വിപുലീകൃത ജില്ലാ കമ്മിറ്റി യോഗത്തില്‍ പിണറായി വിജയന് വിമര്‍ശനം , മാസപ്പടി കേസില്‍ പിണറായി വിജയന്‍ യഥാസമയം പ്രതികരിച്ചില്ല

2026-10-20

മാസപ്പടി കേസില്‍ പിണറായി വിജയന്‍ യഥാസമയം പ്രതികരിക്കാതിരുന്നത് പാര്‍ട്ടിക്കുള്ളിലും അണികള്‍ക്കിടയിലും വലിയ ആശയക്കുഴപ്പമുണ്ടാക്കിയതായി സിപിഎം കണ്ണൂര്‍ ജില്ലാ കമ്മിറ്റിയില്‍ രൂക്ഷ വിമര്‍ശനം. പാര്‍ട്ടി പ്രതിരോധത്തിലാകുന്ന പല വിഷയങ്ങളിലും നേതൃത്വത്തിന്റെ ഭാഗത്തുനിന്നുള്ള പ്രതികരണം വൈകുന്നത് വലിയ രാഷ്ട്രീയ പ്രതിസന്ധി സൃഷ്ടിക്കുന്നുണ്ടെന്ന വിമര്‍ശനമാണ് പിണറായി വിജയന്‍ പങ്കെടുത്ത വിപുലീകൃത ജില്ലാ കമ്മിറ്റി യോഗത്തില്‍ തന്നെ ഉയര്‍ന്നത്

സി.എം.ആര്‍.എല്‍  - എക്‌സാലോജിക് ഇടപാടുമായി ബന്ധപ്പെട്ട മാസപ്പടി കേസില്‍ പിണറായി വിജയന്‍ കൃത്യസമയത്ത് നിലപാട് വ്യക്തമാക്കാത്തത് രാഷ്ട്രീയ എതിരാളികള്‍ക്ക് പുകമറ സൃഷ്ടിക്കാന്‍ സഹായകരമായെന്ന് യോഗത്തില്‍ പ്രതിനിധികള്‍ വിമര്ശനമുയര്‍ത്തി .  വിവാദങ്ങള്‍ കത്തിപ്പടര്‍ന്നപ്പോള്‍ താഴെത്തട്ടിലുള്ള അണികള്‍ക്ക് കൃത്യമായ മറുപടി നല്‍കാന്‍ സാധിക്കാതെ വന്നത് പാര്‍ട്ടിയെ പ്രതിരോധത്തിലാക്കിയെന്നും ഇത് വലിയ ആശയക്കുഴപ്പത്തിന് വഴിവെച്ചെന്നും പ്രതിനിധികള്‍ തുറന്നടിച്ചു . സംഘടനാപരമായ വീഴ്ചകളില്‍ താഴേത്തട്ടിലുള്ള ഘടകങ്ങളെ മാത്രം കുറ്റപ്പെടുത്തുന്ന ജില്ലാ സെക്രട്ടറിയുടെ നിലപാടിനെയും യോഗത്തില്‍ പ്രതിനിധികള്‍ ശക്തമായി ചോദ്യം ചെയ്തു . വിവാദമായ മാസപ്പടി കേസില്‍ എന്‍ഫോഴ്‌സ്‌മെന്റ് ഡയറക്ടറേറ്റ്  അന്വേഷണം ഊര്‍ജിതമാക്കുകയും പിണറായി വിജയന് ചോദ്യം ചെയ്യലിന് ഹാജരാകാന്‍ സമന്‍സ് അയക്കുകയും ചെയ്തിട്ടുണ്ട്. കേസില്‍ വിജിലന്‍സ് അന്വേഷണം നടത്താനുള്ള ഹൈക്കോടതി സിംഗിള്‍ ബെഞ്ച് ഉത്തരവിനെതിരെ പിണറായി വിജയന്‍, മകള്‍ ടി. വീണ, മുഹമ്മദ് റിയാസ് എന്നിവര്‍ സുപ്രീം കോടതിയെ സമീപിച്ചിരിക്കുകയാണ്. ഈ അപ്പീലുകള്‍ സുപ്രീം കോടതിയുടെ പ്രത്യേക ബെഞ്ച് പരിഗണിക്കാന്‍ നിശ്ചയിച്ചിട്ടുണ്ട് .