ഇറാനെതിരെ പുതിയ യുദ്ധത്തിന് നീക്കമെന്ന് റിപ്പോര്‍ട്ട്, ഗള്‍ഫ് രാജ്യങ്ങള്‍ക്ക് ജാഗ്രതാ നിര്‍ദേശം നല്‍കി അമേരിക്ക, യുദ്ധത്തിന് അമേരിക്ക ചെലവിട്ടത് 47.1 ബില്യണ്‍ ഡോളറെന്ന് റിപ്പോര്‍ട്ട്

2026-10-28

നവംബര്‍ മൂന്നിന് നടക്കുന്ന ഇടക്കാല തിരഞ്ഞെടുപ്പിന് ശേഷം ഇറാനെതിരെ വീണ്ടും സൈനികാക്രമണം നടത്താന്‍ അമേരിക്ക തയ്യാറെടുക്കുന്നതായി റിപ്പോര്‍ട്ട്. ആക്രമണസാധ്യത കണക്കിലെടുത്ത് ഗള്‍ഫ് രാജ്യങ്ങള്‍ക്ക് അമേരിക്ക മുന്നറിയിപ്പ് നല്‍കി. അതേസമയം, ഇറാനെതിരായ യുദ്ധത്തിന് അമേരിക്ക ചെലവിട്ട തുക 47.1 ബില്യണ്‍ ഡോളറിലെത്തിയതായും റിപ്പോര്‍ട്ടുകളുണ്ട്.

നവംബര്‍ മൂന്നിന് നടക്കുന്ന അമേരിക്കന്‍ ഇടക്കാല തിരഞ്ഞെടുപ്പിന് ശേഷം ഇറാനെതിരെ പുതിയ സൈനിക നീക്കം ഉണ്ടായേക്കുമെന്നാണ് റിപ്പോര്‍ട്ട്. ഇതിന്റെ ഭാഗമായി, ആക്രമണസാധ്യത മുന്നില്‍ക്കണ്ട് തയ്യാറെടുക്കാന്‍ ചില ഗള്‍ഫ് അറബ് രാജ്യങ്ങള്‍ക്ക് അമേരിക്ക മുന്നറിയിപ്പ് നല്‍കിയതായാണ് വാള്‍ സ്ട്രീറ്റ് ജേണല്‍ റിപ്പോര്‍ട്ട് ചെയ്യുന്നത്. ടെക്‌സസില്‍നിന്ന് പാട്രിയറ്റ് വ്യോമപ്രതിരോധ സംവിധാനം മേഖലയില്‍ എത്തിക്കാനും ഇറാന്റെ തിരിച്ചടിക്ക് സാധ്യതയുള്ള താവളങ്ങളില്‍നിന്ന് സൈനികരെ മാറ്റാനും അമേരിക്ക നീക്കം നടത്തുന്നുവെന്നും റിപ്പോര്‍ട്ടിലുണ്ട്. എന്നാല്‍, ആക്രമണത്തിന് പ്രസിഡന്റ് ഡോണള്‍ഡ് ട്രംപ് അന്തിമ അനുമതി നല്‍കിയതായി സ്ഥിരീകരിച്ചിട്ടില്ല. സൈനിക നടപടിയെക്കുറിച്ച് പ്രതികരിക്കാന്‍ വൈറ്റ് ഹൗസ് തയ്യാറായില്ലെങ്കിലും ഇറാന് ആണവായുധം ലഭിക്കുന്നത് തടയാന്‍ എല്ലാ വഴികളും തുറന്നിട്ടുണ്ടെന്ന് വ്യക്തമാക്കി. അതേസമയം, യുദ്ധത്തിന്റെ സാമ്പത്തികഭാരം അമേരിക്കയ്ക്ക് വലിയ വെല്ലുവിളിയാകുകയാണെന്നും റിപ്പോര്‍ട്ടുകളുണ്ട്. ഒക്ടോബര്‍ 16 വരെയുള്ള കണക്കനുസരിച്ച് ഇറാനെതിരായ യുദ്ധത്തിന് 47.1 ബില്യണ്‍ ഡോളര്‍ ചെലവായതായി പെന്റഗണ്‍ കോണ്‍ഗ്രസിനെ അറിയിച്ചെന്നാണ് റിപ്പോര്‍ട്ട്. ഇതില്‍ 60 ശതമാനത്തിലേറെയും ബോംബുകള്‍, മിസൈലുകള്‍, മറ്റ് ആയുധങ്ങള്‍ എന്നിവയ്ക്കായാണ് ചെലവിട്ടത്. വ്യോമസേനയുടെ ചെലവ് 7.6 ബില്യണ്‍ ഡോളറും നാവികസേനയുടേത് 1.5 ബില്യണ്‍ ഡോളറുമാണ്. മേഖലയില്‍ സൈനികരെ നിലനിര്‍ത്താന്‍ കരസേനയ്ക്ക് 2.1 ബില്യണ്‍ ഡോളറും ചെലവായതായി റിപ്പോര്‍ട്ടുകള്‍ പറയുന്നു. പുതിയ ആക്രമണസാധ്യതകള്‍ക്കിടയില്‍ യുദ്ധച്ചെലവ് ഉയരുന്നതും അമേരിക്കയ്ക്ക് മറ്റൊരു സമ്മര്‍ദമായി മാറുകയാണ്