സംസ്ഥാനത്ത് ഐ.എ.എസ് തലപ്പത്ത് വന്‍ അഴിച്ചുപണി , 35 മുതിര്‍ന്ന ഉദ്യോഗസ്ഥര്‍ക്ക് പുതിയ ചുമതലകള്‍, കെ.എസ്.ഇ.ബി ചെയര്‍മാനായി എന്‍. പ്രശാന്ത്

2026-11-03

സംസ്ഥാനത്തെ ഐ.എ.എസ് തലപ്പത്ത് വന്‍ അഴിച്ചുപണി നടത്തി സര്‍ക്കാര്‍. ആഭ്യന്തരം, ധനകാര്യം, ആരോഗ്യം, ഗതാഗതം തുടങ്ങി സുപ്രധാന വകുപ്പുകളിലെ മേധാവികളെ മാറ്റി നിയമിച്ചു. കെ.എസ്.ഇ.ബി ചെയര്‍മാന്‍ സ്ഥാനത്തും മാറ്റമുണ്ട്. ആകെ 35 മുതിര്‍ന്ന ഐ.എ.എസ് ഉദ്യോഗസ്ഥര്‍ക്കാണ് പുതിയ ചുമതലകള്‍ നല്‍കിയിരിക്കുന്നത്.

സംസ്ഥാനത്തെ ഭരണനിര്‍വ്വഹണം കൂടുതല്‍ കാര്യക്ഷമമാക്കുന്നതിന്റെ ഭാഗമായാണ് ഐ.എ.എസ് തലപ്പത്ത് വന്‍ അഴിച്ചുപണിയുമായി സര്‍ക്കാര്‍ ഉത്തരവിറക്കിയത്. സുപ്രധാന വകുപ്പുകളിലെല്ലാം ഉദ്യോഗസ്ഥരെ മാറ്റി. ആഭ്യന്തരം, വിജിലന്‍സ്, ധനകാര്യം, ആരോഗ്യം, കെ.എസ്.ഇ.ബി തുടങ്ങിയ പ്രധാന വകുപ്പുകളിലെല്ലാം പുതിയ മേധാവികള്‍ ഉടന്‍ ചുമതലയേല്‍ക്കും. ആകെ 35 മുതിര്‍ന്ന ഐ.എ.എസ് ഉദ്യോഗസ്ഥരെയാണ് വിവിധ വകുപ്പുകളിലേക്ക് മാറ്റി നിയമിച്ചിരിക്കുന്നത്. ഭരണപരമായ അടിയന്തര ആവശ്യങ്ങളും ഉദ്യോഗസ്ഥരുടെ സേവന പരിചയവും കണക്കിലെടുത്താണ് ഈ വലിയ സ്ഥലംമാറ്റം നടപ്പിലാക്കിയിരിക്കുന്നത്.കെസ്ഇബി ചെയര്‍മാന്‍ സ്ഥാനത്തുനിന്ന് എം ജി രാജമാണിക്യത്തെ മാറ്റി. പകരം എന്‍ പ്രശാന്തിനെ നിയമിച്ചു. കെ ആര്‍ ജ്യോതിലാല്‍ ആണ് പുതിയ ആഭ്യന്തര സെക്രട്ടറി.ആഭ്യന്തര സെക്രട്ടറിയായിരുന്ന മിന്‍ഹാജ് ആലത്തെ ധനകാര്യവകുപ്പിലേക്ക് മാറ്റി. ആരോഗ്യവകുപ്പില്‍ നിന്ന് ഷര്‍മിള മേരി ജോസഫിനെ മാറ്റി പകരം മുഹമ്മദ് ഹനീഷിനാണ് പുതിയ ചുമതല. ഗതാഗതവകുപ്പിന്റെ ചുമതലയാണ് ഷര്‍മിള മേരി ജോസഫിന് സര്‍ക്കാര്‍ നല്‍കിയത്. അതേസമയം, എം ബീനയെ വ്യവസായ വകുപ്പ് സെക്രട്ടറിയായും സര്‍ക്കാര്‍ നിയമിച്ചു.തദ്ദേശ സ്വയംഭരണ വകുപ്പ് സെക്രട്ടറിയായിരുന്ന ടി.വി. അനുപമയെ ധനകാര്യ  വകുപ്പ് സെക്രട്ടറിയായി പുതിയ സ്ഥാനത്തേക്ക് മാറ്റി നിയമിച്ചു.സംസ്ഥാന ജി.എസ്.ടി കമ്മീഷണറായി സേവനമനുഷ്ഠിച്ചിരുന്ന പി.ബി. നൂഹിനെ തൊഴില്‍ വകുപ്പ് സ്പെഷ്യല്‍ സെക്രട്ടറിയായാണ് പുതിയ ഉത്തരവില്‍ മാറ്റിയിട്ടുള്ളത്. കേന്ദ്ര ഡെപ്യൂട്ടേഷന്‍ കഴിഞ്ഞ് മടങ്ങിയെത്തിയ ജാഫര്‍ മാലിക്കിനെ പുതിയ ജി.എസ്.ടി കമ്മീഷണറായി സര്‍ക്കാര്‍ നിയമിക്കുകയും ചെയ്തു.