കണ്ണൂരില്‍ അമ്മയും മകനും വെട്ടേറ്റ് മരിച്ച നിലയില്‍ കണ്ടെത്തി , അമ്മയെ കൊലപ്പെടുത്തിയ ശേഷം മകന്‍ ജീവനൊടുക്കി എന്ന് പ്രാഥമിക നിഗമനം

2026-11-10

കണ്ണൂര്‍ മട്ടന്നൂരില്‍ റിട്ടയേഡ് അധ്യാപികയായ ജ്യോതി , മകന്‍ നവീന്‍ കൃഷ്ണ  എന്നിവരെ വീട്ടിനുള്ളില്‍ വെട്ടേറ്റ് മരിച്ചു  . ഇന്ന് രാവിലെ ഒമ്പതരയോടെയാണ് ഇരുവരെയും വെട്ടേറ്റ നിലയില്‍ കണ്ടെത്തിയത്  അമ്മയെ വെട്ടിക്കൊലപ്പെടുത്തിയ ശേഷം മകന്‍ നവീന്‍ സ്വയം വെട്ടി ജീവനൊടുക്കുകയായിരുന്നുവെന്നാണ് പോലീസിന്റെ പ്രാഥമിക നിഗമനം .

മട്ടന്നൂര്‍ ലയണ്‍സ് ക്ലബ്ബ് റോഡിലെ 'നന്ദനം' എന്ന വീടിന്റെ രണ്ടാം നിലയിലാണ് ഇരുവരെയും വെട്ടേറ്റ് ചോരയില്‍ കുളിച്ച നിലയില്‍ കണ്ടെത്തിയത്. ചൊവ്വാഴ്ച രാവിലെ ഒന്‍പതരയോടെയാണ് സംഭവം നടന്നതെന്നാണ് പോലീസ് വ്യക്തമാക്കുന്നത് .ജ്യോതിയുടെ ഭര്‍ത്താവും റിട്ടയേഡ് കെ.എസ്.ഇ.ബി ജീവനക്കാരനുമായ ജയകൃഷ്ണന്‍ രാവിലെ ക്ഷേത്രത്തിലും ടൗണിലും പോയി തിരികെ എത്തിയപ്പോഴാണ് ഇരുവരെയും രക്തത്തില്‍ കുളിച്ച നിലയില്‍ കണ്ടത്. ഉടന്‍ തന്നെ പോലീസും നാട്ടുകാരും ചേര്‍ന്ന് ഇവരെ തലശ്ശേരിയിലെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല .  അമ്മയും മകനും തമ്മിലുണ്ടായ കടുത്ത തര്‍ക്കമാണ് ഈ അക്രമത്തിലേക്കും മരണത്തിലേക്കും നയിച്ചതെന്നാണ് പോലീസ് സംശയിക്കുന്നത്. വീട്ടിലെ സി.സി.ടി.വി ദൃശ്യങ്ങള്‍ ഉള്‍പ്പെടെ പോലീസ് പരിശോധിച്ചെങ്കിലും പുറത്തുനിന്ന് മറ്റാരും വന്നതായി അസ്വാഭാവിക ദൃശ്യങ്ങളൊന്നും കണ്ടെത്തിയിട്ടില്ല . കുടുംബത്തില്‍ മറ്റ് പ്രശ്‌നങ്ങളോ തര്‍ക്കങ്ങളോ ഉള്ളതായി അറിയില്ലെന്നാണ് അയല്‍ക്കാര്‍ പോലീസിന് നല്‍കിയ മൊഴി. മട്ടന്നൂര്‍ പോലീസ് കേസെടുത്ത് സംഭവത്തിന് പിന്നിലെ കൃത്യമായ കാരണം കണ്ടെത്താനായി വിശദമായ അന്വേഷണം നടത്തിവരികയാണ് .