ബെല്‍ഗ്രേഡില്‍ ഇസ്രായേല്‍ എംബസിക്ക് നേരെ ഭീകരാക്രമണം, കത്തിയുമായി എത്തിയ അക്രമി സുരക്ഷാ ഉദ്യോഗസ്ഥനെ ആക്രമിച്ചു, അക്രമിയെ സുരക്ഷാ ഉദ്യോഗസ്ഥന്‍ വെടിവെച്ച് കൊലപ്പെടുത്തി , സുരക്ഷാ ഉദ്യോഗസ്ഥന് പരിക്ക്; എംബസി ജീവനക്കാര്‍ സുരക്ഷിതര്‍

2026-10-28

 സെര്‍ബിയയുടെ തലസ്ഥാനമായ ബെല്‍ഗ്രേഡിലെ ഇസ്രയേല്‍ എംബസിക്ക് നേരെ ഭീകരാക്രമണശ്രമം. കത്തിയുമായി എത്തിയ അക്രമി സുരക്ഷാ ഉദ്യോഗസ്ഥനെ ആക്രമിച്ചു. ഉദ്യോഗസ്ഥന്‍ സ്വയംരക്ഷയ്ക്കായി നടത്തിയ വെടിവെപ്പില്‍ അക്രമി കൊല്ലപ്പെട്ടു. സംഭവത്തെ ഭീകരാക്രമണമായി കണക്കാക്കുന്നതായി സെര്‍ബിയന്‍ അധികൃതര്‍ അറിയിച്ചു

ബുധനാഴ്ച അര്‍ധരാത്രിക്ക് ശേഷമാണ് ബെല്‍ഗ്രേഡിലെ ഇസ്രയേല്‍ എംബസിക്ക് പുറത്ത് ആക്രമണമുണ്ടായത്. രണ്ട് കത്തികളുമായി എത്തിയ അക്രമി എംബസിക്ക് കാവല്‍ നിന്നിരുന്ന സെര്‍ബിയന്‍ ജെന്‍ഡര്‍മറി ഉദ്യോഗസ്ഥനെ ആക്രമിക്കുകയായിരുന്നു. അക്രമിയെ തടയുന്നതിനിടെ ഉദ്യോഗസ്ഥന് തലയ്ക്ക് നേരിയ പരിക്കേറ്റു. തുടര്‍ന്ന് സ്വയംരക്ഷയ്ക്കായി നടത്തിയ വെടിവെപ്പില്‍ അക്രമി കൊല്ലപ്പെട്ടതായി സെര്‍ബിയന്‍ ആഭ്യന്തര മന്ത്രി ഇവിത്സ ദാച്ചിച്ച് അറിയിച്ചു.അക്രമി പ്രായപൂര്‍ത്തിയാകാത്തയാളാണെന്നാണ് പ്രാഥമിക വിവരം. ഇയാള്‍ ഇസ്ലാമിക് സ്റ്റേറ്റ് അനുകൂലിയായിരുന്നുവെന്നും സമൂഹമാധ്യമ അക്കൗണ്ടില്‍ സംഘടനയുടെ പതാക പ്രദര്‍ശിപ്പിച്ചിരുന്നുവെന്നും മന്ത്രി അവകാശപ്പെട്ടു. എന്നാല്‍ ആക്രമണത്തിന് പിന്നിലെ ലക്ഷ്യവും മറ്റ് സാഹചര്യങ്ങളും അന്വേഷിച്ചുവരികയാണ്. സംഭവത്തെ തുടര്‍ന്ന് സെര്‍ബിയ ഭീകരാക്രമണ ഭീഷണി ജാഗ്രത ഏറ്റവും ഉയര്‍ന്ന നിലയിലേക്ക് ഉയര്‍ത്തി. പ്രധാന കേന്ദ്രങ്ങളില്‍ സുരക്ഷ ശക്തമാക്കുകയും ചെയ്തു.ആക്രമണം നടക്കുമ്പോള്‍ എംബസി അടച്ചിട്ടിരുന്നതിനാല്‍ ജീവനക്കാര്‍ക്ക് പരിക്കേറ്റിട്ടില്ലെന്ന് ഇസ്രയേല്‍ വിദേശകാര്യ മന്ത്രാലയം വ്യക്തമാക്കി. 2024 ജൂണിലും ഇതേ എംബസിക്ക് കാവല്‍ നിന്നിരുന്ന ഉദ്യോഗസ്ഥനു നേരെ ക്രോസ്‌ബോ ഉപയോഗിച്ച് ആക്രമണം നടന്നിരുന്നു.