GENERAL NEWS
യൂറോപ്പില് തിരിച്ചെത്തുന്നു നിര്ബന്ധിത സൈനികസേവനം പ്രതിഷേധവുമായി യുവാക്കള്
2026-11-21
യുക്രെയ്ന് യുദ്ധം സൃഷ്ടിച്ച സുരക്ഷാ ആശങ്കകള്ക്കിടെ യൂറോപ്പില് നിര്ബന്ധിത സൈനികസേവനം വീണ്ടും ചര്ച്ചയാകുന്നു. റഷ്യയില്നിന്നുള്ള ഭീഷണി നേരിടാന് സൈനികശേഷി വര്ധിപ്പിക്കുന്നതിന്റെ ഭാഗമായി വിവിധ രാജ്യങ്ങള് പുതിയ നടപടികള് ആരംഭിച്ചു. ജര്മനിയില് സൈനികസേവന നിയമം പരിഷ്കരിച്ചപ്പോള് ക്രൊയേഷ്യ നിര്ബന്ധിത സൈനികസേവനം പുനരാരംഭിച്ചു. ഡെന്മാര്ക്കില് സ്ത്രീകളെയും സൈനികസേവന സംവിധാനത്തില് ഉള്പ്പെടുത്തി. ഇതിനിടെ നിര്ബന്ധിത സൈനികസേവനത്തിനും പ്രതിരോധച്ചെലവ് വര്ധിപ്പിക്കുന്നതിനുമെതിരെ യൂറോപ്പിലെ വിവിധ രാജ്യങ്ങളില് വിദ്യാര്ഥികള് തെരുവിലിറങ്ങി.
യൂറോപ്പിലെ യുവാക്കള് വീണ്ടും സൈനിക പരിശീലന കേന്ദ്രങ്ങളിലേക്ക് എത്തുകയാണ്. വര്ഷങ്ങള്ക്കുമുമ്പ് നിര്ബന്ധിത സൈനികസേവനം അവസാനിപ്പിച്ച രാജ്യങ്ങള്പോലും പഴയ തീരുമാനം പുനഃപരിശോധിക്കുന്നു. യുക്രെയ്നിലെ റഷ്യന് അധിനിവേശം നാലാം വര്ഷവും തുടരുന്നതിനിടെയാണ് യൂറോപ്പില് ഈ മാറ്റം. റഷ്യയില്നിന്നുള്ള സുരക്ഷാഭീഷണി വര്ധിക്കുന്നുവെന്നാണ് യൂറോപ്യന് രാജ്യങ്ങളുടെ വിലയിരുത്തല്. യുദ്ധമുണ്ടായാല് നേരിടാന് ആവശ്യമായ സൈനികരെയും പരിശീലനം ലഭിച്ച കരുതല് സേനയെയും സജ്ജമാക്കുകയാണ് ലക്ഷ്യം. യൂറോപ്പിലെ പ്രധാന സാമ്പത്തികശക്തിയായ ജര്മനി സൈനികസേവന നിയമത്തില് മാറ്റം വരുത്തിയിട്ടുണ്ട്. പതിനെട്ട് വയസ്സാകുന്ന യുവാക്കളുടെ സൈനികസേവന താല്പര്യവും യോഗ്യതയും സംബന്ധിച്ച വിവരങ്ങള് ശേഖരിക്കുന്ന സംവിധാനം ഈ വര്ഷം ആരംഭിച്ചു. പുരുഷ•ാര്ക്ക് ചോദ്യാവലിക്ക് മറുപടി നല്കുന്നത് നിര്ബന്ധമാണ്. എന്നാല് സൈന്യത്തില് ചേരുന്നത് നിലവില് നിര്ബന്ധമാക്കിയിട്ടില്ല.
