ഇസ്രായേല്‍ വിധി എഴുതുന്നു, എന്താകും നെതന്യാഹുവിന്റെ രാഷ്ട്രീയ ഭാവി ? യുദ്ധാനന്തര രാഷ്ട്രീയ ഭാവിയും നെതന്യാഹുവിന്റെ ഭാവിവിധിയും

2026-10-26

ഒക്ടോബര്‍ 27-ന് ഇസ്രായേലികള്‍ വോട്ടുചെയ്യാന്‍ ഒരുങ്ങുമ്പോള്‍ രാജ്യം ചരിത്രപരമായ ഒരു വഴിതിരിവിലാണ്. 2023 ഒക്ടോബര്‍ 7-ന് ഹമാസിന്റെ നേതൃത്വത്തില്‍ നടന്ന ആക്രമണത്തിനും ഗാസ, ലെബനന്‍, ഇറാന്‍ എന്നിവിടങ്ങളിലെ യുദ്ധങ്ങള്‍ക്കും ശേഷമുള്ള ആദ്യ ദേശീയ തെരഞ്ഞെടുപ്പാണിത്. രാജ്യത്ത് ഏറ്റവും കൂടുതല്‍ കാലം പ്രധാനമന്ത്രിയായിരുന്ന ബെഞ്ചമിന്‍ നെതന്യാഹുവിന്റെ രാഷ്ട്രീയ ഭാവിയും ഈ തിരഞ്ഞെടുപ്പില്‍ വ്യക്തമാകും. ആരാണ് രാജ്യത്തെ നയിക്കേണ്ടത് എന്നതിലുപരി ഇസ്രായേല്‍ ഏത് ദിശയിലേക്കാണ് സഞ്ചരിക്കുന്നത് എന്നതിനെക്കൂടി നിര്‍ണയിക്കുന്ന ഒന്നായി  ഈ തിരഞ്ഞെടുപ്പ് മാറും. 

മഴവില്ലുപോലെ മാറിമറിഞ്ഞ രാഷ്ട്രീയ വടംവലികള്‍ക്കും ചരിത്രത്തിലെ ഏറ്റവും വലിയ സുരക്ഷാ പ്രതിസന്ധികള്‍ക്കും ഒടുവില്‍ ഇസ്രായേല്‍ ജനത ജനവിധിക്കായി ബൂത്തുകളിലേക്ക് നീങ്ങുകയാണ്. 2023 ഒക്ടോബര്‍ 7-ന്റെ ഞെട്ടലില്‍ നിന്നും തുടര്‍ന്നുവന്ന യുദ്ധങ്ങളുടെ മുറിവുകളില്‍ നിന്നും മുക്തമാകാത്ത അന്തരീക്ഷത്തിലാണ് ഒക്ടോബര്‍ 27-ലെ ജനവിധി. ബെഞ്ചമിന്‍ നെതന്യാഹു എന്ന രാഷ്ട്രീയ തന്ത്രജ്ഞന്റെ ഭാവി നിര്‍ണ്ണയിക്കുന്ന, ഈ വോട്ടെടുപ്പ് ഇസ്രായേലിന്റെ ചരിത്രത്തിലെ തന്നെ ഏറ്റവും നിര്‍ണ്ണായകമായ ഒരു അധ്യായത്തിനാണ് തുടക്കമിടുന്നത്.

ഇസ്രായേലിലെ ആനുപാതിക പ്രാതിനിധ്യ രീതി പ്രകാരം വോട്ടര്‍മാര്‍ വ്യക്തിഗത സ്ഥാനാര്‍ത്ഥികള്‍ക്കല്ല, പാര്‍ട്ടി ലിസ്റ്റുകള്‍ക്കാണ് വോട്ട് ചെയ്യുന്നത്. 3.25% വോട്ട് പരിധി കടക്കുന്ന പാര്‍ട്ടികള്‍ക്കാണ് 120 സീറ്റുകളുള്ള നെസെറ്റില്‍ പ്രവേശനം ലഭിക്കുന്നത്. നെതന്യാഹുവിന്റെ വലതുപക്ഷ ലിക്കുഡ് പാര്‍ട്ടിയും മുന്‍ സൈനിക മേധാവി ഗാഡി ഐസന്‍കോട്ട് നയിക്കുന്ന പുതിയ സെന്ററിസ്റ്റ് പാര്‍ട്ടിയായ യാഷാറുമാണ് മത്സരരംഗത്തെ പ്രധാന ശക്തികള്‍. വിവിധ അഭിപ്രായ സര്‍വേകള്‍ പ്രകാരം ഇരുപക്ഷത്തിനും തനിച്ച് ഭൂരിപക്ഷം ലഭിക്കാന്‍ സാധ്യതയില്ലെന്നും സര്‍ക്കാര്‍ രൂപീകരണത്തിന് സഖ്യകക്ഷികളെ ആശ്രയിക്കേണ്ടി വരുമെന്നുമാണ് വ്യക്തമാകുന്നത്. സഖ്യരൂപീകരണത്തിലെ സങ്കീര്‍ണതകള്‍ കാരണം തെരഞ്ഞെടുപ്പ് ഫലം വന്ന് ആഴ്ചകള്‍ കഴിഞ്ഞാലും വ്യക്തത വരാത്ത സാഹചര്യം നിലവിലുണ്ട്.

സുരക്ഷയും ഒക്ടോബര്‍ 7-ലെ സുരക്ഷാ വീഴ്ചകളും പ്രധാന ചര്‍ച്ചയാകുമ്പോഴും ഭൂരിഭാഗം വോട്ടര്‍മാരുടെയും മുഖ്യ ആശങ്ക ജീവിതച്ചെലവും സാമ്പത്തിക വ്യവസ്ഥയുമാണ്. തീവ്ര ഓര്‍ത്തഡോക്സ് വിഭാഗത്തിന് സൈനിക സേവനത്തില്‍ ലഭിക്കുന്ന ഇളവുകളും റിസര്‍വ് സൈനികര്‍ അനുഭവിക്കുന്ന കനത്ത ഭാരവും വലിയ തോതില്‍ ചര്‍ച്ച ചെയ്യപ്പെടുന്നുണ്ട്. അന്താരാഷ്ട്ര ഉപരോധങ്ങളെ മറികടക്കാന്‍ ക്രിപ്റ്റോ കറന്‍സിയും ബ്ലോക്ക്ചെയിനും ഉപയോഗിക്കണമെന്ന നെതന്യാഹുവിന്റെ സമീപകാല പ്രസ്താവന സാമ്പത്തിക വിദഗ്ധരുടെ വിമര്‍ശനത്തിനും എതിരാളികളുടെ പരിഹാസത്തിനും കാരണമായിരുന്നു. 

പാലസ്തീന്‍ വിഷയത്തില്‍ കടുത്ത നിലപാടുകളുള്ള തീവ്ര വലതുപക്ഷ പങ്കാളികളെ ആശ്രയിച്ചാണ് നെതന്യാഹു സര്‍ക്കാര്‍ ഇതുവരെ മുന്നോട്ട് പോയത്. രാജ്യത്തിന്റെ സുരക്ഷ മുന്‍ നിര്‍ത്തി ഒരു പ്രതിപക്ഷ സര്‍ക്കാര്‍ അധികാരത്തില്‍ വന്നാല്‍പ്പോലും വിദേശ നയങ്ങളില്‍ സമൂലമായ മാറ്റങ്ങള്‍ ഉണ്ടാകാന്‍ സാധ്യതയില്ല. ഭരണരീതികളിലും കുടിയേറ്റക്കാരുടെ അതിക്രമങ്ങള്‍ക്കെതിരെയുള്ള നടപടികളിലും ചില മാറ്റങ്ങള്‍ ഉണ്ടായേക്കാം എന്നല്ലാതെ നിലപാടുകളില്‍ വലിയ മാറ്റങ്ങള്‍ ഉണ്ടാകില്ല. അതേസമയം നെതന്യാഹുവിനെതിരെ അന്താരാഷ്ട്ര ക്രിമിനല്‍ കോടതിയുടെ അറസ്റ്റ് വാറണ്ടും പാശ്ചാത്യ രാജ്യങ്ങളുടെ ഉപരോധങ്ങളും നിലനില്‍ക്കുന്ന സാഹചര്യത്തില്‍, തിരഞ്ഞെടുപ്പ് ഫലം ഇസ്രായേലിന്റെ നയതന്ത്ര ബന്ധങ്ങളെയും അന്താരാഷ്ട്ര നിലപാടിനെയും നിര്‍ണായകമായി സ്വാധീനിക്കും.