മുന്നണിക്കുള്ളിലെ അതൃപ്തി പ്രകടമാക്കി അടൂര്‍ പ്രകാശ്

2026-11-10

യുഡിഎഫ് യോഗം ചേരാത്തതില്‍ വീണ്ടും അതൃപ്തി പരസ്യമാക്കി മുന്നണി കണ്‍വീനര്‍ അടൂര്‍ പ്രകാശ്. യോഗം നടക്കാത്തതിന്റെ കാരണം യുഡിഎഫ് ചെയര്‍മാനായ മുഖ്യമന്ത്രി വി ഡി സതീശനോട്  ചോദിക്കണമെന്നാണ് അടൂര്‍ പ്രകാശിന്റെ പ്രതികരണം. മുന്നണിയിലെ പ്രധാന വിഷയങ്ങളില്‍ ചര്‍ച്ചകള്‍ നടക്കാത്തതും നിര്‍ണായക തീരുമാനങ്ങള്‍ കണ്‍വീനര്‍ എന്ന നിലയില്‍ തന്നെ അറിയിക്കാത്തതുമാണ് അടൂര്‍ പ്രകാശിന്റെ അതൃപ്തിക്ക് കാരണം.

യുഡിഎഫ് ചെയര്‍മാന്‍ എന്ന നിലയില്‍ മുന്നണി യോഗം വിളിക്കേണ്ട ഉത്തരവാദിത്തം മുഖ്യമന്ത്രിക്കാണെന്നാണ് അടൂര്‍ പ്രകാശിന്റെ നിലപാട്. എന്നാല്‍ യോഗം വിളിക്കുന്നതുമായി ബന്ധപ്പെട്ട് ഇതുവരെ വ്യക്തമായ നടപടികള്‍ ഉണ്ടായിട്ടില്ലെന്നാണ് അദ്ദേഹത്തിന്റെ പരാതി. മുന്നണിയില്‍ ചര്‍ച്ച ചെയ്ത് തീരുമാനിക്കേണ്ട പല വിഷയങ്ങളിലും കൂടിയാലോചനകള്‍ നടക്കുന്നില്ലെന്നും അദ്ദേഹം നേരത്തെ വിമര്‍ശിച്ചിരുന്നു. കാബിനറ്റ് പദവികള്‍ ഉള്‍പ്പെടെയുള്ള പ്രധാന നിയമനങ്ങള്‍ പോലും മാധ്യമങ്ങളിലൂടെയാണ് അറിഞ്ഞതെന്നായിരുന്നു അടൂര്‍ പ്രകാശിന്റെ മുന്‍ ആരോപണം. മുസ്ലിം ലീഗിലെ ഡോ എം കെ മുനീറിനും ഫോര്‍വേഡ് ബോര്‍ഡിലെ ജി ദേവരാജനും കാബിനറ്റ് പദവികള്‍ നല്‍കുന്നതുമായി ബന്ധപ്പെട്ട ചര്‍ച്ചകളും തീരുമാനങ്ങളും യുഡിഎഫില്‍ ചര്‍ച്ച ചെയ്തിരുന്നില്ലെന്നും അടൂര്‍ പ്രകാശ്  വ്യക്തമാക്കിയിരുന്നു. ഇത്തരം വിഷയങ്ങളില്‍ മാധ്യമപ്രവര്‍ത്തകര്‍ ചോദ്യം ഉന്നയിക്കുമ്പോള്‍ മുന്നണി കണ്‍വീനര്‍ എന്ന നിലയില്‍ മറുപടി നല്‍കാന്‍ കഴിയാത്ത സാഹചര്യമാണെന്നും അടൂര്‍ പ്രകാശ് ചൂണ്ടിക്കാട്ടി.

മുഖ്യമന്ത്രി വി.ഡി. സതീശന്റെ പ്രവര്‍ത്തനശൈലിയിലും തീരുമാനങ്ങള്‍ എടുക്കുന്ന രീതിയിലും അതൃപ്തിയുണ്ടെന്ന് അടൂര്‍ പ്രകാശ് നേരത്തെ തുറന്നുപറഞ്ഞിരുന്നു. സര്‍ക്കാരിന്റെ ദൈനംദിന  തീരുമാനങ്ങളും കണ്‍വീനറെ അറിയിക്കണമെന്ന് ആവശ്യപ്പെടുന്നില്ലെങ്കിലും മുന്നണിയെ ബാധിക്കുന്ന പ്രധാന കാര്യങ്ങളില്‍ കൂടിയാലോചനകള്‍ വേണമെന്നാണ് അദ്ദേഹത്തിന്റെ ആവശ്യം. തനിക്കുണ്ടായ അതൃപ്തി ഓള്‍ ഇന്ത്യ കോണ്‍ഗ്രസ് കമ്മിറ്റിയെ അറിയിക്കുമെന്നും അടൂര്‍ പ്രകാശ് നേരത്തെ വ്യക്തമാക്കിയിരുന്നു. മുന്നണിക്കുള്ളിലെ അഭിപ്രായവ്യത്യാസങ്ങള്‍ പരസ്യപ്രതികരണങ്ങളിലേക്ക് നീങ്ങുന്നത് കോണ്‍ഗ്രസ് നേതൃത്വത്തിനും വെല്ലുവിളിയാകുകയാണ്. പുതിയ പ്രതികരണത്തോടെ യുഡിഎഫിലെ ഏകോപനക്കുറവും നേതൃത്വങ്ങള്‍ തമ്മിലുള്ള അഭിപ്രായവ്യത്യാസങ്ങളും വീണ്ടും രാഷ്ട്രീയ ചര്‍ച്ചയായിരിക്കുകയാണ്.