രാഹുല്‍ ഗാന്ധിയ്ക്ക് മറുപടിയുമായി ബി ജെ പി പ്രധാനമന്ത്രിയോട് നന്ദി പറയാന്‍ രാഹുല്‍ ഗാന്ധി തയ്യാറാകണം

2026-11-10

പ്രധാനമന്ത്രിയെ പരസ്യ സംവാദത്തിനു വെല്ലുവിളിക്കുന്ന രാഹുല്‍ ഗാന്ധിയ്ക്ക് മറുപടിയുമായി ബി ജെ പി .  തീവ്ര ഇടതുപക്ഷ തീവ്രവാദത്തില്‍  നിന്ന് രാജ്യം ഉടന്‍ പൂര്‍ണ്ണമായും മുക്തമാകുമെന്നും അതിനായി പ്രധാനമന്ത്രി നരേന്ദ്ര മോദിയോട് നന്ദി പറയാന്‍ കോണ്‍ഗ്രസ് നേതാവ് രാഹുല്‍ ഗാന്ധി തയ്യാറാകണമെന്നും കേന്ദ്ര പാര്‍ലമെന്ററി കാര്യ മന്ത്രി കിരണ്‍ റിജിജു പ്രസ്താവിച്ചു. വാര്‍ത്താ ഏജന്‍സിയായ എ.എന്‍.ഐയ്ക്ക്  നല്‍കിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.

പ്രധാനമന്ത്രി നരേന്ദ്ര മോദിയുടെയും കേന്ദ്ര ആഭ്യന്തരമന്ത്രി അമിത് ഷായുടെയും ശക്തമായ നേതൃത്വത്തിന് കീഴില്‍ രാജ്യത്തെ മാവോയിസ്റ്റ് സ്വാധീന മേഖലകള്‍ ഗണ്യമായി കുറഞ്ഞുവെന്ന് കിരണ്‍ റിജിജു അവകാശപ്പെട്ടു . രാജ്യത്ത് മാവോയിസം അവസാന ഘട്ടത്തിലാണെന്ന യാഥാര്‍ത്ഥ്യം പ്രതിപക്ഷ നേതാവായ രാഹുല്‍ ഗാന്ധി അംഗീകരിക്കണം. മോദി സര്‍ക്കാരിന്റെ ഭരണനേട്ടങ്ങളെ എപ്പോഴും വിമര്‍ശിക്കുന്ന രാഹുല്‍, മാവോയിസ്റ്റുകളെ ഇല്ലാതാക്കിയതിന് പ്രധാനമന്ത്രിയോട് നന്ദി പറയാനുള്ള രാഷ്ട്രീയ മര്യാദ കാണിക്കണമെന്നും റിജിജു കൂട്ടിച്ചേര്‍ത്തു. രാജ്യത്തിന്റെ ആഭ്യന്തര സുരക്ഷയില്‍ യാതൊരുവിധ വിട്ടുവീഴ്ചയുമില്ലാത്ത നയമാണ് നിലവിലെ സര്‍ക്കാര്‍ സ്വീകരിക്കുന്നത്. അതിന്റെ ഫലമായാണ് പതിറ്റാണ്ടുകളായി രാജ്യം നേരിട്ട വലിയൊരു സുരക്ഷാ ഭീഷണി ഇല്ലാതാക്കാന്‍ കഴിഞ്ഞതെന്നും അദ്ദേഹം വ്യക്തമാക്കി. ഛത്തീസ്ഗഡ് ഉള്‍പ്പെടെയുള്ള സംസ്ഥാനങ്ങളില്‍ മാവോയിസ്റ്റുകള്‍ക്കെതിരെയുള്ള സുരക്ഷാ സേനയുടെ  സൈനിക നടപടികള്‍ തുടരുന്ന പശ്ചാത്തലത്തിലാണ് കേന്ദ്രമന്ത്രിയുടെ ഈ രാഷ്ട്രീയ പ്രതികരണം പുറത്തുവന്നിരിക്കുന്നത്.  ബുദ്ധിജീവി നക്സലുകള്‍ പരാമര്‍ശത്തെച്ചൊല്ലി പ്രധാനമന്ത്രി നരേന്ദ്ര മോദിയും പ്രതിപക്ഷ നേതാവ് രാഹുല്‍ ഗാന്ധിയും തമ്മില്‍ ആരംഭിച്ച വാക്‌പോര് കേന്ദ്രമന്ത്രി കിരണ്‍ റിജിജുവിന്റെ പ്രസ്താവനയോടെ ഭരണ-പ്രതിപക്ഷ കക്ഷികള്‍ക്കിടയില്‍ കടുത്ത രാഷ്ട്രീയ തര്‍ക്കമായി മാറിയിരിക്കുകയാണ് .പ്രധാനമന്ത്രി ഛത്തീസ്ഗഡില്‍ നടത്തിയ പ്രസംഗമായിരുന്നു സംഭവങ്ങളുടെ തുടക്കം . സായുധരായ നക്സലുകളെ വനങ്ങളില്‍ നിന്ന് തുടച്ചുനീക്കിയെങ്കിലും ചില രാഷ്ട്രീയ പാര്‍ട്ടികളിലും സംഘടനകളിലും കടന്നുകൂടിയ 'ദിമാഗി നക്സലുകള്‍' ഭരണഘടനയ്ക്കും ജനാധിപത്യത്തിനും എതിരെ ആളുകളെ ഇളക്കിവിടുകയാണെന്ന് പ്രധാനമന്ത്രി ആരോപിച്ചിരുന്നു . .ഇതിനെതിരെ സി.ആര്‍.പി.എഫ് ജവാ•ാര്‍ക്കൊപ്പമുള്ള ചിത്രം പങ്കുവെച്ചുകൊണ്ട് രാഹുല്‍ ഗാന്ധി രംഗത്തെത്തി. പ്രധാനമന്ത്രിയുടെ കള്ളങ്ങള്‍ ജവാ•ാര്‍ വിശ്വസിച്ചിട്ടില്ലെന്ന് വ്യക്തമാക്കിയ രാഹുല്‍, ആരാണ് യഥാര്‍ത്ഥത്തില്‍ ദേശവിരുദ്ധരെന്നും വിദേശശക്തികളുടെ നിയന്ത്രണത്തിലുള്ളതെന്നും തെളിയിക്കാന്‍ പ്രധാനമന്ത്രിയെ നേര്‍ക്കുനേര്‍ പരസ്യ സംവാദത്തിന് വെല്ലുവിളിച്ചു