ഭക്ഷ്യസുരക്ഷ ഉറപ്പാക്കേണ്ടതിന്റെ ഓര്‍മപ്പെടുത്തലുമായി ഇന്ന് ലോക ഭക്ഷ്യദിനം. വിശപ്പില്ലാത്ത ലോകം ഒരു സ്വപ്നമായി തുടരരുത്. അതൊരു യാഥാര്‍ഥ്യമാകണം.

2026-10-16

ഒരു നേരത്തെ ഭക്ഷണത്തിനായി കാത്തിരിക്കുന്ന കോടിക്കണക്കിന് മനുഷ്യര്‍... മറുവശത്ത് ഉപയോഗിക്കാതെ വലിച്ചെറിയുന്ന ടണ്‍ കണക്കിന് ഭക്ഷണം! ലോകം നേരിടുന്ന ഏറ്റവും വലിയ വൈരുധ്യങ്ങളിലൊന്നാണിത്. വിശപ്പില്ലാത്ത ലോകം എന്ന ലക്ഷ്യത്തിലേക്ക് മനുഷ്യരാശി എത്രത്തോളം അടുത്തിട്ടുണ്ട് .  ഭക്ഷ്യസുരക്ഷയും പോഷകാഹാരവും എല്ലാവര്‍ക്കും ഉറപ്പാക്കേണ്ടതിന്റെ ഓര്‍മപ്പെടുത്തലുമായി ഇന്ന് ലോക ഭക്ഷ്യദിനം. ഒക്ടോബര്‍ 16 ലോക ഭക്ഷ്യദിനമായി ആചരിക്കുമ്പോള്‍ ഭക്ഷണത്തിന്റെ വിലയും ഭക്ഷണം പാഴാക്കുന്നതിന്റെ പ്രത്യാഘാതങ്ങളും വീണ്ടും ചര്‍ച്ചയാകുകയാണ് 

വിശപ്പിന് അതിരുകളില്ല... ജാതിയോ മതമോ സമ്പത്തോ വിശപ്പിന്റെ മുന്നില്‍ പ്രസക്തമല്ല. എന്നാല്‍ എല്ലാവര്‍ക്കും ഒരുപോലെ ഭക്ഷണം ലഭിക്കുന്നുണ്ടോ എന്ന ചോദ്യം ഇന്നും ലോകത്തിന് മുന്നില്‍ വലിയ വെല്ലുവിളിയായി തുടരുന്നു.

യുദ്ധങ്ങളും പ്രകൃതിദുരന്തങ്ങളും കാലാവസ്ഥാ വ്യതിയാനവും വിലക്കയറ്റവും ദാരിദ്ര്യവും ഭക്ഷ്യലഭ്യതയെ ബാധിക്കുന്നു. ഉല്‍പ്പാദിപ്പിക്കുന്ന ഭക്ഷണം എല്ലാവരിലേക്കും എത്തുന്നുണ്ടെന്ന് ഉറപ്പാക്കാന്‍ കഴിയാത്തതും പ്രതിസന്ധി രൂക്ഷമാക്കുന്നു.

ലോകത്ത് ഭക്ഷണം ഉല്‍പ്പാദിപ്പിക്കപ്പെടുന്നുണ്ട്. പക്ഷേ, അതിന്റെ ലഭ്യതയും താങ്ങാനാകുന്ന വിലയും പോഷകഗുണവും എല്ലാവര്‍ക്കും ഉറപ്പാക്കാന്‍ ഇനിയും സാധിച്ചിട്ടില്ല.

ഭക്ഷ്യസുരക്ഷയുടെ പ്രാധാന്യം ലോകത്തിന് മുന്നില്‍ അവതരിപ്പിക്കുക എന്ന ലക്ഷ്യത്തോടെയാണ് ലോക ഭക്ഷ്യദിനം ആചരിക്കുന്നത്.

