ഐഎന്‍എസ് മാംഗ്രോള്‍ നാവികസേനയുടെ ഭാഗമായി, അന്തര്‍വാഹിനി വേട്ടയ്ക്ക് ഐഎന്‍എസ് മാംഗ്രോള്‍

2026-10-12

തീരദേശ സുരക്ഷ ശക്തമാക്കാന്‍ ഇന്ത്യന്‍ നാവികസേനയ്ക്ക് പുതിയ കരുത്ത്. തദ്ദേശീയമായി നിര്‍മിച്ച അന്തര്‍വാഹിനിവിരുദ്ധ യുദ്ധക്കപ്പലായ ഐഎന്‍എസ് മാംഗ്രോള്‍ നാവികസേനയുടെ ഭാഗമായി. കൊച്ചിന്‍ ഷിപ്പ്യാര്‍ഡില്‍ നിര്‍മിച്ച കപ്പലില്‍ 80 ശതമാനത്തിലധികം തദ്ദേശീയ ഘടകങ്ങളാണ് ഉപയോഗിച്ചിരിക്കുന്നത്

ശത്രുരാജ്യങ്ങളുടെ അന്തര്‍വാഹിനികളെ കണ്ടെത്താനും പ്രതിരോധിക്കാനുമുള്ള ശേഷി വര്‍ധിപ്പിക്കുന്നതിന്റെ ഭാഗമായി തദ്ദേശീയമായി നിര്‍മിച്ച യുദ്ധക്കപ്പലായ ഐഎന്‍എസ് മാംഗ്രോള്‍ ഇന്ത്യന്‍ നാവികസേനയുടെ ഭാഗമായി. മാഹി - ക്ലാസ് പരമ്പരയിലെ മൂന്നാമത്തെ അന്തര്‍വാഹിനിവിരുദ്ധ യുദ്ധക്കപ്പലായ മാംഗ്രോള്‍ മുംബൈയിലെ നേവല്‍ ഡോക്ക്യാര്‍ഡില്‍ നടന്ന ചടങ്ങിലാണ് നാവികസേനയുടെ ഭാഗമായത്. വെസ്റ്റേണ്‍ നേവല്‍ കമാന്‍ഡ് ഫ്‌ലാഗ് ഓഫീസര്‍ കമാന്‍ഡിങ് ഇന്‍ ചീഫ് വൈസ് അഡ്മിറല്‍ സഞ്ജയ് വത്സായന്‍ കപ്പല്‍ സേനയ്ക്ക് സമര്‍പ്പിച്ചു.

കൊച്ചിന്‍ ഷിപ്പ്യാര്‍ഡ് ലിമിറ്റഡാണ് കപ്പല്‍ നിര്‍മിച്ചത്. 80 ശതമാനത്തിലധികം തദ്ദേശീയ ഘടകങ്ങള്‍ ഉപയോഗിച്ചാണ് കപ്പലിന്റെ നിര്‍മാണം പൂര്‍ത്തിയാക്കിയത്. തീരദേശത്തെ ആഴം കുറഞ്ഞ കടല്‍മേഖലകളിലും തുറമുഖങ്ങള്‍ക്ക് സമീപവും പ്രവര്‍ത്തിക്കാന്‍ കഴിയുന്ന രീതിയിലാണ് കപ്പല്‍ രൂപകല്‍പ്പന ചെയ്തിരിക്കുന്നത്. വലിയ യുദ്ധക്കപ്പലുകള്‍ക്ക് പ്രവര്‍ത്തിക്കാന്‍ പ്രയാസമുള്ള മേഖലകളില്‍ ശത്രു അന്തര്‍വാഹിനികളെ കണ്ടെത്താനും പ്രതിരോധിക്കാനും ഐഎന്‍എസ് മാംഗ്രോളിന് കഴിയും.

അഭയ് ഹള്‍ മൗണ്ടഡ് സോണാര്‍, ഭാരം കുറഞ്ഞ ടോര്‍പ്പിഡോകള്‍, തദ്ദേശീയമായി വികസിപ്പിച്ച അന്തര്‍വാഹിനിവിരുദ്ധ റോക്കറ്റ് ലോഞ്ചര്‍, മാരീച്ച് ടോര്‍പ്പിഡോ ഡീകോയ് സംവിധാനം തുടങ്ങിയ ആധുനിക സംവിധാനങ്ങള്‍ കപ്പലില്‍ സജ്ജീകരിച്ചിട്ടുണ്ട്. വെള്ളത്തിനടിയിലെ ഭീഷണികള്‍ നിരീക്ഷിക്കുന്നതിനും തീരദേശ സുരക്ഷ ശക്തമാക്കുന്നതിനും ഇവ സഹായിക്കും.

കേന്ദ്ര സര്‍ക്കാരിന്റെ മേക്ക് ഇന്‍ ഇന്ത്യ, ആത്മനിര്‍ഭര്‍ ഭാരത് പദ്ധതികളുടെ ഭാഗമായി രാജ്യത്തിന്റെ പ്രതിരോധ നിര്‍മാണ മേഖലയില്‍ കൈവരിക്കുന്ന മുന്നേറ്റത്തിന്റെ ഉദാഹരണം കൂടിയാണ് ഐഎന്‍എസ് മാംഗ്രോള്‍. തുറമുഖങ്ങള്‍, തീരദേശ മേഖലകള്‍, തന്ത്രപ്രധാനമായ സമുദ്രപാതകള്‍ എന്നിവയുടെ സുരക്ഷ ഉറപ്പാക്കുന്നതില്‍ കപ്പലിന്റെ സാന്നിധ്യം നിര്‍ണായകമാകുമെന്നാണ് വിലയിരുത്തല്‍.