സന്നദ്ധസേവനത്തിലൂടെ ആവശ്യത്തിന് സൈനികരെ കണ്ടെത്താനായില്ലെങ്കില് നിര്ബന്ധിത സേവനം ഏര്പ്പെടുത്താനുള്ള സാധ്യതയും ജര്മനി നിലനിര്ത്തിയിട്ടുണ്ട്. 2035-ഓടെ സൈനികരുടെ എണ്ണം രണ്ടുലക്ഷത്തി അറുപതിനായിരമായി ഉയര്ത്താനാണ് ജര്മനിയുടെ ലക്ഷ്യം.
ക്രൊയേഷ്യയില് സ്ഥിതി വ്യത്യസ്തമാണ്.
2008-ല് നിര്ത്തിവച്ച നിര്ബന്ധിത സൈനികസേവനം രാജ്യം വീണ്ടും ആരംഭിച്ചു. ഈ വര്ഷം മാര്ച്ചില് ആദ്യ സംഘത്തിലെ യുവാക്കള് പരിശീലനത്തിനെത്തി. രണ്ട് മാസമാണ് അടിസ്ഥാന സൈനിക പരിശീലനം. ഡെന്മാര്ക്കും സൈനികസേവന സംവിധാനത്തില് വലിയ മാറ്റങ്ങള് വരുത്തി. നാല് മാസമായിരുന്ന സേവനകാലം പതിനൊന്ന് മാസമായി ഉയര്ത്തി. സ്ത്രീകളെയും നിര്ബന്ധിത സൈനികസേവനത്തിന് പരിഗണിക്കുന്ന സംവിധാനത്തിലേക്ക് കൊണ്ടുവന്നു. ഫിന്ലന്ഡ്, സ്വീഡന്, എസ്റ്റോണിയ, ലാത്വിയ, ലിത്വാനിയ തുടങ്ങിയ രാജ്യങ്ങളിലും വിവിധ രീതികളിലുള്ള നിര്ബന്ധിത സൈനികസേവന സംവിധാനങ്ങള് നിലവിലുണ്ട്. അതേസമയം ഫ്രാന്സ് യുവാക്കള്ക്കായി പത്ത് മാസത്തെ സന്നദ്ധ സൈനികസേവന പദ്ധതിയാണ് പ്രഖ്യാപിച്ചത്. നിര്ബന്ധിത സൈനികസേവനം പുനഃസ്ഥാപിക്കില്ലെന്നാണ് ഫ്രഞ്ച് സര്ക്കാരിന്റെ നിലപാട്.
യൂറോപ്പിലെ സൈനികശേഷി വര്ധിപ്പിക്കാനുള്ള നീക്കങ്ങള്ക്കൊപ്പം പ്രതിഷേധങ്ങളും ശക്തമാകുന്നുണ്ട്. നവംബര് ഇരുപതിന് യൂറോപ്പിലെ ഇരുപത്തിയഞ്ചിലധികം രാജ്യങ്ങളില് വിദ്യാര്ഥികളും യുവാക്കളും പ്രതിഷേധ പരിപാടികള് സംഘടിപ്പിച്ചു. ജര്മനിയിലെ എഴുപത്തിമൂന്ന് നഗരങ്ങളിലും പട്ടണങ്ങളിലും പ്രതിഷേധങ്ങള് നടന്നതായി സംഘാടകര് അറിയിച്ചു. വിദ്യാഭ്യാസത്തിനുള്ള ധനസഹായം വര്ധിപ്പിക്കുക, ജീവിതച്ചെലവ് നിയന്ത്രിക്കുക തുടങ്ങിയ ആവശ്യങ്ങള്ക്കൊപ്പം നിര്ബന്ധിത സൈനികസേവനത്തിനെതിരായ പ്രതിഷേധവും ഉയര്ന്നു. സുരക്ഷ ഉറപ്പാക്കാന് കൂടുതല് സൈനികര് വേണമെന്നാണ് സര്ക്കാരുകളുടെ വാദം. എന്നാല് നിര്ബന്ധിത സൈനികസേവനം യുവാക്കളുടെ പഠനത്തെയും തൊഴില്ജീവിതത്തെയും ബാധിക്കുമെന്ന ആശങ്കയും നിലനില്ക്കുന്നു. സൈനികസേവനത്തെ എതിര്ക്കുന്നവര്ക്ക് ബദല് പൊതുസേവന അവസരങ്ങള് നല്കുന്നതിനെക്കുറിച്ചും ജര്മനിയില് ചര്ച്ച നടക്കുന്നുണ്ട്. ശീതയുദ്ധം അവസാനിച്ചതോടെ പല യൂറോപ്യന് രാജ്യങ്ങളും നിര്ബന്ധിത സൈനികസേവനം ഉപേക്ഷിച്ചിരുന്നു. എന്നാല് യുക്രെയ്ന് യുദ്ധവും യൂറോപ്പിലെ മാറിയ സുരക്ഷാസാഹചര്യവും ആ തീരുമാനങ്ങള് വീണ്ടും പരിശോധിക്കാന് രാജ്യങ്ങളെ പ്രേരിപ്പിക്കുകയാണ്. പ്രതിരോധശേഷി വര്ധിപ്പിക്കാനുള്ള നടപടികളാണ് സ്വീകരിക്കുന്നതെന്നാണ് യൂറോപ്യന് സര്ക്കാരുകള് വ്യക്തമാക്കുന്നത്. അതേസമയം സൈനികസേവനത്തിന് യുവാക്കളെ നിര്ബന്ധിക്കണമോ എന്ന ചോദ്യം യൂറോപ്പില് വലിയ സാമൂഹിക ചര്ച്ചയായി മാറിയിരിക്കുകയാണ്. യുദ്ധം തടയാന് സൈനികശേഷി വര്ധിപ്പിക്കണമെന്ന് സര്ക്കാരുകള് പറയുമ്പോള്, അതിന്റെ ഉത്തരവാദിത്വം യുവതലമുറ എത്രത്തോളം ഏറ്റെടുക്കണമെന്ന ചോദ്യമാണ് യൂറോപ്പില് ഉയരുന്നത്.
News
അപവാദപ്രചരണങ്ങളെ അപലപിച്ച് കാഞ്ഞിരപ്പള്ളി രൂപത വൈദികസമ്മേളനം
സോഷ്യല് മീഡിയ അക്കൗണ്ടുകള് തടഞ്ഞു, മെറ്റയ്ക്കെതിരെ യൂത്ത് കോണ്ഗ്രസ് പ്രതിഷേധം, 21 പ്രവര്ത്തകരെ ...
പത്മജയുടെ കാര്യത്തില് തിടുക്കപ്പെട്ട് തീരുമാനം വേണ്ടെന്ന് ഹൈക്കമാന്ഡും
മൂവാറ്റുപുഴയില് എം.ഡി.എം.എയുമായി മൂന്ന് യുവാക്കള് എക്സൈസ് പിടിയില്
അന്വേഷണം നടക്കും, ഫുട്ബോള് സ്പോണ്സര്ഷിപ്പ് അന്വേഷണം നടക്കട്ടെയെന്ന് ആഭ്യന്തര മന്ത്രി
കോണ്ഗ്രസിലേക്കില്ലെന്ന് കെ വി തോമസ്
ഇന്ത്യയെ കാത്തിരിക്കുന്ന ആ നിശ്ശബ്ദ പ്രതിസന്ധി, തളരുന്ന തൊഴില്വിപണിയും അകലുന്ന കുടുംബ ബന്ധങ്ങളും
സി.എം.ഐ. നാഷണല് മീഡിയ കോണ്ക്ലേവ് 2026-ആരംഭിച്ചു, 'പ്രിന്റിങ് പ്രസ് മുതല് ഡിജിറ്റല് പള്പ്പിറ്റ് വരെ' പ്രമേയം, ...
