിക്കപ്പെടേണ്ടതിന്റെ ആവശ്യകതയും കര്‍ദിനാള്‍ തന്റെ സന്ദേശത്തില്‍ ഊന്നിപ്പറഞ്ഞു. ഈ വര്‍ഷത്തെ നൊബേല്‍ സമാധാന സമ്മാനം നേടിയ 85-കാരിയായ ദക്ഷിണാഫ്രിക്കന്‍ മനുഷ്യാവകാസ പ്രവര്‍ത്തകയായ നവി പിള്ളയെ അദ്ദേഹം അഭിനന്ദിച്ചു. ഇന്റര്‍നാഷണല്‍ ക്രിമിനല്‍ കോര്‍ട്ട് ജഡ്ജായും യു.എന്‍ മനുഷ്യാവകാശ ഹൈക്കമ്മീഷണറായും സേവനമനുഷ്ഠിച്ച അവര്‍, അടിച്ചമര്‍ത്തപ്പെട്ടവര്‍ക്ക് വേണ്ടി ശബ്ദമുയര്‍ത്തിയ വ്യക്തിയാണ്. മനുഷ്യന്റെ മൗലികാവകാശങ്ങള്‍ക്ക് വേണ്ടി നിലകൊള്ളുന്ന ഏത് പ്രവര്‍ത്തനവും ദൈവരാജ്യത്തിന്റെ മൂല്യങ്ങളെയാണ് പ്രതിഫലിപ്പിക്കുന്നതെന്ന് കര്‍ദിനാള്‍ പിയേത്രോ പരോളിന്‍ കൂട്ടിച്ചേര്‍ത്തു.