കര്‍ണാടകയിലെ ഒളിക്യാമറാ വിവാദം, കൃപ ആല്‍വയെ പാര്‍ട്ടിയില്‍ നിന്ന് പുറത്താക്കി കെ.പി.സി.സി

2026-10-31

മുന്‍ മുഖ്യമന്ത്രി സിദ്ധരാമയ്യ ഉള്‍പ്പടെ കര്‍ണാടകയിലെ  കോണ്‍ഗ്രസ് നേതാക്കള്‍ക്കെതിരായ വ്യാജ  ഒളിക്യാമറാ ഓപ്പറേഷനുമായി ദൃശ്യങ്ങളുമായി ബന്ധപ്പെട്ട വിവാദത്തില്‍  കെ.പി.സി.സി മുന്‍   ജനറല്‍ സെക്രട്ടറി കൃപ ആല്‍വയെ പാര്‍ട്ടിയില്‍ നിന്ന് പുറത്താക്കി. ആറ് വര്‍ഷത്തേക്കാണ് പുറത്താക്കല്‍ നടപടി. നടപടി  പ്രാബല്യത്തില്‍ വവന്നതായും  കെ.പി.സി.സി അറിയിച്ചു.

മുന്‍ കര്‍ണാടക മുഖ്യമന്ത്രി സിദ്ധരാമയ്യയെ ലക്ഷ്യമിട്ടുള്ള അപകീര്‍ത്തികരമായ വീഡിയോ വിവാദത്തിലാണ് കര്‍ണാടകം പ്രദേശ് കോണ്‍ഗ്രസ് കമ്മിറ്റി നടപടി എടുത്തത് . ഒളിക്യാമറാ ഓപ്പറേഷനില്‍ കൃപ ആല്‍വയുടെ പേര് ഉയര്‍ന്നുവന്നതും പാര്‍ട്ടിവിരുദ്ധ പ്രവര്‍ത്തനങ്ങളില്‍ ഏര്‍പ്പെട്ടുവെന്ന ആരോപണവുമാണ് നടപടിക്ക് കാരണമായി കെ.പി.സി.സി ചൂണ്ടിക്കാട്ടുന്നത്. വിവാദം പാര്‍ട്ടിക്ക് മോശം പ്രചാരണത്തിനും മാധ്യമങ്ങളില്‍ പ്രതികൂല വാര്‍ത്തകള്‍ക്കും ഇടയാക്കിയെന്നും കെ.പി.സി.സി വൈസ് പ്രസിഡന്റ് എം. നാരായണസ്വാമി പുറത്തിറക്കിയ ഉത്തരവില്‍ പറയുന്നു. ആരോപണങ്ങളില്‍ വിശദീകരണം തേടി നേരത്തെ കൃപ ആല്‍വയ്ക്ക് കാരണം കാണിക്കല്‍ നോട്ടീസ് നല്‍കിയിരുന്നു. എന്നാല്‍ ഇതുവരെ മറുപടി ലഭിച്ചിട്ടില്ലെന്നാണ് പാര്‍ട്ടിയുടെ വിശദീകരണം. അതേസമയം, വീഡിയോയ്ക്ക് പിന്നില്‍ കൃപ ആല്‍വയാണെന്ന് സിദ്ധരാമയ്യ ആരോപിച്ചിരുന്നു. വീഡിയോയില്‍ ഉന്നയിച്ച ലൈംഗിക പീഡന ആരോപണം കെട്ടിച്ചമച്ചതും ആസൂത്രിതമായി തയ്യാറാക്കിയതുമായ കഥയാണെന്നാണ് ബെംഗളൂരു പോലീസിന്റെ പ്രാഥമിക കണ്ടെത്തല്‍. സംഭവത്തില്‍ പോലീസ് അന്വേഷണം തുടരുകയാണ്.