ലിബിയയില്‍ അനധികൃത കുടിയേറ്റം അവസാനിപ്പിക്കണമെന്ന് ട്രംപ്ദേശീയ തിരഞ്ഞെടുപ്പിലേക്ക് നീങ്ങാന്‍ ലിബിയയോട് ട്രംപിന്റെ ആഹ്വാനം, ലിബിയയുടെ പരമാധികാരം വീണ്ടെടുക്കണമെന്ന് ട്രംപ്

2026-10-26

 രാഷ്ട്രീയ വിഭജനവും അധികാരത്തര്‍ക്കവും തുടരുന്ന ലിബിയയില്‍ അനധികൃത കുടിയേറ്റം തടയണമെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. രാജ്യത്തെ ഭരണസംവിധാനങ്ങള്‍ ഏകീകരിച്ച് ദേശീയ തിരഞ്ഞെടുപ്പിലേക്ക് നീങ്ങാന്‍ അമേരിക്ക പിന്തുണ നല്‍കുമെന്നും ട്രംപ് വ്യക്തമാക്കി. എന്നാല്‍ വര്‍ഷങ്ങളായി തുടരുന്ന ആഭ്യന്തര രാഷ്ട്രീയ പ്രതിസന്ധിയും സായുധസംഘങ്ങളുടെ സ്വാധീനവും ലിബിയയുടെ മുന്നോട്ടുള്ള നീക്കങ്ങള്‍ക്ക് വെല്ലുവിളിയായി തുടരുകയാണ്. 

അനധികൃത കുടിയേറ്റം തടയണമെന്ന ആവശ്യത്തോടെയാണ് ലിബിയയോടുള്ള നിലപാട് ട്രംപ് വീണ്ടും വ്യക്തമാക്കിയത്. ലിബിയയില്‍നിന്ന് മറ്റ് രാജ്യങ്ങളിലേക്ക് കുടിയേറ്റം നടക്കുന്ന സാഹചര്യം അവസാനിപ്പിക്കണമെന്നാണ് അമേരിക്കയുടെ ആവശ്യം. ആഫ്രിക്കയില്‍നിന്നും മധ്യപൂര്‍വദേശത്തുനിന്നും യൂറോപ്പിലേക്ക് കടക്കാന്‍ ശ്രമിക്കുന്ന കുടിയേറ്റക്കാരുടെ പ്രധാന യാത്രാമാര്‍ഗങ്ങളിലൊന്നാണ് ലിബിയ.  കടല്‍മാര്‍ഗമുള്ള അപകടകരമായ യാത്രകളും കുടിയേറ്റക്കാരുടെ തടങ്കല്‍ കേന്ദ്രങ്ങളിലെ ദുരവസ്ഥയും രാജ്യാന്തര ആശങ്കകള്‍ക്ക് ഇടയാക്കുന്നുണ്ട്. ദുര്‍ബലമായ അതിര്‍ത്തി നിയന്ത്രണവും സായുധസംഘങ്ങളുടെ സ്വാധീനവും പ്രതിസന്ധി കൂടുതല്‍ സങ്കീര്‍ണമാക്കുന്നു. ഈ സാഹചര്യത്തിലാണ് അനധികൃത കുടിയേറ്റം അവസാനിപ്പിക്കണമെന്നും ലിബിയയുടെ പരമാധികാരവും ഭരണസംവിധാനങ്ങളും ശക്തിപ്പെടുത്തണമെന്നും ട്രംപ് ആവശ്യപ്പെട്ടിരിക്കുന്നത്. ട്രൂത്ത് സോഷ്യലിലെ കുറിപ്പില്‍ ലിബിയന്‍ ജനതയെ ധീരരും പ്രതിസന്ധികളെ അതിജീവിച്ചവരുമായാണ് ട്രംപ് വിശേഷിപ്പിച്ചത്. സമാധാനവും സമൃദ്ധിയും അര്‍ഹിക്കുന്ന ജനതയാണ് ലിബിയയിലേതെന്നും അദ്ദേഹം പറഞ്ഞു. ഐഎസ് ഭീകരസംഘടനയ്‌ക്കെതിരായ പോരാട്ടത്തില്‍ അമേരിക്കയും ലിബിയയും സഹകരിച്ചിട്ടുണ്ടെന്നും ട്രംപ് ചൂണ്ടിക്കാട്ടി.അതേസമയം, ലിബിയയില്‍ രാഷ്ട്രീയ ഐക്യം ഉറപ്പാക്കുക എന്നത് ഇപ്പോഴും വലിയ വെല്ലുവിളിയാണ്. 

2011ല്‍ മുഅമ്മര്‍ ഗദ്ദാഫിയുടെ ഭരണം അവസാനിച്ചതിന് പിന്നാലെയാണ് ലിബിയയില്‍ അധികാരപ്പോരും രാഷ്ട്രീയ അസ്ഥിരതയും ശക്തമായത്. നിലവില്‍ രാജ്യത്തിന്റെ പടിഞ്ഞാറന്‍ മേഖലയില്‍ ഐക്യരാഷ്ട്രസഭ അംഗീകരിച്ച അബ്ദുല്‍ ഹമീദ് ദ്‌ബൈബയുടെ നേതൃത്വത്തിലുള്ള സര്‍ക്കാരും കിഴക്കന്‍ മേഖലയില്‍ ഒസാമ ഹമാദിന്റെ നേതൃത്വത്തിലുള്ള സമാന്തര ഭരണകൂടവുമാണ് പ്രവര്‍ത്തിക്കുന്നത്. ഖലീഫ ഹഫ്തറിന്റെ സായുധസേനയ്ക്ക് കിഴക്കന്‍ മേഖലയില്‍ വലിയ സ്വാധീനമുണ്ട്. 

2021 ഡിസംബറില്‍ നടത്താന്‍ നിശ്ചയിച്ചിരുന്ന ദേശീയ തിരഞ്ഞെടുപ്പ് നിയമപരവും ഭരണഘടനാപരവുമായ തര്‍ക്കങ്ങളെ തുടര്‍ന്ന് മാറ്റിവെക്കുകയായിരുന്നു. തിരഞ്ഞെടുപ്പ് നടത്താനുള്ള ചട്ടക്കൂടിലും ഏകീകൃത ഇടക്കാല സര്‍ക്കാര്‍ രൂപീകരിക്കുന്നതിലും രാഷ്ട്രീയ വിഭാഗങ്ങള്‍ക്കിടയില്‍ ഇപ്പോഴും അഭിപ്രായവ്യത്യാസങ്ങളുണ്ട്. ഐക്യരാഷ്ട്രസഭയുടെ നേതൃത്വത്തില്‍ രാഷ്ട്രീയ ധാരണയ്ക്കും തിരഞ്ഞെടുപ്പിലേക്കുള്ള വഴിയൊരുക്കാനും ശ്രമങ്ങള്‍ തുടരുകയാണ്.