ഐക്യരാഷ്ട്രസഭയുടെ ഭക്ഷ്യ-കാര്‍ഷിക സംഘടനയായ എഫ്.എ.ഒയുടെ സ്ഥാപകദിനമായ ഒക്ടോബര്‍ 16 ആണ് ലോക ഭക്ഷ്യദിനമായി തിരഞ്ഞെടുക്കപ്പെട്ടത്. 1945 ഒക്ടോബര്‍ 16-നാണ് എഫ്.എ.ഒ സ്ഥാപിതമായത്. 1981 മുതല്‍ ലോക ഭക്ഷ്യദിനാചരണം കൂടുതല്‍ വ്യാപകമായി നടപ്പിലായി.

വിശപ്പിനെതിരായ പോരാട്ടം ശക്തമാക്കുക, പോഷകസമൃദ്ധമായ ഭക്ഷണം എല്ലാവര്‍ക്കും ലഭ്യമാക്കുക, സുസ്ഥിര കൃഷിയെ പ്രോത്സാഹിപ്പിക്കുക, ഭക്ഷണം പാഴാക്കുന്നത് കുറയ്ക്കുക... ഈ ലക്ഷ്യങ്ങളെല്ലാം ഭക്ഷ്യദിനാചരണത്തിന്റെ പ്രാധാന്യം വര്‍ധിപ്പിക്കുന്നു.

ഭക്ഷ്യലഭ്യതയ്‌ക്കൊപ്പം സുരക്ഷിതവും പോഷകസമൃദ്ധവുമായ ഭക്ഷണം ഉറപ്പാക്കുന്നതും നിര്‍ണായകമാണ്. വിലക്കയറ്റം സാധാരണക്കാരുടെ കുടുംബബജറ്റിനെ ബാധിക്കുമ്പോള്‍ ഗുണനിലവാരമുള്ള ഭക്ഷണം വാങ്ങുക എന്നതും പല കുടുംബങ്ങള്‍ക്കും വെല്ലുവിളിയാകുന്നു. കുട്ടികളിലെ പോഷകാഹാരക്കുറവ്, ഭക്ഷണത്തിലെ മായം, കീടനാശിനികളുടെ ദുരുപയോഗം, സുരക്ഷിതമല്ലാത്ത ഭക്ഷണസംഭരണം എന്നിവയും ഗൗരവത്തോടെ കാണേണ്ട വിഷയങ്ങളാണ്.

പൊതുവിതരണ സംവിധാനവും റേഷന്‍ കടകളും സാമൂഹിക ഭക്ഷ്യസുരക്ഷാ പദ്ധതികളും അര്‍ഹരായവരിലേക്ക് ഭക്ഷണം എത്തിക്കുന്നതില്‍ പ്രധാന പങ്കുവഹിക്കുന്നു. എന്നാല്‍ ഭക്ഷ്യസുരക്ഷ എന്നത് ഭക്ഷണം വിതരണം ചെയ്യുന്നതില്‍ മാത്രം ഒതുങ്ങുന്നില്ല. ഓരോ വ്യക്തിക്കും പോഷകസമൃദ്ധമായ ഭക്ഷണം താങ്ങാനാകുന്ന വിലയില്‍ ലഭിക്കുന്നുണ്ടെന്ന് ഉറപ്പാക്കുകയും വേണം.

ഒരു വശത്ത് വിശപ്പിന്റെ വേദന... മറുവശത്ത് വിവാഹച്ചടങ്ങുകളിലും ഹോട്ടലുകളിലും വീടുകളിലും പാഴാകുന്ന ഭക്ഷണം. ഈ വൈരുധ്യം അവസാനിപ്പിക്കാന്‍ ഓരോ വ്യക്തിക്കും ഉത്തരവാദിത്തമുണ്ട്.

