അഡിഷണല്‍ ജഡ്ജിക്ക് മുന്‍കൂര്‍ ജാമ്യം, ജഡ്ജി കേസ് അന്വേഷണവുമായി സഹകരിക്കുന്നുണ്ടെന്ന് കോടതി

2026-11-05

ചേരാനല്ലൂര്‍ ബെന്‍സ് വാഹനാപകടക്കേസില്‍ പ്രതിയായ അഡിഷനല്‍ ജഡ്ജിക്ക് ഹൈക്കോടതി മുന്‍കൂര്‍ ജാമ്യം അനുവദിച്ചു. അപകടത്തില്‍ കാര്‍ ഓടിച്ചിരുന്ന പതിനേഴുകാരന്റെ പിതാവും വാഹനത്തിന്റെ ഉടമയുമായ ജഡ്ജിക്കാണ് മുന്‍കൂര്‍ ജാമ്യം ലഭിച്ചത്. കേസ് അന്വേഷണവുമായി ജഡ്ജി സഹകരിക്കുന്നുണ്ടെന്ന് നിരീക്ഷിച്ചാണ് കോടതിയുടെ നടപടി.

പ്രായപൂര്‍ത്തിയാകാത്ത മകന്‍ കാറുമായി പുറത്തുപോയി അപകടമുണ്ടാക്കിയ സംഭവത്തിലാണ് ജഡ്ജിക്കെതിരെ പൊലീസ് കേസെടുത്തത്. ജഡ്ജിക്ക് മുന്‍കൂര്‍ ജാമ്യം അനുവദിക്കുന്നതിനെ അപകടത്തില്‍ മരിച്ച ജയബാലകൃഷ്ണന്റെ കുടുംബം ശക്തമായി എതിര്‍ത്തിരുന്നു. ജഡ്ജിക്ക് ജാമ്യം ലഭിച്ചാല്‍ ഔദ്യോഗിക പദവിയും സ്വാധീനവും ഉപയോഗിച്ച് കേസ് അന്വേഷണം അട്ടിമറിക്കാന്‍ സാധ്യതയുണ്ടെന്നായിരുന്നു കുടുംബത്തിന്റെ ആരോപണം.

അപകടത്തിന് പിന്നാലെ ജഡ്ജിയും ഭാര്യയും സംഭവസ്ഥലത്ത് മണിക്കൂറുകളോളം ചെലവഴിച്ചതും തെളിവുകള്‍ നശിപ്പിക്കാന്‍ ശ്രമം നടന്നെന്ന സംശയവും കുടുംബം കോടതിയില്‍ ഉന്നയിച്ചിരുന്നു. ഈ സാഹചര്യത്തില്‍ അറസ്റ്റ് തടഞ്ഞുകൊണ്ടുള്ള ഇടക്കാല സംരക്ഷണം റദ്ദാക്കണമെന്നും കുടുംബം ആവശ്യപ്പെട്ടിരുന്നു. എന്നാല്‍ അന്വേഷണവുമായി ജഡ്ജി സഹകരിക്കുന്നുണ്ടെന്ന് കോടതി ചൂണ്ടിക്കാട്ടി. തുടര്‍ന്നും അന്വേഷണ ഉദ്യോഗസ്ഥര്‍ ആവശ്യപ്പെടുമ്പോള്‍ സഹകരിക്കണമെന്നും കോടതി നിര്‍ദേശിച്ചു.