പൊലീസ് സ്റ്റേഷന്‍ അതിക്രമക്കേസ്; മുന്‍കൂര്‍ ജാമ്യം തേടി, ശ്രീനാദേവി കുഞ്ഞമ്മയും ഫെനി നൈനാനും മുന്‍കൂര്‍ ജാമ്യത്തിന്, സിസിടിവി ദൃശ്യങ്ങള്‍ പുറത്തുവന്നതോടെ വിവാദം ശക്തം കേസില്‍ നിയമനടപടി നേരിടുമെന്ന് ശ്രീനാദേവി കുഞ്ഞമ്മ

2026-11-05

യൂട്യൂബര്‍ രാജന്‍ ജോസഫിനെ അറസ്റ്റ് ചെയ്ത് അടൂര്‍ പൊലീസ് സ്റ്റേഷനിലെത്തിച്ചതിന് പിന്നാലെ നാടകീയമായി ജില്ലാ പഞ്ചായത്ത് അംഗം ശ്രീനാദേവി കുഞ്ഞമ്മ  അടൂര്‍ പൊലീസ് സ്റ്റേഷനില്‍  അതിക്രമിച്ച് കയറി എന്ന ക്കേസില്‍ അറസ്റ്റ് ഒഴിവാക്കാന്‍ മുന്‍കൂര്‍ ജാമ്യം തേടി പ്രതികള്‍. ജില്ലാ പഞ്ചായത്ത് അംഗം ശ്രീനാദേവി കുഞ്ഞമ്മയും യൂത്ത് കോണ്‍ഗ്രസ് പ്രവര്‍ത്തകന്‍ ഫെനി നൈനാനും ഉള്‍പ്പെടെയുള്ളവരാണ് മുന്‍കൂര്‍ ജാമ്യത്തിന് നീക്കം നടത്തുന്നത്. അതേസമയം, പ്രതികളെ അറസ്റ്റ് ചെയ്യണമെന്നാവശ്യപ്പെട്ട് സിപിഎം അനിശ്ചിതകാല സത്യാഗ്രഹം ആരംഭിക്കും.

ജൂലൈ പതിനൊന്നിനായിരുന്നു കേസിനാസ്പദമായ സംഭവം. യൂട്യൂബര്‍ രാജന്‍ ജോസഫിനെ അറസ്റ്റ് ചെയ്ത് അടൂര്‍ പൊലീസ് സ്റ്റേഷനിലെത്തിച്ചതിന് പിന്നാലെ നാടകീയമായി ജില്ലാ പഞ്ചായത്ത് അംഗം ശ്രീനാദേവി കുഞ്ഞമ്മ പൊലീസ് സ്റ്റേഷനില്‍  അതിക്രമിച്ച് കയറി പൊലീസിന്റെ ഔദ്യോഗിക കൃത്യനിര്‍വഹണം തടസ്സപ്പെടുത്തിയെന്നായിരുന്നു കേസ്. എന്നാല്‍ തുടര്‍നടപടികള്‍ ഉണ്ടായിരുന്നില്ല. കണ്ടാല്‍ അറിയാവുന്നവര്‍ എന്നായിരുന്നു എഫ്ഐആറില്‍ പ്രതികളെക്കുറിച്ച് രേഖപ്പെടുത്തിയിരുന്നത്.

പിന്നീട് സിപിഎം ഇടപെട്ട് വിവരാവകാശ നിയമപ്രകാരം പൊലീസ് സ്റ്റേഷനിലെ സിസിടിവി ദൃശ്യങ്ങള്‍ പുറത്തുകൊണ്ടുവന്നതോടെയാണ് സംഭവം വീണ്ടും വിവാദമായത്. സ്റ്റേഷനില്‍ അതിക്രമം നടത്തിയിട്ടില്ലെന്നും പരാതിക്കാരി എന്ന നിലയില്‍ പ്രതിയെ തിരിച്ചറിയാനാണ് എത്തിയതെന്നുമാണ് ശ്രീനാദേവി കുഞ്ഞമ്മയുടെ വിശദീകരണം. സെല്ലിനുള്ളില്‍ കയറുകയോ പ്രതിയെ ഭീഷണിപ്പെടുത്തുകയോ ചെയ്തിട്ടില്ലെന്നും ഇവര്‍ വ്യക്തമാക്കി.

കേസിനെ നിയമപരമായി നേരിടുമെന്നും അന്വേഷണവുമായി പൂര്‍ണമായി സഹകരിക്കുമെന്നും ശ്രീനാദേവി കുഞ്ഞമ്മ പ്രതികരിച്ചു. അതേസമയം, പ്രതികളെ അറസ്റ്റ് ചെയ്യണമെന്നാവശ്യപ്പെട്ട് സിപിഎം അനിശ്ചിതകാല സത്യാഗ്രഹത്തിന് ഒരുങ്ങുകയാണ്. പി. ജയരാജനാണ് സമരം ഉദ്ഘാടനം ചെയ്യുക. ശ്രീനാദേവി കുഞ്ഞമ്മയ്ക്കും ഫെനി നൈനാനും പുറമേ നെസ്മല്‍, അബിന്‍ ശിവദാസ് എന്നിവരും കേസില്‍ പ്രതികളാണ്. കേസില്‍ അറസ്റ്റിലായ യൂത്ത് കോണ്‍ഗ്രസ് അടൂര്‍ നിയോജക മണ്ഡലം പ്രസിഡന്റിന് കഴിഞ്ഞ ദിവസം മജിസ്‌ട്രേറ്റ് കോടതി ജാമ്യം അനുവദിച്ചിരുന്നു.