ആവശ്യത്തിന് മാത്രം ഭക്ഷണം വിളമ്പുക, ശേഷിക്കുന്ന ഭക്ഷണം സുരക്ഷിതമായി സൂക്ഷിക്കുക, ഉപയോഗയോഗ്യമായ അധികഭക്ഷണം ഉത്തരവാദിത്തത്തോടെ വിതരണം ചെയ്യുക, ഭക്ഷണം ഉല്‍പ്പാദിപ്പിക്കുന്ന കര്‍ഷകരെ പിന്തുണയ്ക്കുക... ചെറിയ പ്രവര്‍ത്തനങ്ങളിലൂടെ വലിയ മാറ്റങ്ങള്‍ സൃഷ്ടിക്കാനാകും.

അതോടൊപ്പം ഭക്ഷ്യധാന്യങ്ങളുടെ സംഭരണം മെച്ചപ്പെടുത്തുകയും വിളവെടുപ്പിനു ശേഷമുള്ള നഷ്ടം കുറയ്ക്കുകയും കര്‍ഷകര്‍ക്ക് ന്യായമായ വരുമാനം ഉറപ്പാക്കുകയും വേണം. ഭക്ഷണം പാഴാക്കാതിരിക്കുക എന്നത് ഒരു വ്യക്തിയുടെ ശീലമെന്നതിലുപരി സമൂഹത്തിന്റെ കൂട്ടുത്തരവാദിത്തമാണ്.

വിശപ്പില്ലാത്ത ലോകം സൃഷ്ടിക്കുക എന്നത് ഒരു ദിവസത്തെ ആചരണത്തിലൂടെ പൂര്‍ത്തിയാക്കാവുന്ന ലക്ഷ്യമല്ല. അതിന് സര്‍ക്കാരുകളുടെ നയങ്ങളും കര്‍ഷകരുടെ അധ്വാനവും ശാസ്ത്രീയമായ ഭക്ഷ്യസംവിധാനങ്ങളും പൊതുസമൂഹത്തിന്റെ ഇടപെടലുകളും ഒരുപോലെ ആവശ്യമാണ്.

കാലാവസ്ഥാ വ്യതിയാനത്തെ അതിജീവിക്കുന്ന കൃഷിരീതികള്‍, ഭക്ഷ്യവിതരണത്തിലെ കാര്യക്ഷമത, പോഷകാഹാരത്തെക്കുറിച്ചുള്ള അവബോധം, ഭക്ഷ്യനഷ്ടം കുറയ്ക്കാനുള്ള നടപടികള്‍ എന്നിവയ്ക്ക് പ്രാധാന്യം നല്‍കണം.

വിശപ്പില്ലാത്ത ലോകം എന്നത് ഭക്ഷണം ലഭിക്കുന്ന ലോകം മാത്രമല്ല; എല്ലാവര്‍ക്കും സുരക്ഷിതവും പോഷകസമൃദ്ധവുമായ ഭക്ഷണം അന്തസ്സോടെ ലഭിക്കുന്ന ലോകം കൂടിയാണ്.

വിശപ്പിന്റെ വില അറിയുന്നത് വിശക്കുന്നവര്‍ക്കാണ്. ഒരു നേരത്തെ ഭക്ഷണം ഒരാള്‍ക്ക് നല്‍കുന്ന ആശ്വാസം ചിലപ്പോള്‍ വാക്കുകള്‍ക്കതീതമാണ്.

ഭക്ഷണം പാഴാക്കാതിരിക്കാം... ഭക്ഷണം ആവശ്യമുള്ളവരിലേക്ക് എത്തിക്കാം... ഭക്ഷ്യസുരക്ഷയ്ക്കായി കൈകോര്‍ക്കാം. വിശപ്പില്ലാത്ത ലോകം ഒരു സ്വപ്നമായി തുടരരുത്. അതൊരു യാഥാര്‍ഥ്യമാകണം. ലോക ഭക്ഷ്യദിനം നല്‍കുന്ന സന്ദേശവും അതുതന്നെ.