കാലടി സര്‍വകലാശാല വിദ്യാര്‍ഥികളുടെ ഹര്‍ജി നാളെ സുപ്രീംകോടതിയില്‍, അടിയന്തരവാദം അനുവദിച്ചില്ല; യോഗ്യതയുണ്ടെങ്കില്‍ വീണ്ടും പരീക്ഷ നടത്താമെന്ന് കോടതി

2026-11-04

കാലടി ശ്രീശങ്കരാചാര്യ സംസ്‌കൃത സര്‍വകലാശാലയില്‍ സസ്‌പെന്‍ഷനിലായ വിദ്യാര്‍ഥികള്‍ നല്‍കിയ ഹര്‍ജി നാളെ സുപ്രീംകോടതി പരിഗണിക്കും. ഹര്‍ജി അടിയന്തരമായി ഇന്ന് തന്നെ പരിഗണിക്കണമെന്ന വിദ്യാര്‍ഥികളുടെ ആവശ്യം കോടതി അംഗീകരിച്ചില്ല. ചീഫ് ജസ്റ്റിസ് അധ്യക്ഷനായ ബെഞ്ചാണ് ഹര്‍ജി നാളെ പരിഗണിക്കാമെന്ന് അറിയിച്ചത്.

ഇന്ന് പരീക്ഷ ആരംഭിക്കുന്ന സാഹചര്യത്തില്‍ അടിയന്തരമായി കേസ് പരിഗണിക്കണമെന്ന് വിദ്യാര്‍ഥികള്‍ക്കായി ഹാജരായ അഭിഭാഷകരായ ദേവവ്രതും കെ.ആര്‍. സുഭാഷ് ചന്ദ്രനും കോടതിയില്‍ ആവശ്യപ്പെട്ടിരുന്നു. എന്നാല്‍ നാളെ കേസ് പരിഗണിക്കാമെന്നായിരുന്നു കോടതിയുടെ മറുപടി. വിദ്യാര്‍ഥികള്‍ക്ക് പരീക്ഷ എഴുതാനുള്ള യോഗ്യതയുണ്ടെന്ന് തെളിഞ്ഞാല്‍ വീണ്ടും പരീക്ഷ നടത്താന്‍ നിര്‍ദേശിക്കാമെന്നും സുപ്രീംകോടതി വ്യക്തമാക്കി.

വൈസ് ചാന്‍സലര്‍ സിസ തോമസിനെതിരായ പ്രതിഷേധവുമായി ബന്ധപ്പെട്ടാണ് സര്‍വകലാശാല 16 വിദ്യാര്‍ഥികളെ സസ്‌പെന്‍ഡ് ചെയ്തത്. സസ്‌പെന്‍ഷന്‍ ചോദ്യം ചെയ്ത് വിദ്യാര്‍ഥികള്‍ ഹൈക്കോടതിയെ സമീപിച്ചിരുന്നു. തുടര്‍ന്ന് ഒക്ടോബര്‍ 30-ന് സിംഗിള്‍ ബെഞ്ച് വിദ്യാര്‍ഥികള്‍ക്ക് സെമസ്റ്റര്‍ പരീക്ഷ എഴുതാന്‍ അനുമതി നല്‍കി. എന്നാല്‍ സര്‍വകലാശാല നല്‍കിയ അപ്പീല്‍ പരിഗണിച്ച ഹൈക്കോടതി ഡിവിഷന്‍ ബെഞ്ച് ഈ ഉത്തരവ് റദ്ദാക്കുകയായിരുന്നു.

വിദ്യാര്‍ഥികള്‍ക്ക് ആവശ്യമായ ഹാജര്‍ നിലയില്ലെന്നും ഇന്റേണല്‍ പരീക്ഷകള്‍ ഉള്‍പ്പെടെയുള്ള നിബന്ധനകള്‍ പാലിച്ചിട്ടില്ലെന്നും സര്‍വകലാശാല കോടതിയില്‍ ചൂണ്ടിക്കാട്ടി. ഇതോടെയാണ് പരീക്ഷ എഴുതാനുള്ള അനുമതി നഷ്ടമായത്. എന്നാല്‍ സസ്‌പെന്‍ഷന്‍ കാരണം ക്ലാസുകളില്‍ പങ്കെടുക്കാന്‍ കഴിയാതിരുന്നതാണ് ഹാജര്‍ കുറയാന്‍ കാരണമെന്നാണ് വിദ്യാര്‍ഥികളുടെ വാദം.

ഹൈക്കോടതി ഡിവിഷന്‍ ബെഞ്ചിന്റെ ഉത്തരവിനെതിരെയാണ് വിദ്യാര്‍ഥികള്‍ ഇപ്പോള്‍ സുപ്രീംകോടതിയെ സമീപിച്ചിരിക്കുന്നത്. പരീക്ഷ എഴുതാന്‍ കഴിയാത്ത സാഹചര്യം തുടര്‍ന്നാല്‍ ഒരു അധ്യയന വര്‍ഷം തന്നെ നഷ്ടമാകുമെന്ന ആശങ്കയും വിദ്യാര്‍ഥികള്‍ ഹര്‍ജിയില്‍ ഉന്നയിച്ചിട്ടുണ്ട്. സുപ്രീംകോടതിയുടെ നാളത്തെ തീരുമാനം വിദ്യാര്‍ഥികളുടെ തുടര്‍പഠനത്തെ സംബന്ധിച്ച് നിര്‍ണായകമാകും.