12 വര്‍ഷത്തെ കാത്തിരിപ്പിനൊടുവില്‍ നീതി, ആംഗ്ലോ ഇന്ത്യന്‍ സമുദായത്തിന് എല്‍എല്‍എമ്മിനു സംവരണം, കോഴ്‌സുകളില്‍ മൂന്ന് ശതമാനം സംവരണം അനുവദിച്ച് ഉത്തരവ്

2026-11-05

12 വര്‍ഷത്തെ കാത്തിരിപ്പിനൊടുവില്‍ ലത്തീന്‍ കത്തോലിക്കാ-ആംഗ്ലോ ഇന്ത്യന്‍ സമുദായത്തിന് നീതി. എല്‍എല്‍എം കോഴ്‌സുകളില്‍ മൂന്ന് ശതമാനം സംവരണം അനുവദിച്ച് ഉത്തരവായി.

2026-27 അധ്യയനവര്‍ഷത്തെ എല്‍എല്‍എം പ്രവേശനത്തിനുള്ള പ്രോസ്പെക്ടസില്‍ ലത്തീന്‍ കത്തോലിക്ക-ആംഗ്ലോ ഇന്ത്യന്‍ സമുദായത്തിന് മൂന്നു ശതമാനം സംവരണം ഉള്‍പ്പെടുത്തി. കഴിഞ്ഞ വര്‍ഷം ആംഗ്ലോ-ഇന്ത്യന്‍ ഒഴികെയുള്ള ലത്തീന്‍ കത്തോലിക്കര്‍ക്ക് രണ്ടു ശതമാനം എന്നതായിരുന്നു വ്യവസ്ഥ. 2014ല്‍ ഉമ്മന്‍ചാണ്ടി സര്‍ക്കാര്‍ ഹയര്‍ സെക്കന്‍ഡറി, പ്രഫഷണല്‍ കോളജുകള്‍ എന്നിവിടങ്ങളില്‍ ലത്തീന്‍ കത്തോലിക്ക-ആംഗ്ലോ ഇന്ത്യന്‍ സമുദായങ്ങളുടെ വിദ്യാഭ്യാസ സംവരണം രണ്ടു ശതമാനത്തില്‍നിന്ന് മൂന്നു ശതമാനമായി വര്‍ധിപ്പിച്ച് ഉത്തരവിട്ടതാണ്. എന്നാല്‍ തിരുവനന്തപുരം പ്രവേശന പരീക്ഷാ കമ്മീഷണര്‍ അലോട്ട്മെന്റ് നടത്തുന്ന എല്‍എല്‍എം കോഴ്സുകളില്‍ ഈ ഉത്തരവ് നടപ്പിലാക്കിയിരുന്നില്ല. ഇതിനെതിരേ ഫോര്‍ട്ട്കൊച്ചി നസ്രത്ത് സ്വദേശി ആന്റണി നില്‍ട്ടണ്‍ റമേലോ ഹൈക്കോടതിയില്‍ നിയമപോരാട്ടം നടത്തിയിരുന്നു. ഇതേത്തുടര്‍ന്ന് 2024ലെ ഉത്തരവ് അടിയന്തരമായി നടപ്പിലാക്കാന്‍ പിന്നോക്ക വിഭാഗ വികസന വകുപ്പ് നിര്‍ദേശം നല്‍കുകയായിരുന്നു. 12 വര്‍ഷത്തെ കാത്തിരിപ്പിനുശേഷമാണ് ഉത്തരവിന്റെ ആനുകൂല്യം സമുദായത്തിന് ലഭ്യമാകുന്നത്. അഭിഭാഷകരായ ഷെറി ജെ. തോമസ്, പി. ജെ. ഉണ്ണികൃഷ്ണന്‍, റെനീഷ് രവീന്ദ്രന്‍, ജോമോന്‍ ആന്റണി, പി.വി. അഞ്ജന, ലിഗേഷ് സേവ്യര്‍, ആന്‍ മരിയ ജോണ്‍സണ്‍ എന്നിവര്‍ വിവിധ ഘട്ടങ്ങളിലായി ഫയല്‍ ചെയ്ത ഹര്‍ജികളില്‍ ഹാജരായി.